BIBLIOTHECA AUGUSTANA

 

Boppe

um 1285

 

 

Sprüche

 

___________________________________________________

 

 

 

6.

 

Cod. Pal. germ. 848, 418v/419r

Universitätsbibliothek Heidelberg

 

 

In Idumea wont ein tier Taphart genant,

daz ist von wunderlichen Sachen zwein erkant,

vor allen vrechen tieren uzgesundert:

daz selbe tier vor mittem tage der kuenheit pfliget,

5

daz aller tiere kuenheit klein dergegen wiget

unde ouch des löuwen, swie der staete wundert;

swenne ez kumt über mitten tak,

so wirt sin vrechiu kuenheit also kleine,

daz ez sich niht erretten mak

10

vor zageheit, swaz lebt in der gemeine:

sich, junger man, daz tiutet dich,

daz merke, unt nim'z in dines herzen klosen,

ja dise rede wunderlich

die enhabe niht vür smeichen noch vür losen:

15

ez hat mit dir unt du mit im so guoter maze pfliht,

nu schaffe also in diner jugent,

daz iht din mugent,

din vrecher lip, werde in dem alter, als daz tier, ze nihte.