|
- D er W i e d e r a u f b a u
v o n T r o j a
Priamos läßt Troja wiederaufbauen.
Versammlung der Trojaner.
Das Scheitern der Gesandtschaft Antenors.
17341 - 18340
___________________
- Er hete ûz manigem lande
wercliute manger hande
gewunnen und besendet,
mit den sô was vollendet
- 17345
- der bû schœn unde stæte.
die stat begriffen hæte
ein harte wîter umbevanc.
wol drîer tageweide lanc
was diu veste uncleine.
- 17350
- ein mûre ûz marmelsteine
die stat vil schône alumbe zôch,
diu was sô gar unmâzen hôch
getriben ûf dur muotgelust,
daz über si kein arembrust
- 17355
- geschiezen mohte noch kein boge.
wær al die welt mit ir gezoge
derfür gevallen bî der zît,
der solte si kampf unde strît
mit ir kraft gegeben haben.
- 17360
- dâ giengen umbe zwêne graben,
die wâren ûzer mâzen tief.
ein wazzer drinne alumbe lief,
daz die graben mahte vol.
mit türnen was gezieret wol
- 17365
- diu mûre in allen enden.
man warf wol mit den henden
ab eime, dâ der ander stuont.
er tet alsam die tôren tuont,
swer si gedâhte erstrîten.
- 17370
- man dorfte in keinen zîten
nie bezzer stat beschouwen.
dâ wâren an gehouwen
ûz marmel siben porten,
die stunden z' allen orten
- 17375
- behuot vor itewîze
und wâren gar mit vlîze
gezieret hinden unde vor.
ein burc ob iegelichem tor
stuont vil harte wunneclich,
- 17380
- dar în gezogen hete sich
ein fürste biderbe unde snel.
in iegelichem kastel
saz ein herzoge stæte,
der tûsent ritter hæte
- 17385
- und geltes zehen tûsent marc.
diu siben tor schœn unde starc
alsus besetzet wâren.
huot unde vride bâren
diu castel und die ritter in.
- 17390
- die türne gên den lüften hin
wâren ûf ze berge erhaben.
sô vil erhœhet vür die graben
was diu mûre wunneclich,
sus vil erhœhet heten sich
- 17395
- die türne vür die mûre glanz.
die steine kreftic unde ganz,
mit den diu mûre was bereit,
die truogen schœner varwe cleit,
daz liehten schîn den ougen bôt.
- 17400
- si wâren gel, grüen unde rôt,
wîz, brûn und als ein lâsûr blâ.
die türne stuonden alle dâ
mit blîe wol bedecket
und wâren drûf gestecket
- 17405
- knöpf überguldet schône.
mit rîcher koste lône
gezieret was diu selbe stat.
sô lûterbære und alsô glat
was ir gazzen esterich,
- 17410
- daz man ersach dar inne sich
reht als in eime spiegel,
wan er enwas von ziegel
erziuget niht sô reine.
er was von marmelsteine
- 17415
- geworht nâch rîchen sachen.
swer Troye alsus hiez machen,
der solte leben iemer!
sô rîche liute niemer
in keiner stat gehûsent.
- 17420
- dâ wâren zehen tûsent
burger inne sezhaft,
die fürstenlicher hêrschaft
dâ wielten algelîche.
si wâren künige rîche,
- 17425
- margrâven unde herzogen.
diu schrift enhât uns niht gelogen,
diu von der stat die wârheit saget.
kein hûs dar inne was betaget,
daz iht anders wære,
- 17430
- wan alsô wunnebære,
daz ez niht schœner mohte sîn.
ez was eht allez marmelîn,
swaz von bûwe drinne was.
vil manic hôher palas
- 17435
- stuont dar inne schône enbor,
an dem die louben wâren vor
und der wende mûre
mit golde und mit lâsûre
geverwet und gezieret.
- 17440
- die steine wol gevieret
von bilden wâren schône ergraben.
dâ was vollendet unde erhaben
rîlichez werc in manige wîs.
reht als ein irdisch paradîs
- 17445
- diu stat erwünschet dûhte,
wan si gar schône lûhte
von rîchen dingen manger slaht.
si was nû bezzer vil gemaht
denn ê, daz sont ir wizzen.
- 17450
- der künic wol geflizzen
het ûf die veste wunneclich
mit koste und mit gezierde sich.
Ouch hete er einen turn gemaht
ûz marmelsteine vil geslaht,
- 17455
- der stuont enmitten in der stift.
uns seit von im diu wâre schrift,
er læge ûf einem velse hôch,
des lenge sich ze berge zôch
fünf hundert clâfter über sich.
- 17460
- ez wart nie turn sô vesteclich
noch sô rehte schœne erdâht.
er was mit vlîze vollebrâht
ûz grôzen quâdersteinen.
die gâben alle reinen
- 17465
- und ûz erwelter varwe schîn.
gesmelzet und gemâlet drîn
was beidiu lâsûr unde golt.
durch küniclicher êren solt
was dar an besunder
- 17470
- vil manic wildez wunder
gebildet und gehouwen.
die burger mohten schouwen
ab sînen hôhen zinnen,
swes ieman dâ beginnen
- 17475
- kund in dem lande und ûf dem mer.
kein werc noch keiner slahte wer
moht in ervehten mit gewalt.
diu rîcheit was sô manicvalt,
diu von gezierde lac dar an.
- 17480
- ez hete manic wercman
an im bewæret sînen list.
swaz meister in den landen ist
bî Rîneund bî der Elbe,
die kunden ein gewelbe
- 17485
- von künsterîchen sachen
sô starkez niht gemachen,
als einez an dem turne lac.
mîn zunge niht ergründen mac
mit worten sîne koste rîch.
- 17490
- ez wart ûf erden sîn gelîch
nie beschouwet noch erkant.
in manic wildez einlant
gie durchliuhtic schîn dervon.
der turn der was Ylîon
- 17495
- geheizen und genennet.
sîn name wîte erkennet
von sîme glanzen schîne was.
der künic einen palas
gebiuwen hete nâhe dran,
- 17500
- daz man nie schœner hûs gewan
noch alsô keiserlichen sal.
ûz marmel was er über al
geworht nâch spæhen sinnen
und schein gewieret innen
- 17505
- mit golde und mit gesteine.
von zêderholze reine
was allez sîn gezimber.
glanz unde niht ze timber
diu venster alle wâren,
- 17510
- diu lieht dem hûse bâren
von dem wunneclichen tage.
man dorfte nâch der schrifte sage
nie venster baz gezieren.
von löubern und von tieren
- 17515
- wâren si gehouwen.
swer wunder wolte schouwen
von meisterlichen dingen,
der lie sîn ougen swingen
an ir siule sinewel,
- 17520
- dâ manic vremdez capitel
stuont an gesniten unde ergraben.
der palas hôhe was erhaben
und stuont enmitten in der stat,
als in der künic setzen bat
- 17525
- und sîne tugentrîche süne.
ir sülnt gelouben, daz sîn büne
mit golde wol gezieret schein
und daz vil manic edelstein
dar ûz vil schône lûhte.
- 17530
- sîn esterich der dûhte
von marmel ûzer mâze fîn.
ein krône was gehenket drîn,
dâ kerzen ûfe brunnen,
diu gleiz gelîch der sunnen
- 17535
- von glanzen margarîten.
an orten unde an sîten
was der küniclîche sal
sô wol gezieret über al,
daz man nie rîcher hûs gesach.
- 17540
- schôn übersilbert was sîn dach
und schein als ein gestirne,
wan er enwas niht virne,
er lûhte gar niuw unde frisch.
der sal enhete keinen tisch,
- 17545
- der unedel möhte sîn.
si wâren alle zipressîn
und wol ze rehter mâze breit.
mit golde wunneclich erleit
stuonden si gemeine
- 17550
- und wol mit helfenbeine
gespenget an den orten.
wie künde ich iu mit worten
den pallas vollerüemen?
mit rede ich niht geblüemen
- 17555
- mac den küniclichen prîs,
der an im lac in manige wîs.
Er was vil bezzer denne guot,
wan in dur vrîen übermuot
Prîant gebiuwen hete wol.
- 17560
- swaz ich iu noch entsliezen sol,
daz habent niht für einen troum!
vor dem palas ein rîcher boum
sich hete gar entspreitet
und was sô wît gebreitet
- 17565
- von künsterîcher sache,
daz drunder mit gemache
sâzen hundert ritter wol.
der boum stuont vögellîne vol,
diu süeze dœne sungen.
- 17570
- gewahsen unde entsprungen
was niht der boum von rehter art,
mit listen er gemachet wart
vil rîlich unde wunnesam.
des boumes wurzel und sîn stam
- 17575
- diu beidiu wâren silberîn.
sîn este lûter guldîn
sach man dâ verre schînen;
diu bleter ûz rubînen
und von smâragden wâren,
- 17580
- diu gâben unde bâren
erwelten unde reinen glast.
dâ clanc ein iegelicher ast
in wunneclicher wîse,
swenn er gerüeret lîse
- 17585
- wart mit handen eteswâ.
wîz, brûn, gel, rôt, grüen unde blâ
diu vögellîn drûf glizzen.
man hete sich geflizzen
ûf si mit listen reine.
- 17590
- si wâren von gesteine
gewürket ûzer mâze vîn.
diu selben glanzen vögelîn
diu wâren des betwungen
mit listen, daz si sungen
- 17595
- den winter und die sumerzît.
ir stimme lûte enwiderstrît
den liuten in diu ôren clanc.
swer dâ gehôrte ir süezen sanc,
dem wart vil hôher muot gegeben.
- 17600
- si stuonden sam si kunden leben
und heten wunneclichen braht.
seht, alsô wâren si gemaht
von nigromantîe.
Prîant der wandels vrîe
- 17605
- het an si koste vil geleit.
swenne er wolte sîn gemeit
und werden rehte vröudenhaft,
sô gienc er und sîn ritterschaft
hin zuo dem boume wunneclich.
- 17610
- dar under liez er danne sich
ûf ein gestüele reine,
daz was von helfenbeine
erziuget und ûz golde lieht.
der Endiam und Uztrieht
- 17615
- erfüere und aller künige lant,
ein rîcherz würde niht erkant
noch beschouwet drinne.
nâch wîser liute sinne
der boum und daz gestüele was
- 17620
- sô wol gewürket, als ich las,
daz alle die des jâhen,
die ez mit ougen sâhen,
sô kürlich werc enwürde nie
geworht ûf al der erden hie.
- 17625
- An dem erwelten bûwe lac,
swaz rîlich kost geheizen mac
und edel werc genennet ist.
man hete maniger hande list
mit hôhem vlîze drûf gewant.
- 17630
- der palas wunneclich erkant
gezieret was mit sinne.
die göte wâren drinne
an silber unde an golde ergraben
und ob in allen hôch erhaben
- 17635
- der minne got, her Jûpiter.
in hete wol nâch sîner ger
der künic dâ gezieret
und allenthalp gewieret
mit glanzen gimmen schône.
- 17640
- in eime rîchen trône
ob sîme tische er hôhe saz.
sô Prîamus tranc oder az,
sô sach er under ougen im.
swaz ich von der hystôrje nim,
- 17645
- daz künde ich hie ze tiute.
sich heten wîse liute
geflizzen ûf daz bilde sîn.
daz gap sô liehtebæren schîn,
daz mich sîn iemer wundert.
- 17650
- sîn glanz wart ûz gesundert
vor al der göte bilden,
die man dâ spurte in wilden
gebærden an der mûre.
sô wunneclich figûre
- 17655
- wart nie bekant, des bin ich wer,
als an im truoc her Jûpiter,
der in dem sal gebildet was.
swer in den schœnen palas
des morgens vruo gienc unde trat,
- 17660
- der neic der wunneclichen stat,
dâ daz bilde wart gesehen.
er wânde, im solte wol geschehen
den tac von sîner heilikeit,
swenn er von êrst dervür geschreit
- 17665
- und ez mit ougen an gesach.
ez truoc von golde ein rîchez tach
und eine decke reine.
lieht unde vremde steine
dar ûz vil schône brunnen.
- 17670
- nie bilde wart gewunnen,
des clârheit im gelîche.
Prîant der sælden rîche
der hete an sînen bû geleit
sô küniclîche rîcheit,
- 17675
- daz nieman in mit worten
geprîsen z'allen orten
nâch volleclicher wirde mac.
unz an den jungestlichen tac
wirt beschouwet niemer mê
- 17680
- kein veste, diu sô schône stê,
sô Troye stuont, diu wîte.
ouch wart bî keiner zîte,
die gerne z'allen zû
kein stat von alsô rîcher art
- 17685
- gebiuwen ûf der erden.
ir hôhen unde ir werden
burger die wâren alle
gefrîget vor dem valle,
der mannes wirde letzet.
- 17690
- ez wart nie stat besetzet
mit frumen liuten alsô wol.
si was der ritterschefte vol,
die gerne z'allen zîten
nâch êren kunden strîten.
- 17695
- Nû daz der künic Prîamus
die stat gebiuwen hete alsus
und allez, daz ich hân genant,
dô wart erhœhet alzehant
sîn küniclich gemüete.
- 17700
- er fröute sich der güete,
der wunder an der veste lac.
doch wizzent, swaz er wunne pflac,
diu was mit sorgen undersniten.
in sîne vröude wart gebriten
- 17705
- swær unde bitterlîche nôt,
wan er den angestbæren tôt
betrûrte, den sîn vater nam
und manic ritter lobesam,
den im die Kriechen sluogen.
- 17710
- möht er sîn leit mit fuogen
wol an in gerochen hân,
daz hæte er gerne dô getân
mit lîbe und mit dem guote.
swenn er in sînem muote
- 17715
- gedâhte an alte smerzen,
sô dente er ûz dem herzen
vil manigen tiefen siufzen lanc.
wît unde breit wart sîn gedanc
den âbent und den morgen.
- 17720
- der helt begunde sorgen
dar ûf mit ganzer stæte,
wâ mite er wider tæte,
waz von den Kriechen im geschach.
daz man im sîne stat zerbrach
- 17725
- und im sîn vater wart erslagen,
daz wolte er niht sô tiure clagen,
sô daz der künic Telamon
mit sîner swester was gewon
friuntschefte bî den jâren
- 17730
- und daz man im die clâren
gezücket hete in roubes wîs.
daz laster und den unprîs
liez er im an sîn herze gân
und hete gerne widertân
- 17735
- die schemelichen smâheit.
er wolte rechen sîniu leit
und mêrte sînen kumber,
sô noch vil manic tumber
ein ungemüete brichet,
- 17740
- biz er sîn leit gerichet
ze manicfalter swære.
swer alsô wîse wære,
swenn im ein schade geschæhe,
daz er den übersæhe,
- 17745
- dur daz im wirs gelünge niht:
der möhte veiger ungeschiht
wol eteswenne sich erholn.
kan er vertragen und verdoln
dekeiner slahte schedelîn
- 17750
- und wil des gerne vlîzic sîn,
daz er zehant gereche sich,
sîn krankez leit wirt grœzlich
und wahset drûz ein grôzer schade.
der wîse niht ze herzen lade
- 17755
- sîn ungemach ze sêre,
dur daz er niht gemêre
mit leide sînen smerzen.
swer allez daz ze herzen
wil mûren, daz im ist geschehen,
- 17760
- der wirt vil selten vrô gesehen
und muoz in sorgen alten.
man lâze got des walten,
des man gebüezen niht enkan.
er dûhte mich ein tumber man,
- 17765
- der allez daz wolt anden
mit herzen und mit handen,
daz im geschæhe z'aller zît.
swem ungemach ze nâhe lît,
der wirt an sælden heiser.
- 17770
- weizgot, ein rîcher keiser
mac allez daz gerechen niht,
daz in den landen im geschiht.
Diz wart an künic Prîamô
bewæret unde erzeiget dô;
- 17775
- dem wart sîn altiu riuwe
sô vrisch und alsô niuwe,
daz er si gar ze vil gerach,
wan sich diu râche sîn gebrach
in grôzez ungelücke.
- 17780
- sîn heil in armiu stücke
ze jungest wart zerschrenzet.
zerstœret unde engenzet
wart sîn erweltiu hêrschaft.
ûf sîner veste magenkraft
- 17785
- het er sô rîche zuoversiht,
daz er sich langer sûmde niht
und er dô keine stunde beit.
er wart zehant dar ûf bereit,
daz er sîn leit geræche.
- 17790
- des huop er ein gespræche
ze Troye in sîner schœner stat.
er hiez dâ für sich unde bat
die fürsten ûz dem lande komen,
die wurden alle dâ genomen
- 17795
- ûf sînen küniclichen sal.
dar zuo besante er über al
sîn ûz erwelte ritter.
den grimmen schaden bitter,
der von den Kriechen im geschach,
- 17800
- clagt er in aber unde sprach:
ir herren algelîche,
die mir und mînem rîche
ze dienste sint gebunden,
ir hânt in mangen stunden
- 17805
- mit ellentrîchen handen
ze staten mir gestanden,
dâ von getriuwe ich noch, daz ir
gern unde willeclîche mir
geruochent helfe bieten.
- 17810
- sît ir iuch mit mir nieten
went übels unde guotes,
sô bin ich ouch des muotes,
daz ich niht von iu scheide
lîp unde guot die beide
- 17815
- die wîle, daz ich leben sol.
ir wizzent leider alle wol
den schaden und daz ungemach,
daz von den Kriechen uns geschach,
und wie daz ungerochen ist:
- 17820
- des habe ich nû bî dirre vrist
iuch her besant ûf mînen sal.
nû wil ich biten über al,
daz ir gedenkent wol dar an,
daz ir sint mîne dienestman
- 17825
- und mir nû helfent anden
daz leit mit vrechen handen,
daz uns allen ist getân.
welt ir ze staten mir gestân,
wir rechen uns in kurzen tagen.
- 17830
- an ir guote und an ir kragen
werden si veig unde mat,
wan Troye diu werlîche stat
ist worden alsô veste,
daz wir die vremde geste
- 17835
- dar inne fürhten cleine.
læg al diu welt gemeine
dervor mit werken und mit her,
wir möhten uns mit hôher wer
dar inne wol gevristen.
- 17840
- mit kreften noch mit listen
wirt niemer si geletzet,
ouch wart nie stat besetzet
mit fromen liuten alsô wol.
ob ich gerechen iemer sol
- 17845
- mîn leit, daz mac nû wol geschehen,
sît daz kein veste wirt gesehen
sô werlîch ûf der erde,
sô Troye diu vil werde
an liuten ist und an ir kraft.
- 17850
- nû dar! getriuwe ritterschaft
und ûz erwelten fürsten,
lânt iuch gemeine dürsten
in herzen unde in muote
nâch der vînde bluote,
- 17855
- der craft uns schaden hât getân.
geruochent mir ze helfe stân
und sprechent alle nû dar zuo,
waz iu gevalle, daz ich tuo
und wes ich nû beginne.
- 17860
- mir râte ûz sîme sinne
daz beste ein iegelicher man.
waz grîfe ich nû zem êrsten an?
des werde ich underwîset hie.
sô durft enwart mir râtes nie,
- 17865
- noch helferîcher lêre.
mîn leben und mîn êre
wil ich ûf eine wâge laden,
old ich gereche mînen schaden.
Mit disen worten unde alsus
- 17870
- der werde künic Prîamus
dô suochte sîner liute rât,
daz er gereche die getât,
diu von den Kriechen im geschach.
und als er z'in alsus gesprach,
- 17875
- dô giengens' und berieten sich,
waz si dem herren lobelich
z'antwürte solten bieten.
nû daz si sich berieten,
dô gertens' algemeine,
- 17880
- daz im Hector der reine
entsliezen solte ir aller muot.
der gie dô zuo dem künige fruot
und sprach alsus dô wider in:
der fürsten willen unde ir sin,
- 17885
- herr unde vater, den sag ich,
wan si des hânt gebeten mich,
daz ich ir aller rede tuo.
si wellent iu spât unde fruo
mit triuwen undertænic wesen
- 17890
- und mit iu sterben und genesen,
als in daz reht gebiutet.
si hânt mir daz betiutet
und algemeine hie geseit,
daz si mit kreften iuwer leit
- 17895
- iu wellent helfen rechen.
ich hôrte si daz sprechen,
swaz in dar umbe sol geschehen,
daz si bî namen wellent sehen,
ob si mit keinen dingen
- 17900
- die Kriechen mügen bringen
ze schedelichem valle.
doch râtent si daz alle,
daz ir geruochent balde z'in
zû senden einen boten hin,
- 17905
- der allez ir geverte spehe
und ouch mit rede an in besehe,
ob si ze buoze wellent stân
des schaden, der iu sî getân
an liuten unde an mâgen.
- 17910
- ir sult des heizen vrâgen,
waz ir bezzerunge sî
dar umbe, daz ir worden vrî
sint iuwers vater von ir hant.
iu sî zerstœret iuwer lant
- 17915
- und manic ander leit geschehen,
daz wellent ir gar übersehen
und allez lân belîben,
dur daz si niht vertrîben
iuch von hôhen êren gar
- 17920
- und iuwer swester wunnevar
iu geruochent wider geben,
diu lange ir tugentrîchez leben
dâ sunder wirde swende,
daz man ze Troye sende
- 17925
- die clâren und die wol gesiten,
des sult ir si gemeine biten.
Ouch heizent in daz, herre, sagen:
daz iuwer vater sî erslagen,
daz bringe iu leides niht sô vil,
- 17930
- sô daz man si dâ kebsen wil
und anders hân, denn ir gezeme.
der iu daz laster abe neme
an der juncfrouwen hôchgeborn,
ir welt belîben âne zorn
- 17935
- und alle schult verkiesen.
müez aber si verliesen
ir wirde aldâ ze lande,
daz bringe iu manger hande
leit vor aller swære.
- 17940
- seht, herre, disiu mære
enbietent in ir landes kreiz,
sô prüeve ich daz wol unde weiz,
daz si versmâhent diz gebot.
si dunket iuwer rede ein spot
- 17945
- und machent alle drûz ir schimpf.
daz wirt iu denne ein guot gelimpf
dar zuo, daz man in widersage
und man niht langer in vertrage
den schaden und die schande,
- 17950
- daz wir alhie ze lande
wurden gar von in verhert.
swenn iuwer bote z'in gevert
und iuwers willen in vergiht,
swaz in dar nâch von iu geschiht,
- 17955
- daz wirt mit êren in getân,
sô daz wir des kein laster hân,
ob wir uns rechen an ir kragen.
man sol in allen widersagen,
ê daz man si mit strîte
- 17960
- bestê ze dirre zîte.
Der rât den künic dûhte guot.
der fürsten willen unde ir muot
wolt er vollenden âne zorn.
ein bote wart von im erkorn
- 17965
- und von den herren allen,
des herze was gevallen
in witze und in bescheidenheit.
diu sælde was ûf in geleit,
daz er fuor ûf der êren spor.
- 17970
- geheizen was Antênor
der selbe ritter ûz genomen
und was ein herre vollekomen
an lîbe und an geslehte.
er hete von lantrehte
- 17975
- gelernet an der schrifte gnuoc.
sîn zunge ein edel sprâche truoc
und was unmâzen redehaft.
ouch hete er eine grâveschaft
und was des lîbes gar ein helt.
- 17980
- ze boten wart er ûz gewelt
von den fürsten alzehant
und zuo den Kriechen hin gesant
von Prîande ân underbint.
er hete guoten segelwint
- 17985
- und eine vranspüetige vart.
der grâve wîs von rîcher art
nû daz er hin ze Kriechen kam,
dô vant der bote lobesam
die fürsten algelîche.
- 17990
- er kôs dâ künige rîche
und landes herren ûz genomen,
die wâren dâ z' ein ander komen
an ein gespræche z' eime tage.
si wurden nâch der schrifte sage
- 17995
- vil samenthaft dâ funden
und wolten bî den stunden
des landes dinc berihten
und eteswaz verslihten,
daz bî der zît uneben stuont.
- 18000
- si tâten als die herren tuont,
die landes unde liute pflegent
und sich dar ûf mit vlîze wegent,
daz guot gerihte werde schîn.
ein lant heizet Salamîn,
- 18005
- dâ was genomen hin der tac.
des selben künicrîches pflac
her Thelamon, als ich ez las.
gezogen daz gespræche was
dar in sîn hûs besunder.
- 18010
- von liuten was dâ wunder
und ritterschefte ein michel teil.
der dinge wart der bote geil,
der zuo den Kriechen was gesant.
daz er die landesherren vant
- 18015
- gemeine und algelîche,
des wart er vröuden rîche.
Het er si bî den stuonden
niht samenthaft dâ funden,
sô wære im kumber worden schîn,
- 18020
- wan er besunder müeste sîn
z' ir iegelichem sîn geriten.
er gie nâch tugentlichen siten
für si gezogenlichen dan.
als der vil schône reden kan,
- 18025
- sus warp er sîne boteschaft.
er sprach: ir herren tugenthaft
von Kriechen algelîche,
der werde künic rîche
von Troye, Prîamus genant,
- 18030
- der hât ze boten mich gesant
vür iuwer angesiht dâ her,
dur daz ich sînes herzen ger
mit worten iu betiute.
ir werden hôhen liute,
- 18035
- er hiez iuch vrâgen alle,
wan iu daz wol gevalle,
daz ir büezent im den schaden,
dâ mite er von iu wart geladen
bî sînes vater zîte,
- 18040
- den ir an eime strîte
ze tôde sluogent âne schult.
ez wart mit grôzer ungedult
an im gefrevelt starke.
sîn volc und sîne marke
- 18045
- vertribent ir gar ûf ein ort.
sîn guot und allen sînen hort
in roubes wîs ir nâment.
ir fuorent unde kâment
verholne sunder widersagen
- 18050
- in sîn rîche bî den tagen
unde erslichent sîne stat.
an êren unde an wirde mat
wart im von iu gesprochen.
zerstœret und zerbrochen
- 18055
- wart im sîn veste wunneclich.
er hât von iu genietet sich
verlüste manger hande:
an liuten unde an lande
wart im grôz ungemüete schîn.
- 18060
- Esîonâ diu swester sîn
von Troye wart gezücket
und ist ir lop verdrücket
noch hie ze lande sêre.
daz riuwet in noch mêre
- 18065
- denn allez, daz er hât verlorn.
daz man die frouwen hôchgeborn
hât anders, denne ir schône stê,
daz tuot im alsô rehte wê,
daz er dâ von ze herzen
- 18070
- vil manger hande smerzen
und inneclîche swære treit.
im ist vil manic herzeleit
von iu getân, dar umb er nie
dekeine bezzerunge enpfie
- 18075
- noch keiner slahte buoze enpfant.
dâ von sô hât er mich gesant
her in diz künicrîche
und heizet iuch gelîche
und algemeine biten hie,
- 18080
- daz ir geruochent eteswie
ze buoze sîner hende stân
der dinge, der im sî getân
von iu gar unverschuldet.
swaz er verlüste duldet
- 18085
- an liuten unde an rîcher habe,
daz wil er allez lâzen abe
mit willeclichen henden,
dur daz ir widersenden
geruochent im die swester sîn.
- 18090
- wirt im diu werde künigîn
ze Troye wider heim gesant,
er wil verkiesen alzehant,
daz man den vater im ersluoc
und swaz er schaden ie getruoc
- 18095
- an liuten unde an lande wît.
sît ir nû bî ein ander sît,
sô sprechent vil gelîche,
waz ir dem künige rîche
enbieten wellent alle.
- 18100
- swaz iu nû wol gevalle,
daz lânt mich wizzen hie zehant,
sô tuon ich ez dâ heime erkant.
Den Kriechen was diu rede unwert,
daz von Prîande wart gegert
- 18105
- buoz unde bezzerunge alsô.
daz ieman z' in getorste dô
dekeine vorderunge hân,
daz dûhte si niht wol getân
und wart ir muote swære.
- 18110
- smæh unde gar unmære
was in des grâven boteschaft.
si giengen ûz dô samenthaft
an ein gespræche drâte
und wurden des ze râte,
- 18115
- daz Thelamon der stæte
ir aller rede tæte
und er für si gemeine
besunder unde aleine
dem boten gæbe antwürte dâ.
- 18120
- sît daz diu schœne Esîonâ
was dâ heime in sîner wer,
sô dûhte reht der fürsten her,
daz er umb ir getriuwez leben
billîche antwürte solte geben.
- 18125
- Nû tet er ouch die gerne gnuoc.
sîn herze in ûf den willen truoc,
daz er gie zuo dem grâven hin.
er smierte in zorne wider in
und sprach im vîentlichen zuo:
- 18130
- daz ich der Kriechen rede tuo,
des bin ich hie von in gemant.
der iuch ze boten hât gesant
und den ir hânt genennet,
der ist gar unbekennet
- 18135
- den herren allen unde mir.
von eime künige sagent ir,
der Prîant sî geheizen,
des name in disen kreizen
seltsæne ist unde wilde.
- 18140
- weizgot, wir hân sîn bilde
beschouwet selten und gesehen.
swaz im ze schaden ist geschehen,
daz süln wir spâte gelten.
er sol von uns vil selten
- 18145
- enpfâhen bezzerunge.
der fürsten samenunge
erkennet sîner dinge niht,
ouch ist mir selber sîn geschiht
gar vremde worden mîniu jâr.
- 18150
- friunt, ich enahte niht ein hâr
ûf in und sîner lande kreiz,
iedoch erkenne ich unde weiz,
wie Troye wart zerstœret.
ich hân die schult gehœret,
- 18155
- dur die si wart zerbrochen.
ein laster wart gerochen
an ir, daz uns aldâ geschach,
dô man die selben stift zerbrach
und man die schœnen stat gewan.
- 18160
- seht, dô was ich der êrste man,
der in die guoten veste reit.
ich vaht des mâles unde streit
sô werlîch und sô schône,
daz man mir gap ze lône
- 18165
- des küniges tohter wunnesam.
ich fuorte drûz Esîonam
die glanzen und die clâren.
si wart mir bî den jâren
ze solde und z'einer stiure.
- 18170
- noch ist diu vil gehiure
in mîner stæteclichen pflege.
die süezen wil ich alle wege
ze frouwen und ze wîbe hân.
daz beste hân ich ir getân,
- 18175
- des ich geflîzen kunde mich.
daz dunket mich gar mügelich.
daz ich ir noch daz selbe tuo.
dâ hœret nôt und angest zuo,
daz man der schœnen mich verher,
- 18180
- daz ich si gebe ûz mîner wer
und ich si widersende,
daz ist ein rede ân ende
und ein gar üppeclicher sin.
wer gæbe ouch eine âmîen hin,
- 18185
- diu schœner ist denn alliu wîp?
ich sol ir wunneclichen lîp
hân in vil hôher werdekeit.
dâ von ist ez ein tumpheit,
daz ieman in der welte gert,
- 18190
- daz ich die küniginne wert
lâzen süle ûz mîner pfliht.
zwâr, ich engibe ir von mir niht
und solte ich leben iemer.
gewinnen müeze ich niemer
- 18195
- wird unde ritters êre.
gevorschet iemer mêre
kein bote nâch der künigîn,
ez muoz sîn bitter ende sîn
und wirt sîn grimmeclicher tôt.
- 18200
- iu selben ist vil harte nôt,
daz ir von hinnen gâhent,
durch daz ir niht enphâhent
verlust vil manger hande.
ob ir der Kriechen lande
- 18205
- genâhent iemer für diz mâl,
sô wizzent, daz ir sunder twâl
verloren hânt den lebetagen.
niht anders kan ich iu gesagen,
wan daz ir strîchent hinnen,
- 18210
- ê daz ir hie gewinnen
müezent schaden unde leit.
ich nim ez ûf die werdikeit,
diu ritters namen ist gegeben,
ez wirt iuch kosten iuwer leben,
- 18215
- ob ir gesant her über sê
ze boten werdent iemer mê.
Der werde grâve Antênor
dô kêrte ûf sîner strâze spor
und îlte snelleclichen dan.
- 18220
- er tet alsam der wîse man,
der lützel widerrede pfligt,
swâ man sîn wort unhôhe wigt
und man dar ûf niht ahten wil.
er dâhte, daz er schaden vil
- 18225
- enphienge, ob er iht spræche mê:
dâ von gesweic er vil dest ê
und was ein michel witze daz.
swer anders niht wan argen haz
mit sînen worten mac erjagen,
- 18230
- der mac vil gerne stille dagen
und lützel rede trîben.
diu wort lâz er belîben,
diu schaden bringent unde nît.
dar an gedâhte bî der zît
- 18235
- der grâve tugentrîchgemuot.
er hôrte wol, daz man vür guot
dâ sîner worte niht enpfienc,
dâ von er hein ze schiffe gienc
und sîne rede leite nider
- 18240
- und îlte gegen Troye wider
und kam ze Prîamô gevarn,
der in mit sînen hovescharn
enpfienc gar minneclichen dô,
wan er wart sîner künfte vrô
- 18245
- und al sîn werdiu ritterschaft
diu kam gedrungen herhaft
und bôt im süezen willekomen.
Prîant der künic ûz genomen
dô vrâget in der mære,
- 18250
- waz von den Kriechen wære
enboten im her wider hein.
dô sprach der künic sunder mein
und âne valscheit wider in:
der Kriechen willen und ir sin
- 18255
- künd ich iu, herre tugenthaft.
si wegent iuwer boteschaft
lîht unde ringe alsam ein spriu
und wellen widerspænic iu
mit worten und mit werken sîn.
- 18260
- si dûhte ein schimpf diu rede mîn
und swaz ich in geseite.
und wære ich niht gereite
von in gestrichen unde komen,
ich müeste ein ende hân genomen
- 18265
- und einen grimmelichen tôt.
her Telamon daz lant verbôt
bî leben und bî lîbe mir,
wan er niht wizzen wil, daz ir
ein künic hie ze Troye sît.
- 18270
- er sprach, daz er bî sîner zît
unde in allen sînen tagen
nie von iu gehôrte sagen
noch gesingen, herre mîn.
Esyonam die künigîn
- 18275
- schôn unde wunneclich gestalt
wil er dâ triuten mit gewalt
und iemer hân in sîner pfliht.
herr, ich enkan iu anders niht
gesagen hie ze tiute,
- 18280
- wan daz ir iuwer liute
und iuch selber dar nâch hânt,
daz ir den Kriechen widerstânt
und iuch an in gerechent.
si jehent unde sprechent,
- 18285
- swaz iu ze leide sî getân,
des wellent si ze buoze stân
vil selten oder niemer.
weizgot, ir müezent iemer
âne ir bezzerunge sîn.
- 18290
- des râte ich ûf die triuwe mîn,
daz ir gedenkent wol dar zuo,
daz man den schaden widertuo,
der iu geschehen ist von in.
ir sult dar ûf herz unde sin
- 18295
- mit hôhem vlîze wenden,
daz wir mit vrechen henden
ein urliug an gevâhen.
doch sult ir iuch vergâhen
ze sêre niht bî dirre zît.
- 18300
- gedenkent, herre, wie der strît
enphâhe ein lobelichez zil.
swer sich des underwinden wil,
daz er bestê griuslîchiu dinc,
der trahte, wie der ursprinc
- 18305
- ze sæleclichem ende kume.
jô lît an aller dinge drume
prîs oder missewende.
wie stât ein armez ende
an einem rîchen urhabe.
- 18310
- man tuo sich des beginnes abe,
des man niht vollebringen müge,
sô daz sîn zil den êren tüge
und werdeclichem prîse.
der biderbe und der wîse
- 18315
- der ahte, wie sîn anevanc
gewinne guoten ûzganc,
sô mac er leides sich entladen.
wir hân genomen grôzen schaden,
den suln wir alsô rechen,
- 18320
- daz nieman dürfe sprechen,
daz unser leit gemêret sî.
belîbet uns diu sælde bî,
daz wir den vînden an gesigen,
sô wirt verdrücket und verswigen,
- 18325
- swaz uns ze laster ie geschach.
wir mügen allez ungemach,
daz wir nû lange dulden,
mit vröuden übergulden,
wirt uns ein rîlich ende schîn.
- 18330
- herr, ez enmac niht anders sîn,
wan daz wir setzen uns ze wer.
geloubent, daz der Kriechen her
versmâhet iuwer hôch gebot.
si dunket iuwer rede ein spot
- 18335
- und iuwer vorderunge z' in.
des kêren leben unde sin
dar ûf bî disen zîten,
daz wir alsô gestrîten,
swenn unser kriec ein ende neme,
- 18340
- daz er den êren wol gezeme.
|