Der Nibelunge Nôt

24. Aventiure

___________________________________________________

Aventivre wie die boten ze rine qvamen

vnd wie si danne schieden

1422

Do ecel zv dem rine | sine boten sande

do flvgen disiv maere | von lande ze lande

mit boten harte snellen | er bat vnd ovch gebot

zv siner hohgecite | des holte maniger da den tot

1423

di boten dannen fvren | vzer hivnen lant

zv den bvrgonden | dar waren si gesant

nach drin edeln kvenegen | vnd ovch nach ir man

si solden chomen ecele | des man do gahen began

1424

hin ze bechelaren | chomen si geritten

da diente man in gerne | daz en wart da niht vermiten

rvedeger sinen dienest | enbot vnd gotelint

bi in hin ze rine | vnd ovch ir beider liebez chint

1425

si ne liezens ane gabe | von in niht scheiden dan

daz deste baz gefveren | di ecelen man

vten vnd ir chinden | enbot do rvedeger

si ne heten in so waege | deheinen margraven mer

1426

sin enbvten ovch prvnhilte | dienest vnd gvt

staetechliche triwe | vnd willigen mvet

do si di rede vernamen | di boten wolden varn

si bat div margravinne | got von himele bewarn

1427

e daz di boten chomen | wol dvrch peyrlant

waerbel der vil snelle | den gvten bisschoff vant

waz der do sinen frivnden | hin ce rine enbot

daz ist mir niht gewizen | niwan sin golt also rot

1428

gap er den boten ze minne | riten er si lie

do sprach der bissof bilgrim | vnde sold ich si sehen hie

mir waere wol ce mvte | di swestersvene min

wand ich mach vil selten | zv zin chomen an den rin

1429

welhe waege si fveren | ce rine dvrch div lant

des chan ich niht bescheiden | ir silber vnt gewant

daz nam in niemen | man vorht ir herren zorn

ia was gewaltech | der edele chvnech wol geborn

1430

inner tagen zwelfen | chomens an den rin

ze wormez zv dem lande | waerbel vnd swemmelin

do sagt man div maere | den chvenegen vnd ir man

do chomen boten vremde | gventher do vragen began

1431

do sprach der vogt von rine | wer tvt vns daz bechant

von wannen dise vremden | riten in daz lant

daz en wesse niemen | vnze daz si sach

hagen von tronege | do ce gventhern sprach

1432

vns choment niwiv maere | des wil ich iv veriehen

di eceln videlaere | di han ich hie gesehen

si hat iwer swester | gesendet an den rin

si sveln vns dvrch ir herren | groze willechomen sin

1433

si ritten al bereite | fver den palas dan

ez gefvren nie herlicher | fversten spileman

des chveneges ingesinde | enpfiengen sa cehant

man gap in schoen herberge | vnt hiez behalten ir gewant

1434

ir reisechleider waren | rich vnd so wolgetan

ia mohten si mit eren | fver den kvenich gan

der en wolden si niht mere | da ce hove tragen

ob ir iemen rvchte | di boten hiezen iz da sagen

1435

in der selben maze | man ovch livte vant

di ez vil gerne namen | den wart ez gesant

do leiten an di geste | verre bezer wat

als ez boten chvenege | ce tragen herliche stat

1436

do gie mit vrlovbe | da der kvenech saz

daz eceln gesinde | gerne sach man daz

hagen zvetechliche | gegen den boten spranch

vnt enpfie si minnechliche | des sageten im di knappen danch

1437

dvrch div chvnden maere | vragen er began

wi sich ecel gehabte | vnd sine man

do sprach der videlaere | daz lant gestvnt ni baz

noch so vro di livte | nv wizzet endechliche daz

1438

si giengen zv dem wirte | der palas der was vol

do enpfie man di geste | so man von rehte sol

so gvetlichez grvezen | in ander chvenige lant

waerbel vil der recken | da bi gvnthern vant

1439

der chvenech gezogenliche | grvzen si began

sit willechomen ir beide | ir hivnen spilman

vnd iwer hergesellen | hat ivch her gesant

ecel der vil riche | zv der bvrgonden lant

1440

si nigen dem chvnige | do sprach waerbelin

dir enbivtet holden dienest | der liebe herre min

vnd criemhilt din swester | her in dize lant

si habent vns iv recken | vf gvte triwe gesant

1441

do sprach der kvenech riche | der maere bin ich vro

wi gehabt sich ecel | so vragt der degen do

vnd criemhilt min swester | vzzer hivnen lant

do sprach der videlaere | div maere tvn ich iv bechant

1442

daz sich noch nie gehabten | deheine livte baz

danne si sich gehabent beide | wizzet daz

vnd allez ir gedigene | di mage vnd ovch ir man

si vrevten sich der verte | do wir schieden von dan

1443

genade siner dieneste | di er mir enboten hat

vnd miner swester | sit ez also stat

daz si lebent mit frevden | der kvenech vnd sine man

wand ich doh der maere | gefragt sorgende han

1444

di zwene ivnge chvenege | di waren ovch nv chomen

si heten disiv maere | alrerst do vernomen

dvrch siner swester liebe | di boten gerne sach

giselher der ivnge | zv zin minnechlichen sprach

1445

ir boten soldet vnz groze | willechome sin

ob ir dicher woldet | her riten an den rin

ir fvendet hie di frivnde | di ir gerne moehtet sehen

iv solde hie ce lande | vil wenich leides geschehen

1446

wir triwen iv aller eren | sprach do swemmelin

ine chonde iv niht bedivten | mit den sinnen min

wi rehte minnechlichen | iv ecel enboten hat

vnt iwer edel swester | der dinch in hohen eren stat

1447

genade vnde triwe | mant ivh des kveneges wip

vnt daz ir ie was waege | iwer herce vnt iwer lip

vnt ce vorderste dem chvenege | sin wir her gesant

daz ir gervchet riten | in daz eceln lant

1448

daz wir ivch des baeten | vil vast vns daz gebot

ecel der riche | iv allen daz enbot

ob ir ivch iwer swester | niht sehen woldet lan

so wold er doch gerne wizzen | waz er iv hete getan

1449

daz ir in also vremdet | vnt ovch siniv lant

ob iv div chveneginne | waere ni bechant

so moeht er doch verdienen | daz ir in rvchet sehen

swenne daz ergienge | so waer im liebe geschehen

1450

do sprach der chvenech gvnther | veber dise siben naht

so chvend ich div maere | wes ich mich han bedaht

mit den minen frivnden | di wile svlt ir gan

in iwer herberge | vnd svelt vil gvote ruwe han

1451

do sprach aber waerbelin | vnt moeht daz geschehen

daz wir mine vrowen | chonden e gesaehen

vten di vil richen | e wir schveffen vns gemach

giselher der edele | do vil zvehtechlichen sprach

1452

daz sol iv niemen wenden | welt ir fver si gan

ir habt miner mvter | willen gar getan

want sie sihet ivch gerne | dvrch di swester min

vrovn criemhilden | ir svlt ir willechomen sin

1453

giselher si brahte | da er di vrowen vant

di boten sach si gerne | von der hivnen lant

si grvztes minnechliche | dvrh ir tvgende mvt

do sagten ir div maere | di boten hoffsh vnde gvt

1454

ia enbivtet iv min vrowe | so sprach swemmelin

dienest vnde triwe | mohte daz gesin

daz si ivch diche saehe | ir svlt gelovben daz

so waer ir in der werlde | mit deheinen vrevden baz

1455

do sprach div chveneginne | des en mach niht gesin

swie gerne ich dicke saehe | di lieben tohter min

so ist mir leider ce verre | des edeln chveneges wip

nv si immer saelich | ir vnd eceln lip

1456

ir svlt mich lazen wizen | e irz gervmet hie

wenne ir wider wellet | ine gesach so gerne nie

boten in langen ziten | denne ich ivch han gesaehen

di chnappen ir do lobten | daz si daz liezen geschehen

1457

zen herbergen fvren | di von hivnen lant

do het der kvenech riche | nach frivnden sin gesant

gventher der edele | vragte sine man

wi in div rede geviele | vil maniger do sprechen began

1458

daz er wol moehte riten | in eceln lant

daz rieten im di besten | di er da vnder vant

ane hagen eine | dem was ez grimme leit

er sprach zem kvenige tovgen | ir habt iv selben widerseit

1459

nv ist iv doch gewizen | waz wir haben getan

wir mvegen immer sorge | zv criemhilde han

wand ich slvch ze tode | ir man mit miner hant

wie getorste wir riten | in daz eceln lant

1460

do sprach der kvnech riche | min swester lie den zorn

mit chvsse minnecliche | si hat vf vns verchorn

daz wir ir ie getaten | e si von hinnen reit

ez en si et hagen | danne iv einem widerseit

1461

nv lat ivch niht betragen | sprach hagene swes si iehen

di boten von den hivnen | welt ir criemhilde sehen

ir mvegt da verliesen | di ere vnd ovch den lip

ia ist vil lanchraeche | des kvenech eceln wip

1462

do sprach zv dem rate | der fverste gernot

sit ir von schvlden | fverhtet da den tot

in hivnisschen richen | solde wirz darvmbe lan

wir en saehen vnser swester | daz waere vil vbele getan

1463

do sprach der fverste giselher | zv dem degene

sit ir ivch schvldech wizet | frivnt hagene

so svlt ir hi beliben | vnt ivch wol bewarn

vnd lazet di getverren | zv miner swester mit vns varn

1464

do begonde zvernen | von tronege der degen

ine wil daz ir iemen | fverhtet vf den wegen

der getverre riten | mit iv ce hove baz

sit ir niht welt erwinden | ich sol iv wol erzeigen daz

1465

do sprach der cvchenmeister | rvmolt der degen

der vremden vnt der chvnden | mohtet ir wol heizen pflegen

nach iwer selbes willen | wand ir habet vollen rat

ich waene niht daz hagene | ivch noch vergiselt hat

1466

welt ir niht volgen hagene | iv raetet rvmolt

wand ich iv bin mit triwen | vil dienestlichen holt

daz ir svlt hi beliben | dvrch den willen min

vnde lat den kvenech ecel | dort bi criemhilde sin

1467

wi chvnde iv in der werlde | immer sanfter wesen

ir mvegt vor iwern finden | harte wol genesen

ir svlt mit gvten chleidern | zieren wol den lip

trinchet win den besten | vnt minnet waerltlichiv wip

1468

darzv git man iv spise | di besten di e gewan

in der werlt kvenech deheiner | ob des niht moeht ergan

ir soldet noh beliben | dvrch iwer schoene wip

e ir so chintliche | soldet wagen den lip

1469

des rat ich beliben | rich sint iwer lant

man mach iv baz erloesen | hie heime div pfant

danne da cen hivnen | wer weiz wie iz da gestat

ir svlt beliben herren | daz ist der rvmoldes rat

1470

wir wellen niht beliben | sprach do gernot

sit daz vns min swester | so minnechlich enbot

vnt ecel der riche | zwiv solde wir daz lan

der dar niht gerne welle | der mach hi heime bestan

1471

des antwurte hagene | lat ivh vnblinden niht

mine rede darvmbe | swi halt iv geschit

ich rat iv an den triwen | welt ir ivch bewarn

so svlt ir zv den hivnen | vil gewaerliche varn

1472

sit ir niht welt erwinden | so besendet iwer man

di besten di ir vindet | oder inder mveget han

so wel ich vz in allen | tvsent ritter gvt

so ne mag iv niht gewerren | der argen criemhilde mvt

1473

des wil ich gerne volgen | sprach der kvenech zehant

do hiez er boten riten | witen in siniv lant

do brahte man der helde | driv tvsent oder mer

si ne wanden niht ce rwerben | also grozlichiv ser

1474

si ritten vroeliche | in gventheres lant

man hiez in allen geben | ross vnt ovh gewant

di da varen solden | von bvergonden dan

der kvenech mit gvtem willen | der vil manegen gewan

1475

do hiez von tronege hagene | danchwart der brvder sin

ir beider rechen ahzech | fveren an den rin

di chomen ritterliche | harnassh vnt gewant

fvrten di vil snellen | in daz gvntheres lant

1476

do chom der chvene volker | ein edel spilman

zv der hovereise | mit drizech siner man

di heten soelech gewaete | ez moeht ein chvenech tragen

daz er zen hivnen wolde | daz hiez er gventhere sagen

1477

wer der volker waere | daz wil ich ivch wizen lan

er was ein edel herre | im was ovch vndertan

vil der gvten rechen | in bvrgonden lant

dvrch daz er videln chonde | do was er der spilman genant

1478

hagen welte tvsent | di het er wol bechant

vnt swaz in starchn striten | gefrvemt het ir hant

oder swaz si ie begiengen | des het er vil gesehen

den chonde anders niemen | niwan frvemcheite iehen

1479

di boten criemhilde | vil sere da verdroz

wande ir vorhte cir herren | div was harte groz

si gerten taegeliche | vrlovbes von dan

des en gonde in niht hagene | daz was dvrch liste getan

1480

er sprach zv sinem herren | wir sveln daz bewarn

daz wir si lazen riten | e daz wir selbe varn

darnach in siben tagen | in eceln lant

treit vns iemen argen villen | deist vns deste baz bechant

1481

so ne mach ovch sich vrov criemhilt | bereiten niht darzv

daz vns dvrh ir rate | iemen schaden tv

hat aber si den willen | ez mach ir leide ergan

wir fveren mit vns hinnen | so manigen vzerwelten man

1482

schilde vnd saetele | vnt allez ir gewant

daz si fveren wolden | in eceln lant

daz was bereitet nv gar | vil manigem chvenem man

di boten criemhilde | hiez man fver gvntheren gan

1483

do di boten chomen | do sprach gernot

der kvenech wil gevolgen | des vns ecel her enbot

wir wellen chomen gerne | ce siner hohgecit

vnd sehen vnser swester | daz ir des ane zwifel sit

1484

do sprach der kvenech gventher | chvennet ir vns gesagen

wenne si div hohzit | oder in welhen tagen

wir dar chomen solden | do sprach swemmelin

cen naehesten svenewenden | sol si waerliche sin

1485

der kvenich in erlovbte | des was noh niht geschehen

ob si wolden gerne | frovn prvennhilde sehen

daz si fver si solden | mit sinem willen gan

daz vnderstvnt do volker | daz was ir liebe getan

1486

ia ne ist min vrowe prvennhilt | nv niht so wol gemvt

daz ir si mveget schowen | sprach der ritter gvt

bitet vnz morgn | so lat mans ivch sehen

do si sie wanden schowen | do ne chvndes niht geschehen

1487

do hiez der fverste riche | er was den boten holt

dvrch sine selbes tvgende | tragen dar sin golt

vffe den breiten schilden | der moht er vile han

ovch wart in richiv gabe | von sinen vrivnden getan

1488

giselher vnd gernot | gere vnd oertwin

daz si ovch milte waren | daz taten si wol shin

also riche gabe | bvten si di boten an

daz si se vor ir herren | niht getorsten enpfan

1489

do sprach zv dem kvenige | der bote waerbelin

her kvenich lat iwer gabe | hi ze lande sin

wir mvegen ir doch niht fveren | mine herre iz vns verbot

daz wir iht gabe naemen | ovch ist es harte lvecel not

1490

do wart der vogt von rine | davon vil vngemvt

daz si versprechen wolden | so riches kveneges gvt

doch mvosen si enpfahen | sin golt vnd sin gewant

daz si mit in fvorten | sit in ecelen lant

1491

si wolden sehen vten | e si schieden dan

giselher der snelle | der braht di spileman

fver sine mvoter vten | div vrowe enbot von dan

swaz si ern hete | daz waer ir liebe getan

1492

do hiez div chveneginne | ir porten vnd ir golt

geben dvrch criemhilde | want der was si holt

vnt dvrch den kvenech ecel | den selben spileman

si mohtenz gern enpfahen | ez was mit triwen getan

1493

vrlovp genomen heten | di boten nv von dan

von wiben vnd von mannen | vroelich si do dan

fvoren in ce swaben | dar hiez si gernot

sine helde leiten | daz ez in niemen missebot

1494

do sich di von in schieden | di ir solden pflegen

herschaft div eceln | vridet vf allen wegen

des en nam in niemen | ross noch ir gewant

si ilten harte balde | in daz ecelen lant

1495

swa si der vrivnt iht wessen | daz taten si den chvnt

daz di bvrgonden | in vil chvrzer stvnt

choemen her von rine | in der hivnen lant

dem bissoffe pilgerime | wart ovch daz maere bechant

1496

da si fver bechelaren | di straze nider ritten

man saget ez rvedger | daz en wart niht vermitten

vnde gotelinde | des margraven wip

daz si si sehen solde | des wart vil vroelich ir lip

1497

gahen mit den maeren | sah man di spilman

eceln si fvnden | in der stat ze gran

dienest veber dienest | der man im vil enbot

sageten si dem kvenige | vor liebe wart er frevden rot

1498

do div chveneginne | div maere reht ervant

daz ir brvder solden | chomen in daz lant

do was ir wol ce mvte | si lonte den spileman

mit vil grozer gabe | daz was ir ere getan

1499

si sprach nv sagt beide | waerbel vnd swemmelin

welhe mine mage | cer hohzit wellen sin

der besten di wir ladeten | her in dize lant

nv sagt waz redete hagene | do er div maere bevant

1500

er sprach der chom cer sprache | an einem morgen frv

lvecel gvter sprveche | redet er derzv

do si di reise lobten | her in hivnen lant

daz was dem grimmem hagene | gar cem tode genant

1501

ez chvment iwer brvder | di chvenige alle dri

in herlichem mvote | swer mer damite si

der maere ich enedechlichen | wizzen nine chan

ez lobt mit in riten | volker der chvene spileman

1502

des enbaer ich harte lihte | sprach des kveneges wip

deich immer saehe | den volkeres lip

hagenen bin ich waege | der ist ein helt vil gvt

daz wir in saehen mvezen | des stat mir hohe der mvt

1503

do gie div chveneginne | da si den kvenech sach

wi rehte minnechliche | criemhilt do sprach

wi gevallent iv div maere | lieber herre min

des ie min wille gerte | daz sol nv verendet sin

1504

din wille deist min vrevde | sprach der kvenich do

ine wart min selbes mage | ni so rehte vro

ob si iemer chomen solden | her in miniv lant

dvrh liebe diner frivnde | so ist min sorge verswant

1505

des chveneges ammetlivte | di hiezen veber al

mit gesidele rihten | palas vnd sal

gegen den lieben gesten | di in da solden chomen

sit wart von in dem chvenege | vil michel weinen benomen