Sprüche

___________________________________________________

15.

Cod. Pal. germ. 848, 419v

Universitätsbibliothek Heidelberg

Sich, ritter wert, an dine hohe werdekeit

unt kleide dinen werden lip mit eren kleit,

sit daz dir ist ere unde pris gewidemet;

pflik schiltes amptes schone unt ere swertes segen,

5

bis vridebaere in velden, weiden unt uf wegen,

wirp so, daz unreht struchen vor dir bidemet;

milt' unde manheit si din hort,

biut helfe gerne witwen unde weisen,

wirp hie nach prise unt schazze dort

10

unt la dich niht an eren vinden heisen;

du tugende dich in alle wis,

la dich in werder wibe dienste schouwen,

halt hoch gelopten ritters pris,

so daz dich prisen hoch geborne vrouwen;

15

erbarme, warheit, kiusche, schame mit dir sin ümbe helset:

tuostu daz, werder ritter wis,

so wirt din pris,

din rilich lop, din werder name in eren wis gevelset.