BIBLIOTHECA AUGUSTANA

 

Sente Elsebede leben

nach 1297

 

 

Von sente Elsebede

der heilegen frouwe

 

___________________________________________________

 

 

 

Hie get ane

sente elsebede leben

 

[2b]

In Duringer lande ein fürste saz,

Der sich gar selten ie vergaz

An dugenden joch an eren.

Sin herze in kunde leren

75

Vnde ouch sin ellenthafter můt,

Daz er kost unde ander gůt

Gab wol mit rilicher hant.

Er hatte burge, kreftec lant

Vnde da zů herren gulte vil.

80

Er sach gar gerne ritter spil.

Er was geheizen Herman,

Wan er ein kreftec her gewan

Wie balde daz er wolde,

Alse er ez haben solde.

85

Sin name flŏg uz verre.

Lantgrave was der herre

In Duringen, als üch ist geseit.

Die lude waren sin gemeit

Unde siner wirdekeide fro,

90

Wande sin gemůde stůnt also,

Daz er in fride mahte

Unde ungenade abe lahte;

Dugent was im ungespart.

Sin kunne was von hoher art:

[3a]

Der kunic von Beheimer lant,

Der Odacker was genant

(Der leider wart irslagen sint),

Unde er die waren suster kint.

Waz sulde langer rede me?

100

Der herre hatte zů der e

Eine dugenthafte frŏwen.

Ir lob was unferhouwen:

Si was nach frouwelicher art

An hohen eren angespart.

105

Ir name was Sophie.

Die edel unde die frie

Hatte frouweliche side:

Ir wonte zucht unde ere mide

Alse einer frouwen rechte quam,

110

Di eime fursten wol gezam

Zu flezze unde ouch zu bette,

Di sinen rat begette

An allen dingen rehte.

Ritter unde knehte

115

In waren dienstes vnderdan

Wie dicke si iz selten han.

Ir schibe lief gar ebene:

In zeme noch zu lebene

[3b]

Mit einander ummer me.

120

Fruntliche bilden si ir e,

Gnade was in unferzihen.

Nach wunsche hatte in got verlihen

Einen keiserlichen sun.

Geboren an daz furstendun:

125

Der was geheizen Lodewig.

Er wůs uf alse ein meienzwig

In siner kintlichen jugent.

Zucht unde ere unde alle dugent

Nach furstelichen eren

130

Hiz in der vader leren,

Alse er hat bezoget sint.

Noch hatten si dru ander kint,

Cůnraden unde Heinrich

Unde eine dochter lobelich,

135

Di was geheizen Agnes.

Si beide frouweten sich des

Gar gedruweliche.

Der werde furste riche

Was zn koste swinde:

140

Groz was sin ingesinde

Von knehten unde von magen,

Die sin mit dienste plagen.

[4a]

Er hatte wirtschaft allen dac.

Der furste ouch hoves dicke plac,

145

Daz in di herren sůchten,

Di bi ime ouch gerůchten

Zu dribene kurzewile.

Verre über manige mile

Quam ime ritterschefte gnůc,

150

Die alle ir eigen wille drůc,

Daz si gerne quamen dar

Unde aventure namen war.

Man sůchte den wiganden

Uz allen tuschen landen.

155

Ungere unde Ruzen,

Sassen unde Pruzen,

Denen mit den Winden

Sich liezen ouch da vinden,

Beheime unde Polane,

160

Mit graven di sopane,

Dinstherren unde frien vil,

Di alle sůchten ritter spil.

Stechen, justieren,

Foresten unde durneren,

165

Wes man zů ritterschefte gert,

Des was man alles da gewert.

[4b]

Da was ouch manic hubes man:

Des sinen dirre unde der began,

Wes man vor herren plegen sol.

170

Der fidelte uzer der mazen wol,

Der slůc die drumen, dirre peif.

Der ander sůze wise greif

An harpen unde an rotten.

Fransose unde Schotten,

175

Dutsche unde anders ieder man

Sin ammet wisen da began

Unde irzougen sine kunst.

Si sůchten garliche alle gunst

Der fursten unde der frien.

180

Man horte da schalemien,

Da schullen die busunen.

Man sach da pauwelunen,

Manie keiserlich gezelt

Uf geslagen an daz felt,

185

Dar under herren lagen

Wanne si raste plagen.

Noch was da maniger leige diet.

Die sprachen, dise sungen liet,

Daz man in meisterschefte jach:

190

Her Wolfram von Essebach,

[5a]

Der tugenthafte schriber,

Her Reimar unde her Walter

Von der Vogelweide;

Da bi was ouch gereide

195

Zu sange meister Bitterolt

Unde in gefuger ungedolt

Heinrich von Ofterdingen:

Die alle wolden singen

Wider ein in kriges wis,

200

Wer da behilde sanges pris.

 

Nu was ouch meister Clinsor

Geladen an die selben for

Von Sibenburge uz Ungerlant,

Deme aller dinge was bekant

205

Die nigromanzie.

Uz astronomie

Kunde er schone meisterschaft.

Aller elementen craft,

Der sunnen langen ummesweif,

210

Des manen zirkel unde reif,

Orizon unde zodiacus

Unde ouch der polus articus,

Des firmamentes ummeganc,

Der planeten widerfanc

215

Unde aller sterren orden

[5b]

Suden unde norden,

Osten unde westen,

Des hatte er keinen bresten:

Er kente ez alles sament gar.

220

Nu was er iezu kumen dar

Zů Isenache al in di stat.

Zu hove er dannoch nit indrat:

Ein herburge er suchte,

Da inne ouch he gerůchte,

225

Alse er hatte sich erwegen,

Gemaches sunderliche plegen.

Von gulte was er riche:

Er hatte jerliche

Wol dru dusent marke wert.

230

Er hatte zere unde eigen pert;

Mit selbes ingesinde

Was er zů koste swinde.

 

So er nu zu saze quam,

Des dages lieht ein ende nam.

235

Zu dal di sunne was genigen

Unde der abent zu gesigen,

Biz er sich engeste

Unde ouch ein deil gereste.

So man daz abentimmez gaz,

[6a]

Her Clinsor an den luft gesaz.

An daz weder durch gemach.

Der sterren louf er da gesach.

He sach dar unde aber dar.

Er nam ir aventure war.

245

Ir ampare he gar balde entsůb,

Do sich ir parlament erhůb,

Daz si driben under ein.

Der sterre enbran unde dirre schein:

So luchte der gar schone

250

An sime stadelthrone.

Mit flize er warten in began.

Zu jungest sprach ein edel man,

Der ime was gesezzen bi:

„Ei meister, saget waz iz si,

255

Des ir goume hat genomen?

Hat ir nüwes icht vernomen?

Obe iz si an üwer stade,

Iz si gefurlich oder schade,

So lat uns, herre, werden kunt

260

Den selben wunderlichen funt

Unde den godelichen rat,

Des ir goume genomen hat

An der sterren brunste.

[6b]

Wol üch der werden kunste,

aob Die godes willen unde můt

Uch, meister herre, wizzen důt.“

Her Clinsor smunzete unde sprach

„Got buze üch, herre, uwe ungemach

Unde allen üwen werren.

270

Ich han an disen sterren

Erkoren nuwe mere,

Die sint unschadebere.

Doch alles, daz ich han gesehen.

Des wil ich, herre, üch verjehen

275

Unferholen uber lut.

Iz sol min frouwe Gerdrut,

Von Ungerlant di kunegin.

Noch hint in dirre nacht gelin.

Eine here dochter si gebirt,

280

Di ein ewic luchte wirt,

Ein heilwag ande ein wůnne,

Ein Spiegel in ir kunne.

So diz dinc also erget,

Man doufet si Elizabet.

285

Si sal gar dugentliche leben.

Zu lande wirt si her gegeben

Des fursten sune in dirre stede.“

[7a]

„Heil walde is! daz sint gůde rede“,

Sprachen alle hine do,

290

Di dirre sache waren vro.

 

Diz was ein here volleist,

Daz unser herre sinen geist

Hern Clinsoren sante,

Daz er di sache irkante

295

An der sterren gange

For hine alse lange.

Der heiden prister Balaam

Godes willen ouch vernam

Von unsers herren kunfte,

300

Di er uz der vernunfte

In drostlicher warheit

Hat den luten for geseit,

Sam in der e geschriben stet.

Alsus ist frouwe Elizabet

305

Den luden sunder allen wan

Ouch godeliche kunt gedan.

 

Diz was alles in der zit,

Da die fursten wider strit

In freissamer drunege

310

Erhuben zwene kunege,

Geboren bede an furstendůn,

[7b]

Herzogen Heinriches sun

Von Sassen unde Beierlant

(Otto was sin name erkant:

315

Des kure was doch umme sus);

Der ander hiez Philippus,

Ein herzoge uze Swaben,

Der sider wart zů Baben-

Berg undruweliche irslagen.

320

Der rede wil ich nu gedagen.

Seht, der behilt das riche,

Deme ouch gewaldecliche

Half der furste Herman,

Biz he di cronen in gewan.

 

325

Iz was ouch, in der selben frist,

Da unser herre Jhesus Crist

Hatte nach der menscheit

Zwolf hundert jare wol gereit

Unde da zu sibene allegar,

330

Do vrouwe Gerdrut gebar,

Di kunegin von Ungerlant,

Alse üch wilent ist bekant,

Ir junge dochter here.

Nach kuniclicher ere

335

Druch man si zu der toufe

[8a]

In einer wehen sloufe,

Der decke was ein baldekin.

So er beste mochte sin

Zu Ovene in den kramen.

340

So dise rede quamen

Fur den fursten Herman,

Herlich boden er gewan,

Ritter unde frouwen:

Di bat der herre schouwen

345

Wes er mochte glouben.

Das was von Binderslouben

Einolfes frouwe Berte,

Der dirre furste gerte

Von aller siner krefte

350

Zu dirre bodeschefte.

Da was ouch der gude,

Ein ritter hochgemude,

Her Walter von Pharila.

Des geverte wart iesa

355

Geboren ouch von hoher art

Von Mulburg grave Meinhart

Unde anders ir gesellen vil,

Der ich nu gedagen wil,

E ich der zide me ferzer.

[8b]

Ir was ein lobeliches her,

Ritter unde vrouwen,

Die alle sůlten schouwen

Waz dirre dinge were,

Obe di Ungerere,

365

Der dugende riche Andreas,

Der da zu lande ein kunic was,

Unde ouch die heren kunegin

Des beraden wolden sin,

Daz si nach godes ere

370

Ir jungen dochter here

An ein eliches leben

Wolden sime sune geben:

Des wůste er in ummer danc.

Di stunde was unweiger lanc,

375

Di boden man verrichte.

Zu wege man si schichte

Kurtliche in der zide.

Gar gůt was ir gesmide

Unde alles ir gereide.

380

Si fůren in geleide

Der herren unde des riches.

Si fůren degeliches

Alles in geleise

Ir vollen dagereise

[9a]

Endruwen gude wile,

Verre unde lange mile,

Von Misen zu Beheimen,

Biz si gerieden sweimen

Durch Merhern zu Stire.

390

Si hatten selden fire

Biz in Oven wart erkant,

Die houbetstat in Ungerlant.

 

Zu hove si nu quamen.

Die herschaf iz vernamen,

395

Der kunic unde di kunegin.

Man hiez si willekomen sin

Gar wirdecliche schone.

Si nigen ieweder chrone

Unde sprachen dugentliche:

400

„Got danke üch, kunic riche,

Unde üch, here kunegin;

Er du üch sine gnade schin.

Got Sterke alle üwer ere.

Seht, üch důt grůzen sere

405

So er flizecliches kan

Der edele furste Herman

Da her von dutschen landen.“

Si gaben in zu handen

[9b]

Des fursten brive so gereit.

410

Die kuneginnen was gemeit

Von alle ir herzen krefte

Der werden bodeschefte.

 

Der kunic dankete in ieso.

Er was ouch sunderlichen fro,

415

Daz im also suze

Sante sine gruze

Der furste so vermezzen.

Die boden giengen ezzen.

Man plac ir uzer mazen wol,

420

Wie man zu rechte sezzen sol

Eins fursten ingesinde.

Ir spise die was linde.

Nach hoves ere man in bot

Simeln unde schuzzelbrot

425

Unde da zu edel spise.

Nach hovelicher wise

Drůc man in zu dische

Wiltbrede unde fische

Unde wes der koch erdachte.

430

Zu dranke man in brachte

Win unde medes gůde.

Sus ruweten di lude

[10a]

Nach des weges erbeit:

Der raste waren si gemeit.

 

435

Zu jungest si doch draden

Hine in die kemmenaden

Mit hovelichen sinnen,

Alda die kuneginnen

Unde ouch der kunic inne was.

440

Des fursten brive man in las.

Seht, di gerit man duden

Vor den ammetluden

Den herren lobesamen.

So balde si vernamen

445

Daz der furste Herman

Ir jungen dochter da gesan

Sime sune zu der e,

Unlange merreten si da me.

kurzliche si beriden sich

450

Unde duchte si wol mugelich,

Wes der furste gerte,

Das man in des gewerte,

Unde alles des er bede,

Daz man iz bilche tede.

 

455

Di boden frouweten sich do,

Daz ires herren wille also

[10b]

Ergangen was nach eren.

Wer solde in daz verkeren?

Billiche waren si gemeit,

460

Daz si ir langen arebeit

So hatten wol behalden.

Des si geriden balden

An frouden unde an worte:

Si baden sunder forte,

465

Mit flize, die wol ertegen,

Daz man si wolde fertegen

So man baldes mochte,

Wande in nit wol indochte

Den langen wec zu sparne,

470

Den si vor in zu farne

Hetten also verre.

Do hiez der Unger herre,

Der dugenthafte Andreas,

Alse er eins milden herzen was,

475

Daz man di boden richte

Unde si gen lande schichte

Mit siner dochter heren

Nach kuneclichen eren.

 

Der herre wenic anders det,

480

Wan daz er gode sin gebet

[11a]

Sprach andechtecliche.

Er lebete cristenliche.

Zu werltlichen Sachen

Wolde er sich selden machen:

485

Virgenclich gescheffede

In duchte gar ein effede.

Des druc di kuneginnen

An frouwelichen sinnen

Die arebeit alters eine.

490

Die edele unde die reine

Ir riche iedoch begatte,

So daz si fride hatte.

 

Unlange si nu beite,

Ir dochter si bereite

495

Nach kintlicher zerte

Zu dirre wegeferte.

Si hiz ir balde machen

Nach fruntlichen sachen

Von silbere lodec wize

500

Mit druwelichem flize

Deme kinde ein zuberlin,

So ez wehes kunde sin,

Da man iz inne mochte

Gebaden wan iz dochte.

[11b]

Si hiez ouch balde bigen

Von Silber eine wigen

In muderlicher gunste

Nach meisterlicher kunste,

Da man daz kint in legete

510

So iz die amme degete

Unde mit der spune neme war.

Die frouwe hiz ouch dragen dar

Irme jungen dochterline

Laden unde schrine

515

Gewocht von helfenbeine,

Dar inne gůt gesteine,

Smaragden, jachande,

Robine unde diamande,

Saphire unde ander steine gnůc

520

Her fur di kemmereren drůc,

Den aller wehesten prisant,

Der hi zu lande ie wart bekant,

Lodec silber unde golt,

Vil manigen heren kurzebolt,

525

Pellel unde gůt samit,

Vil manigen wehen kursit,

Die von golde strebeten.

Di vogele alse si lebeten,

[12a]

Di lewen als si giengen

530

Daz fletze da beviengen.

Daz golt dar unde sich verbarg.

Ir dochter gap si dusent marg

Schatzes reht alse ich üch sagen.

Ouch wart herfur alda getragen

535

Scharlachen unde baldekin

So si beste mochten sin.

In der kemenaden

Si schriden unde naden

Alle iesa zu male

540

Gefullet mit zindale

Den boden fris gecleide.

Man nuwete in ir gereide

Unde alles ir gesmide

Daz uberzoch di side

545

Wiz, brun, rot, gel, grune unde bla,

Wie man si solte haben da.

Man gap in ritterlich gewant

Unde da zu wehen prisant,

Nuwe sadele unde pert.

550

Man richte si gein lande wert

[12b]

Nach kuneclicher werdekeit.

Zu verte waren si bereit.

 

So daz di kuneginnen sach,

Fruntliche in zů di frouwe sprach

555

In vil lieplicher gir:

„Gedruwen frunde, loset mir,

Ein deil ich üch bevelhen můz.

Mit flize sagent minen grůz

Demo fursten edel unde her.

560

Ir sullet ime ouch sagen mer,

Daz er eben si gemůt,

Wande ich wil unser kinde gůt

Gerne erschozen allen dac

So ich druweliches mac.

565

Wil unser herre daz ich leben,

Ich sal in noch vil dicke geben

Nach kuneclicher ere,

Daz sich ir habe mere.

Fruntliche wil ich helfen in,

570

Als ich den kinden schuldic bin.“

 

Di boden sprachen aber do:

„Wir sullen, frouwe, gerne also

Nach unser mugentlicher craft

Werben uwer botschaft.

[13a]

Daz dun wir sicher ane crot,

Wil uns eht gnedecliche got

Zu huse heim gesenden.“

Die boden solden wenden

Umme nu gein lande.

580

Si danketen ir prisande

Hoveliche also in gezam.

Urlob daz gesinde nam.

Sie jahen dugentliche

„Got danke üch, kunec riche,

585

Unde üch, here kunegin.“

Nu mochte nieman uber sin,

Wi wol si weren e gemůt,

Do man di jungen dochter lůt

Unde wolde si dannen furen,

590

Si muste jamer ruren.

 

Di frouwe ruweliche sach.

Ir segen si vil dicke sprach

Uber lude unde uber kint:

„Gůt si üch weder unde wint.

595

Der heilge geist hab uwer plege

Alle zit unde alle wege.

Der gude got neme uwer war“,

Des bat si dar unde aber dar

[13b]

Mit andaht an ir venje.

600

Hin für di milde menje

Mit gnaden heim zu lande.

So nu der furste erkande,

Deme alle dugende wol gezam,

Daz sin ingesinde quam,

605

He inphienc si froliche.

Her inphienc ouch wirdecliche

Di jungen furstinnen,

Wi eine kuneginnen

Iman zu rechte enphahen sol.

610

Si azen unde furen wol

Von des wirtes gude;

Si růweten der mude

Nach des weges arbeit.

Der hof wart aller nu gemeit.

615

Ein hochzit si begingen,

Brutlauft si inphingen

Mit den zwein jungen kinden.

Ein e si wolden binden;

Festen unde sterken.

620

Hi mac ein man wol merken

Waz vröden si bewegete:

Zu bette man nu legete

[14a]

Mit gudem underscheide

Di jungen kinder beide,

625

Den knaben unde daz magedin,

Alse iz ein zeichen sůlde sin,

Ein fůrspil unde ein bilde,

Daz si zwei beide milde-

Cliche sůlden alden,

630

Ir e mit truwen halden.

Ouch saget man uns uffenbar,

Diz kint drede in sin firde jar,

Da man iz nach des fursten ger

Uz Ungerlande brachte her.

 

635

Der zit verginc unweiger lanc,

Den boden wart ir habedanc

Gesaget erliche.

Man liz si wirdediche.

Der edele furste hochgemůt

640

Gab in cleinode unde gůt.

Des furen si an ir gemach:

Daz sine dirre unde der besach,

Sin hus unde sin gerede,

Wi erz gelazen hede.

 

645

Si vrŏwetin sich vil dicke sint.

Man zouch daz keiserliche kint,

Di jungen dochter heren

[14b]

Nach wirdeclichen eren

Alse eime fursten wol gezam

650

Unde deme kinde rechte quam

Zu dinste unde zu gemache.

Nach fruntlicher sache

Hat iz alles des genůc,

Da iz sin wille zů gedrůc

655

Unde ouch sin herze gerte.

So diz iezu gewerte

Vollecliche inz dritte jar,

Do wart di kuneginnen clar,

Frouwe Gerdrut in Ungerlant

660

Gar von ungetruwer hant

Ir eigen dinstlude irslagen,

Daz noch di lude mochten clagen.

Den solich undinc were

Leitsam unde swere.

 

665

Ei selegen lude, nemet war,

Alle godes frunde gar,

Mit ein vernemet wunder

Unde ider man besunder

Widene unde verre,

670

Wi drostlich unse herre,

Der here almechtecliche got

[15a]

Sine gnade unde sin gebot

Erzouget sinen kinden.

Daz mugen wir befinden

675

An diseme juncfrouweline,

Deme heren magedine,

Wi bezide iz ane vienc,

Daz iz mit witzen umme gienc,

Wi junc iz greif an sin gebet,

680

Wie gar vernunfteclich iz det

In siner kintlichen zit,

Daz di clare frouwe sit

Hat an daz ende follebracht.

Ez ginc in ganzer andacht

685

In di kirchen allen dac,

Da der prister inne plac

Zu singene unde zu lesene:

Da plac iz euch zu wesene

Wol gezogenliche.

690

Gar andechtecliche

Sin hende iz bi einander fielt,

Di bede iz uf zu berge hielt.

Hoher gnaden iz entsůb.

Sine ougen iz zu gode erhůb,

695

Nide bog iz sine kni.

[15b]

Venje iz dicke suchte hi

Vor deme altere unde sach

In andacht me dan iz gesprach:

Sin herze erkante iesa zustunt

700

Me dan sin kintlicher munt

Mit Worten brechte zu der rede.

Daz dreib iz dicke iesa zu stede.

Also bezide iz ane vinc

Ein leben, des iz sich beginc

705

Nach gar godelicher e.

Waz sulde langer rede me?

Ime iz wassen nu began,

Inane iebaz iz sich entsan

Rechte als ich üch bescheiden wil.

710

Wanne die kinder hatten spil,

Di ir genieze waren

An aldere unde an jaren,

Si liz sich jagen unde floch,

Ir wec si gein der kirchen zoch.

715

So volgete ir di menige:

Si vil ir starken venje

In aller der gebere

Alse ez geschimpet were.

Ir gebet si danne las.

[16a]

Wanne di kirche oc uffen was,

So stunt des jungen kindes sin,

Daz si ir alles floch dar in;

Wanne des nit inmochte sin,

So bleip daz here magedin

725

Uzene vor der dure.

Seht, da vil si fure

Vor ir spilgesellen:

Si kuste alda di swellen,

Di kirchdure unde die steine.

730

Den schimp beginc die reine

In geistlicher andacht.

Wanne daz spil wart vollebracht,

Ein anders aber si gevienc.

Wanne si mit den kinden gienc

735

In der jungen menje,

Seht, aber vil si venje

(Des inwolte si nit vergezzen):

Si sprach „ei lat uns mezzen

Welch unser lenger muge sin.“

740

Sus mazen sich di magedin

Welche dir lengest were:

Ir was di maze ummere,

Wan daz si wege funde

[16b]

Wi si gevenjen kunde

745

Alle wege unde alle zit.

Seht, des bejach di frouwe sit.

 

Nu wůs di juncfrouwe ielanc baz.

Under wilen si besaz

Mit den jungen kindes spil:

750

Seht, hette si dan gewunnen vil,

Si gap ir zehenden ie da von.

Des was daz magedin gewon,

Swanne si ir spil gedreip,

Alles daz ir uber bleip,

755

Daz gab si armen kinden:

Di musten sich ferbinden

Daz si ir ave Maria

Sprechen flizecliche iesa,

Ir pater noster, ir gebet.

760

In godes namen si daz det,

Wande alles ir gemeine

Was edele unde reine,

Zu gode wol gerichtet.

Si hatte sich verplichtet

765

Zu gotlicher minne:

ir herze unde al ir sinne

Zu gode wert si wante.

[17a]

Zartliche si in nante

Alle zit unde alle frist

770

Ir sůzen heiler Jhesum Crist,

Ir drost, ir zarten herren.

Umme allen iren werren

Die clare maget junge,

In ganzer huffenunge

775

Rif si ir heilant alles an.

Waz leige werkes si began,

Da was got ie gefuget in:

Er was ir ende unde ir begin.

Durch niht irs herren si vergaz.

780

Nu wůs di juncfrouwe ielanc baz,

Glich an liblicher mugent

Unde ouch an geistlicher dugent.

Ieme si zu an libe nam,

Ieme ir ouch von gode quam

785

Gnaden unde guder side.

Zuchtec waren alle ir dride,

Otmüdec ir geleze.

Ir cleinode, ir geseze,

Waz si von zirde solde han,

790

Des wolt di maget wol gedan

Durch godes libe ein deil enbern:

[17b]

Ouch wolte si lutzel icht begern

Dirre werlte idelkeit.

Mit flize was si me gereit,

795

Wi daz si vollebrechte

Mit grozer andechte

Ir dagezit unde ir gebet.

Wanne si des nit vollen det

Gar bi dages friste,

800

Daz si lichte e si wiste

Betwungen slafen muste gen,

Nochdan wolte si niht abe sten

In solicheme twange:

Si lac ir also lange

805

Wachende an ir bette,

Biz si ervollet hette

Ir dagezit unde ir gebet.

Glicher wise di maget tet

Alse der kunec David

810

In deme salter aber quid:

„Uf minem bette, herre min,

Han ich ieme gehugede din.“

 

In dirre zit iesa geschach,

Juncfrouwe Elizabet gesach,

815

Daz die lüte giengen zů

[18a]

Mit flize vor den alter nu

In cristenlicher wise:

Si zugen in vil lise

Apostolen zu herren,

820

Die si umme iren werren

Mochten sunderliche biden.

Nach den cristenlichen siden

Di maget her begerte,

Daz si got gewerte,

825

Daz ir in der friste

Johannes ewangeliste

Zu herren mochte werden,

Wande he hi uf erden

Juncfrouwelicher hude plac:

830

Des bat mit truwen allen dac

Die juncfrouwe edel unde gůt.

Wande si ouch kuslichen můt

Innerliche druc zu gode.

Ir wart der selbe zwelbode

835

Eins, anders unde ouch dritteweit

Nach wunsche: da wart si gemeit,

Vonde die selige was gewert

Wes si hatte iesa begert

Von herzen also sere.

[18b]

In des apostelen ere

Die clare ouch sit gewerte

Wes man an si begerte.

Niemannes bede si verkos:

Si liz in sime namen los

845

Ir schulder willecliche;

Wer si druweliche

Gabe in sime namen bat,

Di gab si rilich uffer stat

Nach ir muge aller meist,

850

Wa ir ok wart di folleist,

Di stade an deme gude.

Si hatte in irme mude

Von alle ir herzen girde

Di fire in grozer wirde:

855

Di fest unde alle hochzit.

Was endes dise unde die gelit,

Hilt si nach grozen eren.

Si wolde ie danne meren

Gude werc unde ir gebet.

860

Ir hentschen si niht ane endet:

Di liz si lihen schone,

Biz man nu lute none,

Daz si irkante mitten dac.

[19a]

Biz dar di juncfrouwe nit enplac,

865

Daz si ir arme prisete:

Hi mide si bewisete,

Daz an gewandes glanze.

An chronen joch an cranze

Godes lob ist nit geleit,

870

Wanne ok an herzen luterkeit.

Alle idelkeit si danne floch;

Ir selber si danne abe zoch

An willen unde an luste.

Besaz si nach ir gluste

875

Mit ir geniezen kindes spil.

Wart ir gewinnes icht zi vil,

Daz sich di lude erheben důt,

Sa wolt di juncfrouwe gůt

Weiz got ir selber widersten

880

Unde wolde der winnunge abe gen.

 

Quam iz aber lichte also,

Daz ir genozen waren fro

Mit danzes ampare,

Sa gienc di maget clare

885

Eines umme durch di lude.

Ir meine unde ir gedude

Was alles edel unde gůt.

[19b]

Si sprach unde dachte in iren můt,

Ein ummeganc der lude si

890

Waz umme zwene unde umme dri

Der ummegenge vollen ist:

„Durch minen herren Jhesum Crist

Wil ich di weizgot underlan.“

Sus ginc di maget wolgetan

895

Von dem danze iesa zu hant:

Zu gode was ir sin gewant

Alle zit unde alle wege.

Nu wůsen glich in einer plege

Zwa juncfrouwen here

900

Nach furstlicher ere:

Di selben meide viere

Drůgen glich geziere,

Glich geveze unde ein gewant,

Borten unde harbant,

905

Bratschen unde furspan,

Surkot unde kidele an.

Huben unde hůllen

An stirnen unde an nůllen;

Ir houbet luchten schone,

910

Auch gleiz ieweder crone

Von gulde unde von gesteine.

[20a]

Also was in gemeine

Waz di megde wol gedan

Zu ir libe solten han:

915

Daz was di here Elizabet,

Von der di erste rede get,

Unde Agnes ir geswie.

So vouwe nu Sophie

Mit den juncfrouwen heren

920

Zu kirchen wolte keren.

Mit ein si aber gingen,

Ir stede si bevingen

Alda si wolden sizzen.

Nu lac mit guden wizzen

925

Di here wunnecliche maget

An grozer tugende unverzaget,

Elizabet an ir gebet:

Ir crone si danne abe det,

Numme si der begerte

930

Di wile daz ammet werte.

Her umme ir sprach di swiger zů:

„Sage, Elizabet, waz tribest dů?

War umme hat din houbet

Der cronen sich verloubet,

935

Daz du si ledec lezes lin?“

[20b]

Sehet, diz enphinc daz magedin

Gar gezogenliche.

Si sprach andechtecliche

„Ich sage ůch, vrŏwe, minen můt:

940

Er si dumplich oder gůt,

Ich hoffe ez si ane arge list.

Ich sehe minen heilant Crist,

Jhesum minen herren

In bedrupnisse unde in werren,

945

In bitterkeide schine,

In jamer unde in pine,

Marien eingebornen

Gecronet hi mit dornen,

Sine hende unde sine fůze

950

Durchslagen gar unsůze,

Versniden sine siden:

Wie mohte ich nu geliden,

Daz mich vor ime sehe ieman

Mit golde sten gecronet dan,

955

Mich arme creatüre?“

Also sprach die gehüre,

Daz dugentriche magedin:

Deilhaft wolde si gerne sin

Der pine unde ouch der smacheit,

[21a]

Die an ir herren was geleit.

 

Di reine was iesa zu stunt

Von godelicher minne wunt,

Wande ein bitterlichez swert

Was durch ir zarten sele wert

965

Mit gewalt gedrungen.

Di claren maget jungen

Hatte iesa zu male

Ein suze minnen strale

Innerliche nu versniden.

970

Waz der suze got geliden

Hat durch unsen willen,

Geiseln unde fillen,

Jemerlichen smerzen,

Der maget lac zu herzen

975

Der pinen bitterliche not

Unde ouch sin schamelicher tot.

Des hat ein furic minne

Ir herze unde alle ir sinne

Inbrunstecliche enzundet,

980

Daz nieman vollegrundet

Waz unser herre suzekeit

Hatte an daz magedin geleit,

Di ez befunden hade

[21b]

An godelicher gnade.

 

985

Eia vaterlicher got,

Wi maniger hande leie crot

Last du in allen ziden

Dragen unde liden

Dine allerbesten frunde!

990

Ja were ein man selbe nunde,

He druge noch mit unstaden

Da mide wilent ist beladen

Ein cranker mensche alleine:

Wan daz din gude reine

995

unser burde hilfet dragen.

Nu helfet, lieben, alle clagen

Grozen jamer unde not.

Wande iezu was gelegen dot

Der edele furste Herman.

1000

Des gienc di maget angest an.

Michel swere unde ungemach

Der uzerwelten nu geschach,

Juncfrouwen Elizabete,

Daz sente Margarete

1005

Solichen kummer nie bevant

Biz si ir viant uberwant,

Den leitsamen hellehunt.

[22a]

Nu wart ein ungetruwer funt

Erhaben gen der claren:

1010

Wande in der burge waren

Gewaldege ammetlude,

Di gar in schafes hude

Drugen fientlichen můt

Der maget edele unde gůt

1015

Um ir dugentliche siede.

Si furen ir unrechte mide

Afterwert mit hinderrede:

Si niden alle iesa zu stede

Ir guden werke mildekeit.

1020

Ir haz, ir umbescheidenheit

Gein ir die herren ubeten:

Ir jugent si betrubeten

In vientlicher rache

Mit boser aftersprache.

1025

Ir ewiger ouch Sophie

Unde Agnes ir geswie

An werltlicher hochfart

Bede waren ungespart.

Des waren si gar underschieden

1030

Von den mildeclichen sieden,

Der di godes dirne plac:

[22b]

Si wurden ir ouch allen dac

Leitsam unde swere.

In fremeder ungebere

1035

Wart ir leides maze schin:

Den kummer leit daz megedin

In dugentlichem prise.

Hie zuschen bleip die wise

Bedrat juncfrouwe Elizabet

1040

Same ein lilje in mitten stet

Mit dornen ummefangen:

Waz si die wollent drangen,

So wesset doch ir edel ruch.

Sus hatte ir dugent keinen bruch:

1045

Wande ir otmudekeit

Ferre widene unde breit

Ergoz ir suzekeide smac.

Si leit ir smacheit allen dac

In ganzer mildekeide.

1050

Si stunt nit in der leide

In hoher wis den sorgen wider,

Si neigete ir houbet alles nider

In otmude iesa zu tede.

Ir wandelunge unde alle ir rede

1055

Was alles mit den armen.

[23a]

Si bat sich got irbarmen

In vaterlicher gude

Um alle ir widermude.

 

Wer wolde ez nit fur wunder han

1060

An dirre maget so gedan,

So kleine an kintlicher mugent,

Der solich gnade, solich dugent

Gar mit vollen ist gegeben?

Di sa dugentliches leben

1065

Bi kindes aldere ane ving

Unde ielanc me in gnade ginc?

Ei liben alle, saget an,

Wes mac bedanken ieden man,

Wilich die frouwe kunftec ist,

1070

Di bi so junger dage frist,

In so kintlicher jugent

Befunden hat soliche dugent?

Wie edel wirt der fruchte smac

Biz si gestet an iren dac,

1075

Di grůnende an der blude

Sus hat geruches gude?

Ich sage uch druwelichen war,

Sint die reine sunder var

Wurzelin hat gelazen nider,

[23b]

So sal ir frucht zu berge wider

Wassen gein der hohe,

Di si weizgot enplohe

Fogelen unde wůrmen,

Daz si ir niht ensturmen.

1085

Si sal ouch mit ir henden

Vil gude werc volenden,

Zu fruchte selic unde zart

Planzen einen wingart.

Der sal ir wirdekeide reben

1090

Unde drubeln hoher gnade geben,

Win aller suzekeit gebern:

Der gnaden wil si got gewern.

 

Iezu vergangen was di zit,

Dar an des kindes alder lit,

1095

Unschuldecliche unde in gedolt.

Nach kintlicher unscholt

Ginc ir ein bezzer alder zů:

Gemeret wart ir aber nů

Minne unde geistliche dugent.

1100

In juncfrouwelicher mugent

Nach godes suze follebraht

Wus innerlich ir andacht

Unde ir geistlichen side.

[24a]

Ir enstunt iesa da mide

1105

Von der werlde bosheit

Uzerwert bedrubekeit,

Jamer leit unde ungemach.

Si swebete in der sorgen bach

Rehte als ein fis in wage.

1110

Irs brudegoumen mage,

Dinstlude unde ammetherren

Des ungemaches werren

Der juncfrouwen daden:

Ja di ir solden raden,

1115

Dinen unde minnen

Alse eine furstinnen,

Di ir frouwe were,

Di schufen ir di swere

Unde diz ungemůde:

1120

Gein dugentlicher gůde

Wurben si ir ungemach.

Der uzerwelten nu geschach

Zu der selben friste

Alse unseme herren Criste

1125

Nach dirre wis unde deme spor

Ouch geschehen was hi for,

Deme umme sine mildekeit

[24b]

Schufen arge wichte leit:

Minne er in bezougete,

1130

Haz ime wider ougete

Di vil ungetruwe diet.

Diz folc endet ouch anders niet,

Si drůgen fientlichen můt

Der maget edel unde gůt

1135

Umme ir seleclichen dat.

Si jahen unde funden rat,

Daz man dar an genente,

Daz man si wider sente

Deme vader heim zu lande:

1140

Er hette is ummer schande

Unde an eren ummer gnatz,

Daz siner jungen dochter schatz,

Ir wideme, ir cleinode

Were alse rechte snode,

1145

Den si zu lande hette bracht.

Her umme in allen was gedacht

Daz ir herre solte nemen,

Alse ime kunde wol gezemen,

Eine juncfrouwen in der kuntschaft,

1150

Der vader ime bezzer craft

Nach alleme sime můde

[25a]

An helfe unde ouch an gůde

Mochte baz geleisten:

Er hette hi zum meisten

1155

Ein luzzel gudes sunder rat.

Ir swiger ouch in missetat

Begunde iezu bedrachten sich:

Si wolde di maget lobelich

Zu nunnen in ein closter geben,

1160

Da sůlt si weizgot inne leben

Biz an ir libes ende.

In dirre missewende

Zu gode iesa genande

Di juncfrouwe und erkande

1165

In dirre selben swere,

Daz si ellende were

Von ir vader huse hie:

Iebaz iebaz erkande sie

In leide unde ouch in pinen,

1170

Daz si ein pilgerinen

In dirre unsteden werlde was.

Diz alles si zu herzen las:

Ein ser gemůde si gewan.

Sufzen dicke si began

1175

Iedoch umme ir versmehekeit,

[25b]

Di si bedrubeliche leit

Von den luden so zu stat.

Got si vil innecliche bat

Umme alle ir ungemude,

1180

Daz er nach siner gude

Ir sache unde ir geschichte

Nach sime labe richte.

 

Ir sache gode si beval.

Di selege aber nu zu dal

1185

Zu den gurtelmeden ginc:

Mit in ir kosen si gefinc

Unde alle ir wandelunge also,

Daz ir swiger aber do

Sprach ir nidecliche zů:

1190

„Sage, Elizabet, waz mache dů,

Daz du in steteclicher frist

Bi den dienstmeden bist?

Ich sprechen in den druwen min,

Du soldest ir genoze sin,

1195

Geboren in ir orden:

Du insoldes nie sin worden

Under fursten kint gezalt.“

Dise rede manicfalt,

Ir haz unde ir gedude

[26a]

Unde euch der ammetlude

Zu gode wert si wante:

Da bi si rechte erkante,

Die clare maget junge,

Wer sine hoffenunge

1205

Zu gode werte wante

Unde ok an in genante,

Er wurde nemeliche irlost.

Nu wart di maget here gedrost

In ir widermude

1210

Nach vaterlicher gude:

Wande unser herre sinen geist

Sante, werde folleist

Lodewige ir mahel in,

Gnedecliche in sinen sin,

1215

Daz er vil dicke lise

In fruntlicher wise

Sprach ir heimeliche zu.

Er grůzte si vil dicke nu

In ir leides forchten

1220

Mit suzen senften worten:

Drost enphienc si nu hi von.

Ouch was der jungelinc gewon,

Alse ime endruwen eben zam,

[26b]

Waz endes he geriden quam,

1225

Daz he ir ummer brachte

Prisant, wi he is erdachte.

Der junge furste riche

Nam si ouch dugentliche

In sine arme bede iesa:

1230

Drostes wart di maget da

Von ir mahel innen bracht.

Doch was den luden vil gedacht

Alumme in der gewande,

Wi man gein Ungerlande

1235

Di claren solde schicken.

Si kanten eine wicken

Des fursten Ludewiges můt,

Obe er ubel oder gůt

Gein siner brude were:

1240

Si druweten der mere,

Wie man der seleclichen maget

Ir druwe hette widersaget,

Alle elicher dinge,

Unde deme jungelinge

1245

Sůlde erworben schire

Eine juncfrouwen phire,

Eines fursten dochter etteswa.

[27a]

Der zwivel was alumme da

In der kuntschaf uber al;

1250

Der wan alumme da geschal.

 

Noch was der herren harte gnůc,

Di ir wille nit endrůc

An den ungetruwen rat,

Den ettesliche in missetat

1255

Undruweliche rieden,

Wie daz si nu geschieden

Di reinen mahelunge,

Di claren maget junge

Unde ouch ir brudegamen,

1260

Den fursten lobesamen:

Wande in was druweliche leit

Ir swere unde ir bedrubekeit,

Ir jamer unde ir ruwe;

Si hilden gerne ir druwe

1265

In festeclichem mude.

Mit den gestunt der gude.

Von Pharila her Walter:

Wan al zu vole erkante er

Daz ein ungetruwer man

1270

Niht eren pris erwerben kan.

Der solde in disen ziden

[27b]

Mit sime herren riden

Unde ander sin gezunfte.

Seht, in gefůger nunfte

1275

Reit er bi in alleine.

Er sprach „ei furste reine,

Muste ich reden etteswaz

Unde mochte iz bliben ane haz,

Daz ir, herre edel unde gůt,

1280

Woldet uffen üwen můt

Wes ich in rehter minne,

Drut herre, an üch gesinne,

In allen uwen gnaden?“

Der furste wol geraden

1285

Sprach ime fruntliche zů:

„Sprich, Walter, wes gesinnest dů?

Daz macht du sunder vare

In sicherheide ware:

Hat iz ok fuge, ich sage iz dir

1290

Unde irfollen din begir.“

 

Her Walter wart iesa gemeit.

Er sprach mit fůgen anderweit;

„Ei furste herre, saget mir,

Wes druwet oder denket ir,

1295

Wie stet uwer edel můt,

[28a]

Ist er betrubet oder gůt

Gein miner vrŏwen Elizabet,

Von der alsolich rede get,

Daz ir si wollet uber ein

1300

Senden iren vader hein,

Wider heim in Ungerlant?

Daz dut mir, herre min, bekant.“

 

Der junge furste riche

Di frage dugentliche

1305

Lobete unde prisete.

Einen berg er ime wisete,

Der was michel unde ho.

Fruntliche sprach er aber do:

„Sihes du, Walther, hinen berg?

1310

Obe er durchslagen goltwerg

Von grunde in rehter swere

Biz an die hohe were

Unde aller dinge were min,

Sich, der muste e begeben sin,

1315

Alse er zu rechte sůlde,

E daz ich scheiden wůlde

Mich von miner brude.

Laz sagen ok die lude

Waz si wollen ummer me:

[28b]

Niman inscheidet unser e.“

Her Walter frouwen sich began

Alse ein getrüwer dienstman.

Da er des fursten willen sach.

In guder wise er aber sprach:

1325

„Mac, herre, an uwen willen sin,

Daz ich der heren frouwen min

Verkunde dise botschaft,

Wande si mit rüwen ist behaft,

Mit leide in zwifellicher not,

1330

Daz ich irwerbe ein bodinbrot?“

„Ja“ sprach der furste wolgetan,

„Du salt ein warzeichen han,

Daz si der rede gloube dir

Unde ouch erkenne min begir,

1335

Wie unser zweier sache lit.“

Er greif in sinen bursit.

Er gap im einen spiegel dar,

Der was zů beiden siten gar

Gesazt in eren spise.

1340

Er was zweier wise,

Daz man in mochte falden.

Er hatte einsit behalden

Niewan ein einfeldec glas,

[29a]

Uf die ander sit gemachet was

1345

Eines crucifixes bilde.

Daz sande der furste milde

Der rede ein gůt urkunde,

Daz si die warheit funde

Unde da an nit verzegete,

1350

Waz ir der ritter segete.

 

Her Walter ilen nu began

Alse ein gedruwer hoveman.

Er brachte gude mere,

Wie er gescheiden were

1355

Von deme fursten sůze,

Er brachte ouch sine grůze

Der maget edel unde gůt:

Seht, daz erfrouwete iren můt.

 

So diz alles nu geschach,

1360

Daz si den spigel an gesach,

Da an ires herren zeichen was,

Unde er di rede al uz gelas.

Seht, da began si lachen,

Geistliche vroude machen:

1365

Wande allez ir gemeine

Was luter unde reine.

 

Sa no den herren duhte zit,

[29b]

An deme alle gnade lit.

Den lobesamen heilant,

1370

Deme alle herzen sint erkant,

Daz er mit siner gude

In leides ungemůde,

In ruwen, in bedrůbekeit

Unde in grozer smacheit,

1375

Die ir die bosen daden,

Di ungunst zu ir haden,

Die seligen juncfrouwen

Drostliche wolde schouwen.

Den rat er widerachte,

1380

Den mit falsche uf lachte

Di gar ungetruwe diet.

Er liz zu wege kŏmen niet

Ir felslichen rede,

Di uf geleget hede

1385

Der ummesezen unkust,

Er gab ir brudegamen last,

Alse ieder man wol merkete,

An gnade er in gesterkete,

Daz er den luden machte kunt

1390

Wie sin wille so zu stunt

Gein siner brude were.

[30a]

So diz wart uffenbere

Unde deme volke alumme erkant,

Verstoppet wurden so zu hant

1395

Der lugenere munde:

Der bosen hohen funde

Wurden do gewideret,

Swach unde so genideret,

Daz nieman dorste furbaz

1400

Dragen der juncfrouwen haz

Joch an keiner hande steden

Ir mehelunge widerreden

Mit worten noch mit rade;

Wande si bisunder hade

1405

Got, der alle wunder tůt,

Deme fursten edel unde gůt

Bedirmet selbe zů der e.

Waz solte dan lange rede me

Uf geleget wider got,

1410

Wa sin wille unde sin gebot

Inkeinen weg sich wendet?

Daz wirt ie volendet.

Hie von der lute bosheit

Was endruwen ungereit

1415

Zů dirre widersprache:

[30b]

Ir unkustec rache

Mochte nit gescheiden,

Verwerren joch verleiden

Di unsers herren gnade

1420

Zu houf gefuget hade.

 

Ei schŏwet wunderliche dinc,

Wie der selige jungelinc.

Ja der sůze brudegam

Zuchtec unde schamesam,

1425

Der edel vürste junge

Zu dirre mahelunge

Goldes nit gerůchte

Joch schatzes nit ensůchte,

Alse ime fur geleget hat

1430

Siner ungetruwen lude rat

Durch einen vientlichen haz.

Der furste erkante endruwen baz,

Daz ein reine selic wib

Ist halben wec eins mannes lib,

1435

Di mit gůden werken wol

An godes gnade erwerben sol,

Daz he ir ouch gefugen kan

Zu mahel einen gůden man.

Noch prufent ouch ein ander gůt:

[31a]

Des küschen jungelinges můt,

Alse ich üch sagen über lut,

Daz er nit sine minnen brut

Zu brodelicher geilheit,

Wen ok zu gnaden suzekeit

1445

Mit siner gabe neigete;

Daz er iesa bezeigete,

Da man ir brachte sa zu hant

So herlichen prisant

In drostlicher milde,

1450

Da unsers herren bilde

In crucifixes wise

In minneclichem prise

Stůnt gemachet inne,

Daz geistlicher minne

1455

Was ein recht gedude

Des fursten unde der brude.

 

Aber was in dirre frist,

Alse unser herre Jhesu Crist

Hatte nach der menscheit

1460

Zwelf hundert jar iesa gereit

Unde ein unde zwenzic ouch da bi,

Da wandels unde unkusche fri

Der junge furste Lodewic,

[31b]

Bluwende alse ein meien zwic,

1465

Fri unde bar vor schanden,

Lantgrave in Duringenlanden

Sine wirtschaft machte.

Zu man ime lachte

Nach wirdeclichen eren

1470

Die jungen maget heren:

Si was Elizabeth genant,

Geboren her uz Ungerlant,

Da der milde Andreas,

Ir vater, kunec inne was.

1475

Er nam si nu zu wibe.

Doch under wegen blibe,

Waz rilicher wirdekeit

Da zu hove was bereit:

Hie mide ich bliben unbedrat.

1480

Nu sehet wie got gefuget hat,

Der aller dinge maze kan,

Gedruwes wib, gedruwen man,

Beide heilic, beide gůt.

Beide an eren glich gemůt

1485

Wol in der samenunge

Der selegen mahelunge,

Di sich in geistlicher lust,

[32b]

Nit gar nach fleischlicher glust

An zwein gelieben da erhůb.

1490

Ielich des andern libe entsůb

Noch me in ganzer wunne,

Dan ieman glouben kunne.