BIBLIOTHECA AUGUSTANA

 

Das Nibelungenlied

1190/1200

 

 

Handschrift B

 

10. Aventiure

 

___________________________________________________

 

 

ANDERTHalp des rines     sach man mit manigen sharn

den chvnich mit sinen gesten     zv dem stade varn

ovch sah man da bi zovme     leiten manige meit

di si enpfahen solden     di waren alle bereit

Do di von Islande     cen sehffen chomen dan

vnt ovch von Nibelvngen     di Sifrides man

si gahent zv dem lande     vmmvezech wart ir hant

da man des chvniges vrivnde     des stades anderthalben vant

578

Nv hoeret <ovh> disiv mære     von der chvnegin

Vten di richen     wi si div magedin

frvmte von der bvrge     dar si do selbe reit

da gewan ein ander chvnde     vil manich riter vnt meit [316b]

Der herzoge Gere     Crimhilt zvomte dan

niwar fver daz bvrgetor     Sifrit der chvene man

der mvst ir fverbaz dienen     si was ein shone chint

des wart im wol gelonet     von der ivnch vrowen sint

580

Ortwin der chvne     bi vrov Vten reit

vil gesellechlichen     manich riter vnd meit

ce so grozem antpfange     des wir wol mvegen iehen

wart nie so vil der vrowen     bi ein ander gesæhen

581

Vil manich bvhvrt richer     wart da getriben

von helden <loblichen>     niht wol daz wære beliben

vor Crimhilt <der> vil shonen     zv den schiffen dan

do hvp <man> von den moren     <manige> vrowen wolgetan

Der chvnich was chomen veber     vnt manich werder gast

hei waz starcher sheffte     vor den vrowen brast

man hort da hvrtechlichen     von schilden manigen stoz

hey waz richer pvkelen     vor gedrange lvt er doz

583

Di vil minnechlichen     stvnden an der habe

Gvnther mit sinen gesten     gie von den shiffen abe

er fvrte prvnhilden     selb an siner hant

da lvhte wider ein ander     vil lieht stein vnt gewant

584

Mit vil grozen zvehten     vrov Crimhilt do gie

do si vrovn Prvnhilden     von ir gesinde enpfie

man sach da shapel rvcken     mit liehten henden da

si sich chvsten beide     daz wart dvrch zvht getan

Do sprach gezogenliche     Crimhilt daz mægedin

ir svlt zv disen landen     vns willechomen sin

mir vnt miner mvter     vnt allen di wir han

der getriwen frivnde     do wart nigen getan

586

Di vrowen sich beviengen     mit armen dike hie

so minnechlich enpfahen     gehorte man noch nie

so di vrowen bæide     der brvete taten chvnt

vrov vote vnt ir tohter     di chvsten dicke ir sovzen mvnt

587

Do frov Prvnnhilt     vol chom vf den sant

si wart vil minnechlichen     genomen bi der hant

von wætlichen recken     manich wip wol getan

man sach di schonen mægede     vor vrovn Prvnnhilde stan

E daz ir grvz er gienge     daz was ein lange stvnt

ia wart da gechvsset     manich rose varwer mvnt

noch stvnden bi ein ander     di <chvniges> tohter rich

daz liebte an ce sæhene     <vil> manigem recken lobelich

589

Do spæhten mit den ovgen     di ê horten iehen

daz si also shones     niht mer hæten [317a] gesæhn

so di vrowen beide     des iach man ane lvge

ovch chos man an ir libe     da dehæiner slahte trvge

590

Di vrowen spæhen chvnden     vnt minnechlichen lip

di lobten dvrch ir shoene     daz Gvntheres wip

do sprachen da di wisen     di hæten iz baz gesæhen

man moehte Crimhilden     vor vrovn Prvnnhilden iehen

Wider ein ander <wol> giengen     magt vnt wip

man sach da vol gecieret     <vil> manigen shonen lip

da stvnden siden hvetten     vnd manech rich gcelt

der was gar erfvellet     vor Wormez daz velt

592

Vor des chvneges magen     wart dringen da getan

do hiez man Prvnnhilde     vnt Criemhilde gan

vnt mit in alle di vrowen     da man schate vant

da brahten si di dægene     vzer bvrgvnden lant

593

Nv waren ovch di geste     ce rosse alle chomen

vil manich richiv tiost     dvrch shilt wart genomen

daz velt begonde stivben     sam ob al daz lant

mit lovge wær er brvnnen     da wrden helde wol bechant

Des da di recken pflagen     daz sach da manich meit

mich dvnchet daz her Sifrit     mit sinen dægen reit

vil manige wider chære     fver di hvetten dan

er fvrt der Nibelvnge     tvsent wætlicher man

595

Do chom von Tronege Hagene     als im der wirt geriet

den bvohvrt minnechliche     do der helt geshiet

daz si vngestovbet liezzen     div vil schonen chint

des wart do von den gesten     gevolget gvetliche sint

596

Do sprach der herre Gernot     div ros lazet stan

vnz ez beginne <chivelen>     so svl wir ane van

dienen shonen wiben     fvr den palas wit

so der chvenich welle riten     daz ir vil bereite sit

Do der bvhvrt was cer gangen     veber al daz velt

do giengen chverzewilen     vnder manich gecelt

di ritter zv den vrowen     vf hoher vrevden wan

da vertriben si di stvnde     vnz si wolden riten dan

598

Vor abendes nahen     do div svnne nider gie

vnt ez begonde chvolen     niht langer man daz lie

sich hvop gegen der bverge     manich man vnt wip

mit ovgen wart getrivtet     vil maniger shonen vrowen lip

599

Da wart von gvten helden     vil chleider [317b] ab geriten

von den hochgemveten     nach des landes siten

vnze fvr den palas     der chvnich nider stvnt

da wart gedient den vrowen     so helde hochgemvete tvnt

Do wrden ovch geshæiden     di richen chvnegin

vrov v^te vnt ir tohter     di giengen beide hin

mit ir ingesinde     in ein vil witez gadem

do horte man allenthalben     ce vrevden grozen chradem

601

Gerihtet wart daz gesidele     der chvnich wolde gan

ce tisshe mit den gesten     do sach man bi im stan

di shonen Prvnnhilde     crone si do trvch

in des chveneges lande     ia was si rich genvch

602

Vil manich her gesidele     mit gvten tavelen bereit

von spise wart gesezet     als vns ist geseit

des si da haben solden     wi wenech des gebrast

do sach man bi dem chvnege     vil manigen herlichen gast

Des wirtes chamerære     in becken von golde rot

daz wazer fvr trvogen     des wære lvcel not

ob iv daz iemen sagte     daz man diente baz

ce fvrsten hochgecite     ich wolte niht gelovben daz

604

E daz der vogt von rine     wazer do genam

do tet der herre Sifrit     als im do gezam

er mant in siner triwe     wes er im ver iach

ê daz er Prvnnhilt     da heime in Islande sach

Er sprach ir svlt gedenchen     des mir swor iwer hant

swenne vrov Prvnnhilt     choeme in diz lant

ir gæbet mir iwer swester     wa sint di eide chomen

ich han an iwer reise     michel arbeit genomen

606

Do sprach der chvnich cem gaste     ir habet mich reht er mant

iane sol niht meinæide     werden des min hant

ich wil iz iv fvegen     so ich aller beste chan

do hiez man Criemhilde     ce hove fver den chvnich gan

607

Mit ir vil schonen mægden     si chomen fver den sal

do spranch von einer stiege     Giselher ce tal

nv hæizet wider wenden     disiv magedin

niwan min swester eine     sol bi dem chvnege sin

Do braht man Criemhilde     da man den chvnich vant

do stvnden ritter edele     von maniges fversten lant

in dem sal witen     man hiez si stille stan

do was div vrov Prvnnhilt     wol hin vnz an den tissch gegan [318a]

609

Do sprach der kvnich Gvnther     swester vil gemeit

dvrch dine selbe tvgende     lose minen eit

ich swor dir einen recken     vnt wirdet der din man

so hastv minen willen     mit vil grozen triwen getan

610

Do sprach div maget vil edele     vil lieber brvder min

ir svlt mich niht pflægen     ia wil ich immer sin

swi ir mir gebietet     daz sol sin getan

ich wil in loben gerne     den ir mir herre gebet ce man

Von lieber ovgen blicke     wart Sifrit varwe rot

ce dienste sich der recke     vron Criemhilde bot

man hiez si zv ein ander     an einen rinch do gan

man vragte ob si gerne næme     den vil vætlichen man

612

In magtlichen zvehten     shamte si sich ein teil

iedoch was gelvcke     vnt Sifrit vil geil

daz si in niht versprechen     wolde al da cehant

ovch lobte si ce wibe     der edel chvenich von Niderlant

613

Do er si gelobte     vnt ovch in div meit

gvetlich vmbevahen     was da vil bereit

von Sifrides armen     daz minnechliche chint

von helden wart gechvesset     div shone Crimhilt sint

<Sich> teilte daz gesinde     also daz geshah

an daz gegensiedele     man Sifride sah

mit Criemhilde sitcen     dar diente manich man

man sach di Niebelvnge     mit samt Sifride gan

615

Der chvnich was gesezen     vnt Brvennhilt div meit

do sah si Criemhilde     done wart nie so leit

bi Sifride sitzen     weinen si began

ir vielen heize træhene     vber liehtiv wange dan

616

Do sprach der wirt des landes     vil liebiv vrowe min

war vmbe lat ir trveben     vil liehter ovgen shin

ir mvget ivch vrevn balde     iv ist vndertan

min lant vnt mine bvrge     vnt manich wætlicher man

Ich mach wol balde wæinen     sprach div shoniv meit

vmb dine svester     ist mir von hercen leit

di sihe ich nahen sitzen     dem eigenholden din

daz mvz ich imer weinen     sol si also verdærbet sin

618

Do sprach der chvnich Gvnther     ir mvegt wol stille dagen

ich wil iv zandern ziten     disiv mære sagen

war vmb ich mine swester     Sifride han gegæben

ia mach si mit dem recken     immer vrolichen læben

619

Si sprach mich iamert immer     ir shone vnt ovch ir zvht

wess ich war ich mohte     ich hæte gerne flvht

daz ich <iv> nimmer [318b] wolde     geligen nahen bi

irn saget mir wa von Criemhilt     <div> Sifrides wine si

Do sprach der chvnich edele     ich tvn iz iv wol bechant

er hat <als> wol bverge     als ich vnt witiv lant

daz wizet sicherliche     er ist ein chvnich rich

dar vmb gan ich <im> ce minnen     di schonen magt lobelich

621

Swaz ir der chvnich sagete     si hete trveben mvt

do gahte von den rossen     vil manich ritter gvt

ir bvhvrt wart so herte     daz al div bvrch erdoz

den wirt bisinen gesten     vil <harte> sere verdroz

622

Er dahte er læge sanpfer     der schonen vrowen bi

do was er des gedingen     niht gar in hercen vri

im mvse von ir schvlden     liebes vil geshæhen

er begonde vrivntlichen     an vrovn Prvnhilde sæhen

Ir ritterschapf di geste     bat man abe lan

der chvnich mit sinem wibe     ce bette wolde gan

vor des sales stigen     gesamenten si sich sit

Criemhilt vnt Prvnnhilt     noch was iz an ir beider nit

624

Do chom ir ingesinde     dine svmten sich des niht

ir richen chamærære     brahten in div lieht

sich teilten do di recken     der zweir chvnige man

do sach man vil der dægene     <danne> mit Sifride gan

625

Di herren chomen beide     da si solden ligen

do gedaht ietslicher     mit minnen an gesigen

den minnechlichen vrowen     daz sempftet in den mvt

Sifride chverzewile     div wart vil grozliche gvt

Do der herre Sifrit     bi Criemhilde lach

vnt er so minnechliche     der ivnchvrowen pflach

mit sinen edelen minnen     si wart im so sin lip

er næme fvr si eine     niht tvsent andriv wip

627

Ich sag iv niht mere     wi er der vrowen pflach

nv horet disiv mære     wi Gvnther gelach

bi vrovn Prvnnhilde     der ciere dægen

er hæte dicke sampfter     bi andern wiben gelægen

628

Daz volch was im entwichen     vrowen vnt man

do wart div chemenate     vil balde zv getan

er wande er solde trivten     ir vil minnechlichen lip

ia was iz noch vnnahen     ê si wrde sin wip

In sabenwizem hemede     si an daz bette gie

do daht der ritter edele     nv han iz alliz hie

des ich ie da <gert>     in allen minen tagen

si mvst im von ir shoene     von grozen schvlden wol behagen

630

Div lieht begonde bergen     des edeln chvniges hant

do gie der dægen chvene     da [319a] er di vrowen vant

er leite sich ir nahen     sin vrevde div was groz

di vil minnechlichen     der helt mit armen vmbesloz

631

Minnechlich trivten     des chvnd er vil began

ob in div edele vrowe     hete lazzen daz getan

do zvrnde si so sere     daz in gemvete daz

er wande vinden frivnde     do vant er vintlichen haz

Si sprach ritter edele     ir svlt iz lazen stan

des ir da habet gedingen     ian mag es niht ergan

ich wil noch magt beliben     ir svlt wol merchen daz

vnz ich div mær erfinde     do wart ir Gvnther gahaz

633

Do rang er nach ir minne     vnt cerfvrt ir div chleit

do greif nach einem gvrtel     div herlichiv meit

daz was ein starcher porte     den si vmb ir siten trvch

do tet si dem chvnige     grozer leide genvch

634

Di fvoze vnt ovch di hende     si im cesamne bant

si truoch in ceinem nagel     vnt hiench in an di want

do er si slaffes irrite     di minne si im verbot

ia het er von ir creffte     vil nach gewnnen den tot

Do begond er vlegen     der meister wande sin

nv loeset min gebende     vil edliv chvnegin

ine trwe iv doch shoniv vrowe     nimmer an gesigen

vnt sol ovch harte selten     iv so nahe mer geligen

636

Sine rvchte wi im wære     want si vil sanfte lach

dort mvst er allez hangen     di naht vnz an den tach

vnz der liehte morgen     dvrh div venster shein

ob er ie crapft gewnne     div was an sinem libe chlein

637

Nv sagt mir her Gvnther     ist iv daz iht leit

ob ivch gebvnden fvnden     sprach div shone meit

di iwern chamerære     von einer vrowen hant

do sprach der ritter edele     daz wrd iv vebele bewant

Ovch het ihes wenich ere     sprach der snelle man

dvrch iwer selber tvgende     nv lat mich zv iv gan

sit daz iv mine <minne>     sint also starche leit

ich sol mit minen henden     nimmer rveren iwer chleit

639

Do losete si in balde     vnt do sin vf verlie

wider daz bette     er zv der vrowen gie

er leite sich so verre     daz er ir schone wat

dar nach vil selten rvrte     des wold ovch si do haben rat

640

Do chom ovch ir gesinde     di brahten in niwiv chleit

der was in an den morgen     harte vil bereit

swi wol man da gebarte [319b] trvrech was genvch

der herre von dem lande     swi er des tages crhone trvch

Nach siten der si pflagen     vnt man dvrch reht begie

Gvnther vnt Prvnnhilt     niht langer daz en lie

si giengen zv dem mvnster     da man di messe sanch

dar chom ovch her Sifrit     sich hvp da grozlich gedranch

642

Nach chvnechlichen eren     was in dar bereit

swaz si da haben solden     ir chrone vnt ovch ir chleit

do wrden si gewihet     do daz was getan

do sach man si alle viere     vnder chrone vrolichen stan

643

Vil ivnger swert <degen> da namen     sehs hvndert oder baz

den chvnegin al ceden eren     ir svlt wol wizzen daz

sich hvp vil michel vrevde     in der Bvrgende lant

man horte da scheffte hellen     an der swertdægene <hant>

Do sazen in den venstern     div schonen mægedin

si sahen vor in livhten     vil maniges schildes schin

do het sich gescheiden     der chvnich von sinen man

swes iemen ander pflæge     man sah den chvnich trvrende gan

645

Im vnt Sifride     vngelich stvnt der mvt

wol wesse waz im wære     der edel ritter gvt

do giench er zv dem chvnige     vragen er began

wi ist iv hint gelvngen     daz svlt ir mich nv wizen lan

646

Do sprach der wirt ce dem gaste     ich han laster vnt shaden

want ich han den vbeln tivel     heim ce hvse geladen

do <ich> si wande minnen     vil sere si mich bant

si trvoch mich ceinem nagele     vnt hie mich hohe an di want

Da hie ich angestliche     di naht vnz an den tach

ê daz si mich embvnde     wi samfte si do lach

daz sol dir vrivntliche     <vf> genade sin gechleit

do sprach der starche Sifrit     ez ist mir werliche leit

648

Des bringe ich dich wol innen     vnt lezestv iz ane nit

ich shaffe daz si hintz     so nahe bi dir gelit

daz sie dich ir minne     gesvmet nimmer mer

der rede was do Gvnther     nach sinen arbeiten her

649

Do sprach der herre Sifrit     dv maht wol genesen

ich wene vns vngeliche     hinat si gewesen

mir ist din swester Crimhilt     lieber danne der lip

ez mvz div vrowe Prvnnhilt     noch hinat werden din wip [320a]

Er sprach ich chvm noch hinte     ce der chemenaten din

also tovgenlichen     in der tarnkappen min

daz sich miner liste     mach niemen wol versten

so la di chamerære     vz zv ir herberge gen

651

So lessche ich den chinden     div lieht an der hant

daz ich si dar inne     da bi si dir bechant

daz ich dir gerne diene     so twinge ich dir din wip

daz dv si hinte minnest     oder ich verlivse minen lip

652

Ane daz dv iht trvetest     sprach der chvnich do

di mine lieben vrowen     anders pin iches vro

so tv ir swaz dv wellest     vnt næmest ir den lip

daz sold ich wol verchiesen     si ist ein vreislichez wip

Daz nim ich <so> sprach Sifrit     vf di triwe min

daz ich ir niht en minne     div shone swester din

div ist mir vor allen     di ich <noch> ie gesach

vil wol gelovbte der chvenich Gvnther     daz Sifrit gesprach

654

Da was von kvrcewile     vrevde vnt not

bvhvrt vnt shallen     allez man verbot

da di vrowen solden     gegen dem sale gan

do hiezen di kamerære     di livte von dem wege stan

655

Von rossen vnt von livten     gervmet wart der hoff

der vrowen ietsliche     di fvrt ein bissoff

do si vor den chvnegen     ce tissche solden gan

in volgete an daz gesidele     vil manich wætlicher man

Der chvnich in gvtem wane     do vrolichen saz

daz im gelobte Sifrit     wol daht er ane daz

der eine tach in dvhte     wol drizech tage lanch

an siner vrowen minne     stvnt aller sin gedanch

657

Er erbeite chvme     daz man von tisshe gie

di schonen Prvnnhilde     man do chomen lie

vnt ovch vrovn Crimhilde     bede an ir <gemach>

hey waz man sneller dægne     vor den chvnegen sach

658

Sifrit der herre     vil minnechlichen saz

bi sinem wibe     mit vrevden ane haz

si trvte sine hende     mit ir vil wizzer hant

vnze er ir vor den ovgen     sine wesse wenne ver swant

Do si mit im spilte     vnt sis niht mer ensach

zv sinem gesinde     div chveneginne sprach

mich hat des michel wnder     wa der chvnich si bechomen

wer hat im di sinen hende     vz den minen genomen

660

Di rede si lie beliben     do was er hin gegan

da er vil chamerære     mit den liehten vant stan

div begond er lehssen     den kinden an der hant

daz er wære Sifrit [320b]     daz was Gvnther bechant

661

Wol wesse er waz er wolde     do hiez er dannen gan

mægede vnt vrowen     do daz was getan

der riche chvnech selbe     do besloz di tver

vil starcher rigel zwene     warf er snelle darfver

Div lieht verbarch er schiere     vnder di bette wat

eines spils begonde     des was do niht rat

Sifrit der vil starche     vnt ovch div vil schoniv meit

daz was dem chvnige Gvnther     beidiv lip vnt leit

663

Sifrit der leit sich nahen     der ivnchvrowen bi

si sprach nv lat iz Gvnther     als liep als ich iv si

daz ir iht arbeite     lidet alsam e

sit getet div vrowe     dem chvnen Sifride we

664

Do hal er sine stimme     daz er niht ensprah

Gvnther wol horte     swi er sin <niht> ensah

daz heimlicher dinge     von in da niht geschach

si heten an dem bette     vil harte chleinen gemach

Er gebarte sam ez wære     Gvnther der chvnich rich

er vmbsloz mit armen     di magt lobelich

si warf in vz dem bette     da bi vf eine banch

daz im sin hovbt lvte     vf einem schamel erclanch

666

Wider vf mit crepffen     spranch der chvne man

er wold iz baz versvchen     do er des began

daz er si wolde twingen     dar vmbe wart im vil we

solech wer von deheiner vrowen     div wæne immer mer erge

667

Do er niht wold erwinden     div maget vf do spranch

iren svlt mir niht cerfveren     min hemde so blanch

ir sit vil vngefvege     daz sol iv werden leit

des bringe ich ivch wol innen     sprach div wætlichiv meit

Si besloz mit armen     den tiwerlichen <dægen>

do wold si in gebvnden     alsam den chvnich legen

daz si an dem bette     mohte haben gemach

daz er ir di wat cerfvrte     div vrowe iz grozlichen rach

669

Waz half sin groziv sterche     vnt ovch sin groziv crapft

si erceigete dem degene     <ir> libes meisterschapft

si trvch in mit gewalte     daz mvs et also sin

vnt drvcht in gevoge     zwisschen di want vnd ein schrin

670

Owe daht der recke     sol ich nv minen lip

von einer magt verliesen     so mvgen elliv wip

her nach immer mere     tragen gelffen mvt

gegen ir manne     div ez svs nimmer getvt [321a]

Der chvnich ez wol horte     er angestete vmb den man

Sifrit zvrnte sere     shamen er sich began

mit vngefvoger crepfte     sazt er sich wider

er versvchtez angestiliche     an vrovn Prvnnhilde sider

672

Den chvnich ez dvhte lange     ê er si betwanch

si drvcht im sine hende     daz vz den nageln sprach

daz plvt im von ir crepfte     daz was dem helde leit

sit braht er an <ein> lovgen     di vil herlichen meit

673

ir vngefveges willen     des si e da iach

der kvnich iz allez horte     swi er niht ensprach

er druchtes an daz <bette>     daz si vil lvte schre

ir taten sine crepfte     harte grozlichen we

Do greif si hinz ir siten     da si den porten vant

vnt wolt in han gebvnden     do wert ez so sin hant

daz ir div lid ercrachten     vnt ovch al der lip

des wart der strit gescheiden     do wart si Gvntheres wip

675

Si sprach chvnich edele     dv solt mich læben lan

ez wirt vil wol versvenet     swaz ich dir han getan

<ichen> gewer mich nimmer mære     der ædelen minne din

ich han daz wol erfvnden     daz dv chanst vrowen meister sin

676

Sifrit stvnt dannen     ligen lie er di meit

sam er von im ziehen wolde     vil gar siniv chleit

er zoch ir ab ir hende     ein gvldin vingerlin

daz si des nie wart innen     div edle chvnegin

Dar zv nam er ir gvrtel     daz was ein porte gvt

ine weiz ob er daz tæte     dvrh sinen hohen mvt

er gab iz sinem wibe     daz wart im sider leit

do lagen bi ein ander     Gvnther vnt div schoniv meit

678

Er pflach ir minnechlichen     als im daz gezam

do mvst si verchiesen     ir zorn vnt ovch ir sham

von siner heimliche     si wart ein lvocel bleich

hey waz ir von der minne     ir grozen crepffte entweich

679

Done was ovch si niht stærcher     dann ein ander wip

er trvte minnechliche     den ir vil shonen lip

ob siz versvchte mære     waz chvnde daz vervan

daz het ir allez Gvnther     mit sinen minnen getan

Wi rehte minnechliche     si do bi im lach

mit vrivntlicher liebe     vnz an den liehten tach

nv was der herre Sifrit     wider vz gegan

da er wol wart entpfangen     von einer vrowen wolgetan

681

Er vnderstvnt ir vrage     der si hæte gedaht

er hal si sit vil lange     daz er ir hæte braht

vnz daz si vnder chrone     in sinem lande gie [321b]

swaz er ir gæben solde     wi lvcel erz beliben lie

682

Der wirt wart an dem morgen     verrer baz gemvt

danne er da vor wære     des wart div vrevde gvt

in allem sinem lande     von manigem edlem man

di er ce hvse ladete     den wart vil dieneste getan

Div hohzit do wærte     vnz an den viercehenden tach

daz in al der wile     nie der shal gelach

von aller hende vrevden     der iemen solde pflægen

do wart des chvneges choste     vil harte hohe gewægen

684

Des edelen wirtes mage     als ez der chvenich gebot

den gaben dvrch sin ere     chleider vnt golt vil rot

ross vnt dar zv silber     vil manigem vremdem man

di da gabe gerten     di shieden vrolichen dan

685

Sifrit der herre     vzer Niderlant

mit tvsent sinen mannen     alliz ir gewant

daz si ce Rine brahten     wart alliz hin gegæben

vnt ovch div ross mit sætelen     si chvnden herliche leben

686

<E> daz man di riche gabe     alle da verswanch

di wider ce lande wolden     di dvhte des ce lanch

ezen wart nie geste     mære baz gepflægen

so endete sich div hohzit     daz wolde Gvnther der dægen