BIBLIOTHECA AUGUSTANA

 

Das Nibelungenlied

1190/1200

 

 

Handschrift C

 

29. Aventiure

 

___________________________________________________

 

 

Aventv wie Hagene vn Volker vor Chriemh' sal sazen

 

<Do> schieden sich die zwene     rechen lobelich

Hagen von Tronege     vn ovch her Dietrich

do blicht vber ahsel     der Guntheres man

nach einem hergesellen     den er vil schiere do gewan

1800

Er sach den videlære     bi Giselhere sten

Volchern den vil chvenen     den bat er mit im gen

wander vil wol erchande     den sinen grimmen mvot

er was an allen tvgenden     ein ritter chven vn 'gvot

1801

Noch liezen si die herren     vfem hove sten

niwan si einen zwene     di sach man dannen gen

vber den hof vil verre     fvr ein palas wit

die vzerwelten beide     vorhten niemannes nit

1802

Si gesazen vor dem hvose     gegen eime sal

der was <Chriemhilde>     vf eine banch zetal

do lvohte in vor ir libe     ir herlich gewant

gnvoge die si sahen     si heten gerne bechant

Alsam tyer div wilden     wrden gekapfet an

die vbermveten helde     von manigem Hvnen man

do ersach si durch ein venter     daz Ezeln wip

des wart do vil trvebe     der frowen Chriemh' lip

1804

Ez mante si ir leide     weinen si began

des hete michel wnder     die Ezeln man

waz ir so snelle ertrvbet     het ir hohen mvot

si sprach     daz hat Hagene     ir helde chvene vn gvot

1805

Si sprachen     frowe here     wie ist daz geschehn

wir habn ivch niwliche     so fro <gemvot> gesehn

niemen ist so chvene     swerz iv hat getan

heizet irz vns rechen     ez sol im an sin lebn gan

1806

Daz wolde ich immer dienen     swer reche miniv leit

allez daz er wolde     des wær ich im bereit

ich bivt mich iv ze fvzen     sprach des kuniges wip

rechet mich an Hagene     daz er verliese den lip

Do garten sich ze handen     wol sehzech chvner man

dvrch der frowen liebe     si wolden hin gan

vn wolden slahen Hagenen     den vil chvnen man

vn oech den videlære     daz wart mit rate getan

1808

Do div kvniginne     ir schar so kleine sach

in eime grimmen mvote     si zen helden sprach

des ir da habt gedingen     des svlt ir ab gan

iane dvrfet ir so ringe     nimmer Hagenen bestan

1809

Swie starche vn swie chvene     der von Tronege si

noch ist verre chvener     der im da sizzet bi

Volker der videlære     der ist ein vbel man

iane svlt ir die degene     niht so lihte bestan

1810

Do si daz gehorten     do garte sich ir mer

driv hvndert sneller rechen     div <kuneginne> her

was des vil genoete     daz si geræche ir leit

da von wart sit den degenen     vil michel arebeit be[64r]reit

1811

Do si nv wol gewafent     ir gesinde sach

zv den snellen degenen     div kuniginne sprach

nv bitet eine wile     ir svlt noch stille stan

ia wil ich vnder chrone     mit iv zvo minen vinden gan

1812

Vn hoeret itewizze     waz mir hat getan

Hagen von Tronege     der Guntheres man

ich weiz in wol so chvnen     daz er mir lovgent niht

so ist ovch mir vnmære     swaz im darvmbe geschiht

Do sach der videlære     ein vil chvene man

die edeln kuniginne     ab einer stiegen gan

nider vz eime hvose     als er daz gesach

der vil wise reche     zvo sime hergesellen sprach

1814

Nv schowet     frivnt Hagene     wa si her gat

div vns in vntriwen     inz lant geladet hat

ich gesach mit kuniginne     nie so manigen man

die swert enhende trvegen     also striteklichen gan

1815

<Wizzet> ir     frivnt Hagene     daz si iv sin gehaz

so rat ich iv mit triwen     ir hvtet deste baz

des libes un der eren     ia dunchet ez mich gvot

als ich mich versinne     si sint vil vbele gemvot

1816

Vn sint ovch svmeliche     zen brvsten also wit

swer sin selbes hvete     der tvo daz encit

ich wæn si vnder siden     die vesten prvnne tragen

waz si da mite meinen     daz kan ich niemen gesagen

Do sprach in zornes mvote     der vil chvne man

ich weiz wol daz iz allez     ist vf mich getan

daz si div liehten waffen     tragent an der hant

vor den moehte ich geriten     noch in der Bvrgonden lant

1818

Nv saget mir     frivnt Volker     welt ir mir gestan

ob mit mir striten wellent     die Chriemh' man

daz lazet ir mich hoeren     als liebe als ich iv si

ich won iv immer mere     mit triwen dienstlichen bi

1819

Ich hilf iv sicherlichen     sprach do der spileman

ob ich vns hie begegene     sæhe en kunic gan

mit allen sinen rechen     die wile ich leben mvoz

so entwiche ich iv durch vorhte     vz helfe nimmer einen fvoz

1820

Nv lone iv got von himele     vil edel Volker

ob si mit mir striten     wes bedorft ich danne mer

sit ir mir helfen wellet     als ich vernomen han

so svln dise degene     vil gewærlichen gan

1821

Nv sten wir von dem sedele     sprach do der spileman

si ist ein kuniginne     vn lan si fvr gan

bieten ir die ere     si ist ein edel wip

da mit ist ovch getivret     an zvhten vnser beider lip

Nein     dvrch mine liebe     sprach aber Hagene

so wolden lihte wænen     dise degene

daz ihz dvrch vorhte tæte     vn solde ich hin gan

ine wil durch ir deheinen     nimmer von dem sedel stan

1823

Ia zimt ez vns beiden     zware lazen baz

zwiv solde ich den eren     der mir ist gehaz

daz entvon ich nimmer     die wil ich han den lip

iane rvche ich waz mich hazzet     des kunic Ezeln wip

1824

Hagene der starche     der leit vber bein

ein vil liehtez [64v]wafen     vz des knopfe erschein

ein vil liehter jaspes     grvner danne ein gras

wol erchandez Chriemh'     daz ez ê Sivrides was

1825

Do si daz swert erchande     des gie si michel not

sin gehilze daz was gvldin     div scheide porten rot

ez mante si ir leide     weinen si began

ich wæn iz hete Hagene     ir ze reizen getan

1826

Volker der vil chvene     zoch naher vf der banch

einen videlbogen <starchen>     michel vn lanch

gelich eime starpfen swerte     vil lieht vn breit

do sazen vnervorhten     die zwene degene gemeit

Nv dvhten sich so here     die zwene chvne man

daz si niht enwolden     von dem sedele stan

dvrch deheine vorhte     des gie in an den fvz

div edel kuniginne     vn bot in vintlichen grvoz

1828

Si sprach     nv sagt mir     Hagene     wer hat nach iv gesant

daz ir getorstet riten     her in dizze lant

zvo also starchen leiden     vn ich von iv han

het ir rehte sinne     so het irz pilliche lan

1829

Nach mir ensande niemen     sprach do Hagene

man ladet her ze lande     drie degene

die heizent mine herren     so bin ich ir man

deheiner hovereise     bin ich vil selten ir bestan

1830

Si sprach     nv saget mir mere     warvmbe tat ir daz

daz ir daz habt verdienet     daz ich iv bin gehaz

ir slvget Sivride     den minen lieben man

des ich vnz an min ende     immer gnvoc ze weinen han

1831

Waz sol der rede mere     sprach er     ir ist genvoc

ich binz et aber Hagene     der Sivriden slvoc

einen helt ze sinen handen     wie sere er des engalt

daz div frowe Chriemh'     den schonen Prvnh' schalt

1832

Ez ist et ane lovgen     kuniginne rich

ich han is alles schulde     des schaden schedelich

nv rechez swer der welle     ez si wip oder man

ihn wolde danne liegen     ich han iv leides vil getan

Si sprach     nv hoert     ir rechen     wa er mir lovgent niht

aller miner leide     swaz im da von geschiht

daz sol mir sin vnmære     ir Ezeln man

die vber mveten degene     sahen vaste ein ander an

1834

Swer den strit da hvebe     so wêre da geschehn

daz man den zwein gesellen     der eren mvese iehn

wan siz in stvrmen heten     vil dicke wol getan

des sich iene vermazen     dvrch vorhte mvsen si daz lan

1835

Do sprach ein der reche     wes seht ir mich an

daz ich ê da lobte     des wil ich ab gan

dvrch niemannes gabe     verliesen minen lip

ia wil vns verleiten     des kunic Ezeln wip

1836

Do sprach aber ein ander     des selben han ich mvot

der mir gæbe tverne     von rotem golde gvot

disen videlære     woldeich niht bestan

dvrch sine swinde bliche     die ich an im gesehn han

1837

Ovch erchenne ich Hagenen     von sinen iungen tagen

des mach man von dem rechen     lihte mir gesagen     [65r]

in zwein vn zweinzech stvrmen     han ich in gesehn

da vil maniger frowen     ist hercenleide geschehn

1838

Er vnt der von Spane     die traten manigen stic

do si hie bi Ezelen     vahten manigen wic

zen eren dem kunige     des ist von im vil geschehn

dar vmbe mvoz man Hagene     der eren wol von schulden iehen

1839

Dannoch was der reche     siner iar ein kint

daz do tvmben waren     wie grise die nv sint

nv ist er chomen ze wizzen     vn ist ein grimmech man

ovch treit er Palmungen     da vor <enchvnde> niht <gestan>

Da mite was gescheiden     daz da niemen streit

do wart der chvniginne     vil hercenliche leit

die helde cherten dannen     ia vorhten si den tot

von dem videlære     des gie in wærliche not

1841

Do sprach der chvne Volker     wir han daz wol ersehn

daz wir hie <viende> vinden     als wir ê horten iehn

wir svln zv den kunigen     hin ze hove gan

sone tar vnser herren     mit strite niemen bestan

1842

Wie diche man durch vorhte     manigiv dinch verlat

swa so frivnt frivnde     frivntlich gestat

vn hat er gvte sinne     daz erz wisliche tvot

schade vil maniges mannes     wirt von sinnen wol behvot

1843

Nv wil ich iv volgen     sprach do Hagene

si giengen da si fvnden     vil der degene

in grozem antpfange     noch an dem hove stan

Volker der vil chvene     lvote rvefen began

1844

Er sprach zv sinen herren     wie lange welt ir sten

daz ir ivch lazet dringen     ir svlt ze hove gen

vn hoeret an dem kunige     wi der si gemvot

do sah man gesellen sich     die helde chven vn gvot

Der fvrste von Berne     der nam an die hant

Gunthern der richen     von Burgonden lant

Irenvrit Gernoten     einen chvenen man

do sah man Giselheren     ze hove mit sinem sweher gan

1846

Swie iemen sich gesellete     vn ovch ze hove gie

Volker vn Hagene     geschieden sich nie

niwan in eime stvrme     an ir endes zit

daz mvsen beweinen     vil schone iuncfrowen sit

1847

Do sach man mit den kunigen     hin ze hove gan

ir edeln ingesindes     tvsent chuner man

dar vber sehzech rechen     mit in warn chomen

die het in sime lande     der chvene Hagen genomen

1848

Hawart vn ovch Irinch     zwene vz erwelte man

die sah man frivntliche     bi den kunigen gan

Danchwart vn Wolfhart     die heten sich bewegen

man sach si grozer tvgende     in ir vbermvte pflegn

Do der vogt von Rine     in den palas gie

Ezele der riche     daz niht langer lie

er spranch von sime sedele     als er si chomen sach

ein grvoz so rehte schone     von kunige nie mer geschach

1850

Sit willechomen     her Gunther     vn ovch her Gernot

vn iwer brvder Giselher     dem ich min dienst enbot

mit triwen vlizzechli[65v]che     ze Wormez vber Rin

vn allez daz gedigene     sol mir willechomen sin

1851

Nv sit vns groz willechomen     ir zwene degene

Volker der chuone     vn ovch her Hagene

mir vn miner frowen     her in dizze lant

si hat in grozen triwen     vil diche mich vmbe ivch gemant

1852

Do sprach der starche Hagene     daz haben wir wol vernomen

wær ich durch mine herren     zen Hvnen niht bechomen

so wær ich iv zen eren     geriten in daz lant

do nam der wirt vil edele     die lieben geste zehant

1853

vn brahte si zem sedele     da er selbe saz

do schancte man den gesten     mit vlize tet man daz

in witen goldes schalen     moraz vn win

vn bat die ellenden     groze willechomen sin

Do sprach der kunic der Hunin     des wil ich iv veriehn

mirn enchvnde in disen citen     lieber niht geschehn

denne ovch an iv rechen     daz ir vns her sit chomen

des ist miner frowen     michel trvren benomen

1855

Mich nimt des michel wnder     waz ich iv habe getan

so manigen gast vil edelen     den ich gewnnen han

daz ir nie chomen rvochet     her in miniv lant

daz ich ivch nv gesehn han     daz ist zen vrevden mir gewant

1856

Des antwrt Rvdeger     ein ritter hoch gemvot

ir mveget si sehn gerne     ir triwe div ist gvot

der miner frowen mage     so schone chvnnen pflegen

si bringent iv ze hvse     vil manigen wætlichen degen

1857

An svnewenden abent     als wir han vernomen

waren si ze <Ezelen> bverge     dem chvnige ze hvse chomen

ein wirt nie sine geste     so minneklich enpfie

dar nach er zv den tischen     mit in vil vroliche gie

Ein kunec bi sinen gesten     schoner nie gesaz

man gab in vollechliche     trinchen vn maz

vn allez daz si wolden     des was man in bereit

man hete von den degenen     vil michel wnder geseit

Ezele der riche     het an <bow> geleit

sinen vliz kostenliche     mit grozer arebeit

palas un tvrne     kemenaten ane zal

in einer witen burge     vn einen herlichen sal

1860

Den het er heizen bowen     lanch     hoch vn wit

dvrch daz so vil der rechen     in svhte zaller cit

an ander sin gesinde     zwelf riche kunige her

vn vil der werden degene     het er zallen citen mer

1861

denne ir kvnic ie gewnne     als ich vernomen han

er lebt in hoher wnne     von magen vn man

schallen vn dringen     het der fvrste gvot

von manigem snellem degene     des stvont im hohe der mvot