BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

7. Aventiure

 

___________________________________________________

 

 

Aventivre wie gvnther ze islande

mit sinen gesellen chom

 

389

In den selben ziten | so was ir sciff gegan

der bvrge also nahen | do sah der kvnec stan

oben in den venstern | vil manege scoene meit

daz er ir niht erchande | daz was gvnthere leit

390

er vragte sivride | den gesellen sin

ist iv daz iht chvende | vmb disiv magedin

di dort her nider scovwent | gein vns vf di flvot

swi ir herre heize | si sint vil hohe gemvot

391

do sprach der herre sivrit | nv svlt ir tovgen spehn

vnder den ivnchfrovwen | vnt svlt mir danne iehn

welhe ir nemen woldet | hetet irs gewalt

daz tvon ich so sprach gvnther | ein riter chven vnde balt

392

so sihe ich ir eine | in ienem venster stan

in snewizer waete | div ist so wolgetan

di welent miniv ovgen | dvrch ir scoenen lip

ob ich gewalt des hete | si mvese werden min wip

393

dir hat erwelt vil rehte | diner ovgen shin

ez ist div edel prvnhilt | daz shone magdin

nach der din herce ringet | der sin vnt ovch der mvt

elliv ir gebaerde | div dvhte gvntheren gvt

394

do hiez div kvneginne | vz den venstern gan

ir herliche maegde | sin solden da niht stan

den vremden an ce sehene | des waren si bereit

waz do di vrowen taten | daz ist vns sider ovch geseit

395

gegen den vnchvnden | strichen si ir lip

des ie site heten | div wetlichen wip

an div engen venster | chomen si gegan

da si di helde sahen | daz wart dvrch schowen getan

396

ir waren niwan viere | di chomen in daz lant

sifrit der chvone | ein ros zoch vf den sant

da sahen dvrch venster | div waetlichen wip

des dvhte sich getiwert | des kvnech gvntheres lip

397

er habt im da bi zovme | di zierlichen march

gvot vnt schone | vil michel vnt vil starch

vnz der chvnich gvnther | in den satel gesaz

also diente im sifrit | des er doch sit vil gar vergaz

398

do zoch er ovch daz sine | von dem schiffe dan

er het solhen dienest | vil selten e getan

daz er bi stegereife | gestvnde helde mer

daz sahen dvrch div venster | di vrowen schon vnt her

399

reht in einer maze | den helden vil gemeit

von sneblancher varwe | ir ros vnt ovch ir chleit

waren vil geliche | ir schilde wolgetan

di lvhten von den handen | den vil waetlichen man

400

ir setel wol gesteinet | ir fvrbvge smal

si riten herliche | fvr prvnhilde sal

daran hiengen schellen | von liehtem golde rot

si chomen zv dem lande | als ez ir ellen gebot

401

mit spern niwe sliffen | mit swerten wolgetan

div vf di sporn giengen | den waetlichen man

di fvrten di vil chvnen | scharpf vnt breit

daz sach alliz prvnhilt | div vil herliche meit

402

mit in chomen do danchwart | vnt ovch hagene

wir horen sagen maere | wi di degene

von rabenswarcer varwe | trvogen richiv chleit

ir schilde waren schone | michel gvt vnt breit

403

von india dem lande | man sah si steine tragen

do chos man an ir wete | vil herliche wagen

si liezen ane hvte | ir schiffel bi der flvot

svs riten zv der bvrge | di helde chvne vnt gvt

404

sehs vnt ahzech tvrne | si sahen drinne stan

dri palas wite | vnt einen sal wolgetan

von edelem marmelsteine | grvne alsam ein gras

darinne selbe prvnhilt | mit ir ingesinde was

405

div bvrch was entslozzen | vil wite vfgetan

do lieffen in engegene | di prvnhilde man

vnt enpfiengen dise geste | in ir vrowen lant

ir ros hiez man behalten | vnt ir schilde von der hant

406

do sprach ein chameraere | ir svlt vns geben div swert

vnt ovch di liehten brvnne | des sit ir vngewert

sprach von tronge hagene | wir wellens selbe tragen

do begonde im sifrit | davon div rehten mere sagen

407

man pfliget in dirre bvrge | daz wil ich iv sagen

daz neheine geste | hie waffen svlen tragen

nv lat si tragen hinnen | daz ist wol getan

des volgete vil vngerne | hagen gvntheres man

408

man hiez den gesten schenchen | vnt shvf in gemach

vil manigen snellen rechen | man da ce hove sach

in fvrstlicher waete | allenthalben gan

do wart vil michel schowen | an di chvnen getan

409

do wart vrowen prvnhilde | gesaget mit maeren

daz vnchvnde rechen | da chomen waeren

in herlicher waete | gevlozen vf dem flvt

davon begonde vragen | div maget shone vnt gvt

410

ir svlt mich lazzen horen | sprach div chvnegin

wer di vil vnchvnden | rechen mvgen sin

di in miner bvrge | so herliche stan

vnt dvrch welhes liebe | di helde her gevarn han

411

do sprach ein ir gesinde | vrowe ich mach wol iehen

daz ich ir deheinen | nie mer habe gesehen

want geliche sifride | einer darvnder stat

den svlt ir wol enpfahen | daz ist mit triwen min rat

412

der ander der gesellen | der ist so lobelich

op er gewalt des hete | wol waer er ein chvnich rich

op witen fvrsten landen | vnd maht er div gehan

man siht in bi den andern so rehte herliche stan

413

der dritte der gesellen | der ist so grivlich

vnt doch mit schonem libe | chvneginne rich

von swinden sinen blichen | der er so vil getvt

er ist in sinen sinnen | ich waene grimme gemvt

414

der ivngeste darvnder | der ist so lobelich

magtlicher zvohte | sihe ich den degen rich

mit gvotem gelezze | so minnechliche stan

wir mohtenz alle fvrhten | hete im hi iemen iht getan

415

swi plide er pflege der zvhte | vnd swi shone si sin lip

er mohte wol erweinen | vil waetlichiv wip

swenner begonde zvrnen | sin lip ist so gestalt

er ist in allen tvgenden | ein degen chvne vnd balt

416

do sprach div chvneginne | nv brinch mir gewant

vnt ist der starche sifrit | chomen in diz lant

dvrch willen miner minne | ez gat im an den lip

ich fvrhte in niht so sere | daz ich werde sin wip

417

prvnnhilt div schone | wart schiere wol gechleit

do giench mit ir dannen | vil manich schoniv meit

wol hvndert oder mere | geciert was ir lip

ez wolden sehen di geste | div vil waetlichen wip

418

damit giengen degene | da vz islant

di prvnnhilde rechen | di trvgen swert enhant

fvmpf hvndert oder mere | daz was den gesten leit

do stvnden von dem saedele | di helde chvne vnt gemeit

419

do div chvneginne | sifriden sach

nv mvget ir gerne horen | wi div magt sprah

sit willechomen sifrit | her in diz lant

waz meinet iwer reise | gerne het ich daz bechant

420

vil michel iwer genade | min vrov prvnnhilt

daz ir mich gervchet grvzen | fvrsten tohter milt

vor disem edelen rechen | der hie vor mir stat

wand er ist min herre | der eren het ich gerne rat

421

er ist geborn von rine | waz sol ich dir sagen mer

dvrch di dine liebe | sin wir gevarn her

der wil dich gerne minnen | swaz im davon geschit

nv bedenches dich bezite | min herre erlazet dich es niht

422

er ist geheizen gvnther | vnt ist ein chvnich her

erwurbe er dine minne | ern gerte nihtes mer

ia gebot mir her ce varne | der reche wolgetan

moht ich es im geweigert han | ich het iz gerne verlan

423

si sprach ist er din herre | vnt bistv sin man

div spil div ich im teile | getar er div bestan

behabt er des meisterschapft | so wird ich sin wip

vnt ist daz ich gewinne | ez get iv allen an den lip

424

do sprach von tronege hagene | frowe lat vns sehen

iweriv spil div starchen | e daz iv mvste iehen

gvnther min herre | da mvst iz herte sin

er truwet wol erwerben | ein also schone magedin

425

den stein schol er werffen | vnt springen darnach

den gere mit mir shiezen | lat iv sin niht ce gach

ir mvget wol hie verliesen | di ere vnd ovch den lip

des bedenchet ivch vil ebene | sprach daz minnechliche wip

426

sifrit der vil chvne | zv dem kvonege trat

allen sinen willen | er in reden bat

gegen der chvneginne | er solde an angest sin

ich sol ivch wol behivten | vor ir mit den listen min

427

do sprach der chvnech gvnther | chvneginne her

nv teilet swaz ir gebietet | vnt waeres dannoch mer

daz bestvnde ich allez | dvrch iwern schonen lip

min hovbet wil ich verliesen | irn werdet min wip

428

do div chvneginne | sine rede vernam

des spils bat si gahen | als ir do gezam

si hiez ir gewinnen | ce strite gvt gewant

eine prvnne rotes goldes | vnt einen gvoten schildes rant

429

ein waffenhemde siden | daz leit an div meit

daz in deheinem strite | waffen nie versneit

von pfellel vzer lybia | ez was vil wolgetan

von porten lieht gewurhte | sach man schinen daran

430

di zit wart disen rechen | mit gelfe vil gedrevt

danchwart vnt hagene | di waren vngefrevt

wi iz dem chvnege ergienge | des sorgete in der mvt

si dahten vnser reise div | ist vns rechen niht ce gvt

431

di wile was ovch sifrit | der waetliche man

e iz iemen erfvnde | in daz schif gegan

da er sine tarnkappen | verborgen ligen vant

darin slovf er vil schiere | do was er niemen bechant

432

er ilte hin widere | do vant er rechen vil

da div chvneginne | teilte ir hohen spil

dar gi er touvgenliche | von listen daz geschach

alle di da waren | daz in da niemen en sach

433

der rinch der was beceiget | daz spil solde geschen

vor manigem chvnen rechen | di daz solden sehen

mer danne siben hvndert | di sah man waffen tragen

swem an dem spil gelvnge | daz erz di helden solde sagen

434

do was chomen brvnnhilt | gewaffent man di vant

sam ob si solde striten | vmb elliv chvniges lant

ia trvch si ob den siden | vil manigen goldes zein

ir minnechliche varwe | darvnder vil herliche schein

435

do chom ir gesinde | di trvgen dar ce hant

von al rotem golde | einn schildes rant

mit stahele herte spangen | vil michel vnt breit

darvnder spilen wolde | div minnechlichiv meit

436

der vrowen schiltvezel | ein edel porte was

darvffe lagen steine | grvne sam ein gras

der lvhte maniger hande | mit schine wider daz golt

er mvste wesen vil chvne | dem div vrowe wurde holt

437

der schilt was vnder bvkeln | als vns daz ist gesaget

wol drier spannen diche | den solde tragen div maget

von stahel vnt ovch von golde | rich er was genvch

den ir chamaeraere | selbe vierde chvme trvch

438

also der starche hagene | den schilt dar tragen sach

mit grimmigem mvte | der helt von tronege sprach

wa nv chvnich gvnther | wie vliese wir den lip

der ir da gert ce minnen | div ist des tivels wip

439

vernemt noch von ir waete | der haete si genvch

von azagovch der siden | einen waffenroch si trvch

edel vnt riche | ab des varwe schein

von der chvneginne | vil manich herlicher stein

440

do trvch man der vrowen | vil swaere vnd groz

einen ger vil scharpfen | den si alle cite schoz

starch vnt vngefvge | michel vnt breit

der ce sinen ecken | vil harte vreislichen sneit

441

von des geres swere | horet wunder sagen

wol vierdehalbiv messe | was darzv geslagen

den trvgen chvme drie | brvnhilde man

gvnther der edele | vil harte sorgen began

442

er dahte in sinem mvte | waz sol diz wesen

der tivel vz der helle | wi chvnd er davor genesen

wer ich ce bvrgenden | mit dem lebene min

si mvste hie lange | vri vor miner minne sin

443

do sprach hagen brvder | der chvene danchwart

mich riwet innechlichen | disiv hovevart

nv hiezen wir ie rechken | wi verliese wir den lip

svln vns in disen landen | nv vberwinden div wip

444

mich mvet daz harte sere | daz ich chom in diz lant

vnt haete min brvder hagene | sin waffen an der hant

vnt ovch ich daz mine | so mohten sampfte gan

mit ir vebermvete | alle prvnnhilde man

445

daz wizzet sicherlichen | si soldenz wol bewarn

vnt haet ich tvsent eide | ce einem vride gesworn

e daz ich sterben saehe | den lieben herren min

ia mvese den lip verliesen | daz vil schone magedin

446

wir solden vngefangen | wol rvomen diz lant

sprach do sin brvoder hagene | vnt heten wir daz gewant

des wir ce der not bedvrffen | vnt ovch div swert vil gvt

so wurde wol gesenpftet | der starchen vrowen vbermvt

447

wol hort div maget edele | waz der daegen sprach

mit smilendem munde | si veber ahsel sach

nv er dvnche si so chvene | so traget in ir gewant

ir vil scharpffen waffen | gebet den recken an di hant

448

do si div swert gewunnen | also div maget gebot

der vil chvne danchwart | vor vrevden wart vil rot

nv spilen swes si wellen | sprah der vil snelle man

gvnther ist vmbetwungen | sit daz wir vnser waffen han

449

div prvnnhilde sterche | vil grozliche schein

man trvch ir zv dem ringe | einen swaeren stein

groz vnt vngefvge | vil michel vnt wel

in trvgen chvme zwelfe | helde chvne vnt snel

450

den warf si zallen ziten | do si den ger vershoz

der bvrgenaere sorge | wurden harte groz

waffen do sprach hagen | waz hat der kvnich ce trvt

ia sol si in der helle sin | des vebeln tivels brvt

451

an vil wizzen armen | | si di ermel want

si begonde vazzen | den schilt an der hant

den ger si hoch zvchte | do giench iz an den strit

gvnther vnt sifrit | di vorhten prvnnhilde nit

452

vnt waere im sifrit | niht ce helffe chomen

so hete si dem chvnige | sinen lip benomen

er gie dar tovgenliche | vnt rvrt im sine hant

gvnther sine liste | vil sorchenlich ervant

453

waz hat mich gervret | dahte der chvne man

do sach er allenthalben | vnt vant da niemen stan

er sprach ich pinz sifrit | der liebe vrivnt din

vor der chveneginne | soltv gar an angest sin

454

den shilt gip mir von hende | vnt laze mich den tragen

vnt merche rehte | waz dv mich hores sagen

nv hab dv di gebaere | div werch wil ich began

do er in reht erchande | ez was im liebe getan

455

nv hil dv mine liste | di ne soltv niemen sagen

so mach div chvneginne | vil lvecel iht beiagen

an dir deheines rvomes | des si doh willen hat

nv sihtv wi div vrowe | vor dir vnsorchlichen stat

456

do shoz vil chrepftechliche | div herlichiv meit

vf einen schilt niwen | michel vnt breit

den trvch an siner hende | daz sigelinde chint

daz fiwer spranch von stahele | als ez waete der wint

457

des starchen geres snide | al dvrch den schilt gebrach

daz man di fiwer lovgen | vz den ringen sach

des shvzzes beide strvochten | di crepftigen man

wan div tarnkappe | si waeren tote da bestan

458

sifride dem vil chvenen | von munde brast daz plvt

vil balde spranch er widere | do nam der helt gvt

den ger den si geschozzen | haete dem helde dvrch den rant

den frvmte ir do hin widere | des starchen sifrides hant

459

er dahte ich wil niht schiezen | daz schone magedin

er cherte des geres snide | hinder den rvcke sin

mit der gerstangen | er shoz vf ir gewant

daz ez erchlanch vil lvote | von siner ellenthaften hant

460

daz fiwr stovp vz ringen | alsam ez tribe der wint

den shuz den shoz mit ellen | daz sigmvndes chint

si ne moht mit ir crefpten | des shvzes niht gestan

ez en haete der chvnich gvnther | triwen niemer getan

461

prvnnhilt div schone | vil balde si vf gespranch

gvnther ritter edele | des shvzzes habe danch

si want er hetez | mit siner chrapft getan

ir was darnach geslichen | ein verre crehftiger man

462

do gie si hin vil balde | vil zornech was ir mvt

den stein hvop vil hohe | div edel magt gvt

si swanch in crepftechliche | vil verre von der hant

do spranch si nach dem wurffe | ia erclanch ir allez ir gewant

463

der stein der was gevallen | wol zwelf clafter dan

den wurf den brach mit sprvnge | div maget wolgetan

dar gie der herre sifrit | da der stein gelach

gvnther in do wegte | der helt in werffene pfalch

464

sifrit der was chvne | vil crepftech vnt vil lanch

den stein den warf er verrer | darzv er witer spranch

von sinen schonen listen | er hete crapft genvch

daz er mit dem sprvnge | den chvnich gvnthere doh truch

465

der sprvnch der was ergangen | der stein der was gelegen

do sach man ander niemen | wan gvnther den degen

prvnnhilt div schone | div wart in zorne rot

sifrit haete geverret | des chvnich gvntheres tot

466

zv zir ingesinde | ein teil si lvte sprach

do si gvntheren cent des ringes | wol gesvnden sach

vil balde chvmt her naher | ir mage vnt mine man

ir svlt dem chvnige gvnther | alle wesen vndertan

467

do leiten di vil chivnen | div waffen von der hant

si bvten sich ce fvzen | vz bvrgvnden lant

gvnther dem richen | vil manich chvene man

si wanten daz er haete | div spil mit siner crapf getan

468

er grvztes minnechliche | ia was er tvgende rich

do nam in bi der hende | div magt lobelich

si erlovbte im daz er da solde | haben gewalt

des frevte sich do hagene | der daegen chvne vnt balt

469

si bat den ritter edele | mit ir dannen gan

in den palas witen | also daz wart getan

do erbot man ez den recken | mit dienste baz

danchwart vnt hagene | di mvsenz lazen ane haz

470

sifrit der snelle | wise was genvch

sine tarenkappen | er abe behalten trvch

do gie er hine wider | da manich vrowe saz

er sprach zv dem chvnige | vnt tet vil wisliche daz

471

wes pitet ir min herre | wan beginnet ir der spil

der iv div chvneginne | teilet also vil

vnt lat vns balde schowen | wi div sin getan

sam ers niht en wesse | gebarte der listege man

472

do sprach div chvniginne | wi ist daz geschen

daz ir habt her sifrit | der spil niht gesehen

div hie hat errvngen | div gvntheres hant

des antwurte in hagene | vzer bvrgvnden lant

473

er sprach da hete ir vns vrowe | betrivbet den mvt

do was bi dem scheffe | sifrit der helt gvt

do der vogt von rine | div spil iv an gewan

des ist ez im vnchvnde | sprach der gvntheres man

474

do wol mich dirre maere | sprach sifrit der daegen

daz iwer hochvart | ist also hie gelaegen

daz iemen lebet der iwer | meister mvege sin

nvo svlt ir magt edele | vns hinnen volgen an den rin

475

do sprach div wolgetane | des en mach niht ergan

ez mivezen e bevinden | mage vnt mine man

ia ne mag ich also lihte | gervmen minvo lant

di mine besten frivnde | werden e besant

476

do hiez si boten riten | allenthalben dan

si besande ir vrivnde | mage vnd man

di bat si ce isensteine | chomen vnerwant

vnt hiez in allen gaeben | rich vnt herlich gewant

477

si ritten taegeliche | spate vnt vrv

der prvnnhilde bverge | scharhaft zv

iara ia sprach hagene | waz haben wir getan

wir rebeiten hie vil vebele | der schonen prvnnhilde man

478

so si nv mit ir chrepfte | choment in daz lant

der chvneginne wille | ist vns vnbechant

waz ob si also zvrnet | daz wir sin verlorn

so ist vns div magt edele | ce grozzen sorgen geborn

479

do sprach der starche sifrit | daz sol ich vndersten

des ir da habt sorge | des laz ich niht ergen

ich sol iv helffe bringen | her in diz lant

vil erwelten rechen | die iv noch nie wurden bechant

480

ir svlt nach mir niht vragen | ich wil hinnen varn

got mievz iwer ere | di zit wol bewarn

ich chvm schiere wider | vnt bringe tvsent man

der allerbesten daegene | der ich ie chvende gewan

481

do ne sit et niht ce lange | sprach der chvenich do

wir sin iwerr helffe | vil pillichen vro

er sprach ich chvm wider | in vil chvrcen tagen

daz ir mich habt gesendet | daz svlt ir prvnnhilde sagen