Weltchronik

Geschichte Roms: Gaius

Verse 22741 - 22934

__________________________________________________________________________________

Ein künic hêt grôzen gewalt

e Rôm, der was manicvalt;

des name Cayus hiez.

mangen frumen künic er liez

22745

besehen, ob dhein Rœmær

hêt von ieman herzenswær.

er was des muotes ein griulîch man,

als ich von im gehœrt hân.

er was gewaltic ze Rôme zwâr.

22750

bî im sô bran daz ertrîch gar,

berg, stein und wazzer.

sô daz fiur ie nazzer

was, sô ez ie sêrer bran;

daz moht nieman understân.

22755

ez bran alle tag zwâr

unz ûf daz abgrünt gar

wol drîer klâfter breit.

daz was den Rœmærn leit,

wan ez bran gar ân ir danc.

22760

ez was von Rôm wol drîer rast lanc.

Dô die Rœmære

vernâmen disiu mære,

die kêrten dar zuo iren sin,

wie si daz fiur tæten hin.

22765

daz trahten si gemeinclîch sus.

bî in was her Virgilius.

er sprach: «welt ir gelouben mir,

die wârheit seit ich iu schier.»

alsô sprach der gehiuwer:

22770

«ez kan daz wild fiuwer

nieman erleschen gewalticlîch

wan ein man der williclîch

sich verbrant dar in,

möht man ieman vindent sîn.»

22775

die râtgeben seiten gelîch:

«wer tæt daz williclîch?

der wær ein unsinnic man,

der in daz fiur solt gân

mit guotem sînem willen;

22780

er liez sich ê villen.»

doch wurden si ze rât,

daz si einen rüefer drât

santen über al in die stat.

des selben wurden si ze rât,

22785

daz er ruoft, swer sich verbrennen wolt

mit willen, dem gæb man ze solt

swaz er in vor kund nennen,

ob er sich wolt erkennen,

daz er williclîche

22790

gieng in daz fiur rîche.

dô was dhein man sô widerzæm,

der sich der tôrheit an næm

wan einer, was ein toplær,

dem wac der würfel niht unmær.

22795

er hêt vertopelt grôzez guot,

dâ von vil trûric was sîn muot.

der selb gedâht: ich arm man,

ich wær dem tiufel undertân,

daz er mir gæb guotes vil.

22800

dâ von ich mich an nemen wil,

daz ich in daz fiur rît,

ob mir die burger ze aller zît

wellent mînes willen gunnen,

so gewunn ich freud und wunne;

22805

sô wolt ich mich verbrennen.

wellent si daz ich in vor nenne

leisten mir ein ganzez jâr,

sô wil ich mich verbrennen gar,

wann daz jâr ein ende hât.

22810

zwâr an der selben stat

muoz man mich sehen brinnen;

daz ist in mînen sinnen.

der selb was ein heiden,

der sich dâ wolt scheiden

22815

von dem lîb umb daz guot.

dhein sinnic man des niht tuot.

er gedâht: ich muoz sterben.

ich wil êrlîch verderben.

alsô was des heiden sin:

22820

vil snell ich verbrunnen bin.

Dô wart gesagt den râtgeben,

ez wolt ein toplær sîn leben

geben umb daz guot.

ob man im sînen muot

22825

wolt lâzen ein ganzez jâr,

sô wolt er williclîchen gar

verbrinnen in dem fiur rôt.

zehant man allen den gebôt,

die in Rôm wâren,

22830

die solden sînes willen vâren.

swer des niht entæte,

den solt man brennen stæte.

dâ lobten ez gemeine

grôz unde kleine,

22835

si wolden im sînen willen lân.

zuo in sô kom er dô gegân.

kleider gap man im genuoc.

silberpfenning man für in truoc.

do gewan er michel wunne.

22840

daz er in iht entrunne,

des pflâgen si flîziclîch.

si machten in ân mâzen rîch.

er sprach: «ir herren hôchgemuot,

welt ir daz nemen für guot,

22845

daz ich tuon mit liut, mit stat?»

si seiten: «daz ist unser rât.»

Zehant er prüefet einen huot,

der was edel unde guot.

den selben huot er nam.

22850

swan er für ein hûs kam,

da er west ein schœn wîp inne

die er gern wolt minnen,

dâ sazt er für den sînen huot,

sô muost der wirt alsô guot

22855

sîn hûs rumen sicherlîch.

er wær arm oder rîch,

er muost kind oder wîp

lâzen oder sînen lîp.

sô dann der wirt ûz gie,

22860

der heiden dô die frouwen vie

oder er vienc die tohter sîn.

er sprach: «ich wil den willen mîn

mit iu haben sunder wân.

umb iuch muoz ich mîn leben lân.»

22865

wolt er tohter oder muoter hân,

zwâr dâ sach er nieman an,

und wolt er di diern dar zuo,

die hêt er spât unde fruo.

in dem hûs hêt er gemach.

22870

wider sich selber er dô sprach:

«ich bin ze lang hie gelegen.

ich muoz einer andern pflegen.»

zehant sazt er den huot

aber für ein hûs guot:

22875

dâ geschach im reht alsam.

die frouwen half dâ niht ir scham

noch ir weinen, daz si tet.

ir moht gehelfen weder drô noch bet,

er wolt ot sînen willen hân.

22880

sîn werc muost für sich gân,

wan er sînen willen begie

mit allen dingen diu er gevie.

Dô er des wol ein jâr pflac,

daz er naht unde tac

22885

sînen willen hêt, swie er wolt,

und man im silber unde golt

gap, swaz er sîn wolt hân,

wan sîn will muost für sich gân,

dô vie man in ân swære.

22890

ze Rôm die burgære,

die jâhen: «edler heiden,

hiut solt dû scheiden

mit freuden von diser werlt hin

vil frœlîch, daz ist dir ein sin.»

22895

er sprach: «daz tuon ich williclîch.

ich was daz jâr freudenrîch,

ich nam iuch wîp unde kint;

mîn tag mir verzert sint.

ich sag iu reht, waz ir tuot:

22900

bringet mir ein ros guot

unde harnasch daz mir zem,

daz ich an mînen lîp nem.

daz ros sol verdeckt sîn

mit einem guoten baldekîn.

22905

wâpenroc, schilt und zimier

sol man mir gewinnen schier,

daz an mir rag von golde,

als ich ez wünschen wolde.

ûf dem helm sol ein krôn

22910

sweben. sô verbrinne ich schôn.»

swes er im dô gedâht,

daz wart allez für in brâht.

dô wâpent er sich ritterlîch

einem degen gelîch.

22915

ûf daz ros er dô saz.

vil dick er sich des vermaz,

daz ez nie wær vor geschehen.

des muosten si im alle jehen.

dô stapft er ûz der stat dan.

22920

mit im reit manic frum man.

dâ hêt daz fiur verbrant

wazzer, stein und daz lant,

daz die Rœmær in der wîl

heten zuo dem fiur kûm ein mil.

22925

dô si daz vernâmen

und zuo dem fiur kâmen,

dô hiezen si in rennen.

si jâhen er solt sich verbrennen.

dô ruoft der heiden âne spot

22930

an sîn verfluochtez abgot.

dâ mit er in daz fiur rant.

daz fiur in ze tôd verbrant

und lasch an der selben zît.

ez brant nimêr die lucken wît.