BIBLIOTHECA AUGUSTANA

 

Konrad von Würzburg

um 1225 - 1287

 

Der Trojanerkrieg

 

Vorbereitungen zur zweiten Schlacht

Achill und der Bleiklumpen. Aufstellung der trojanischen Heere.

Aufstellung der griechischen Heere. Der Aufmarsch.

 

29569 - 30824

 

__________________________________________________________________________________

 

 

 

Sus wart gedâht dô bî der zît.

29570

si lobten alle enwiderstrît

die forme und die figûre sîn,

wan sîner liehten varwe schîn

diu gap ir ougen schœnen glast.

den hôhen und den werden gast

29575

den bâtens' algemeine,

daz er geruochte ein kleine

der sterke sîn bewæren

und er in offenbæren

begünde ein lützel sîner craft.

29580

des wart von im diu ritterschaft

gewert in kurzen stunden.

er lie sîn ellent kunden,

der starke wandels vrîe.

ein masse grôz von blîe,

29585

diu swære und ungefüege wac,

des mâles ûf dem velde lac,

die zucte er ûf geswinde.

der Kriechen ingesinde

liez er sîn ellent merken.

29590

mit creften und mit sterken

warf er daz blî ze berge dô.

von im wart ez sô rehte hô

geswenket in der lüfte kreiz,

daz im diu hœhe tet sô heiz,

29595

und ez versmalz, ê daz ez nider

kæm ûf den grüenen plân her wider.

 

Die Kriechen albesunder

des wurfes nam dô wunder

in herzen unde in muote.

29600

si sprâchen, daz der guote

wær übermæzeclichen starc.

sîn ellent er dâ niht verbarc,

noch sînes lîbes magencraft.

er lie die werden ritterschaft

29605

beschouwen frevellîchiu dinc.

der ellenthafte jüngelinc

lief sô balde, als ob er flüge.

man seit, sô man die bogen züge

und man dâ schiezen solte,

29610

daz er die strâlen wolte

mit sîme sprunge erîlen,

wan er kam vor den phîlen

geloufen iemer zuo dem zil.

er tet behendekeite vil,

29615

die manger für sîn ougen zôch.

kein pavilûne was sô hôch,

noch kein tobel dâ sô wît,

man sæhe in drüber an der zît

gewalteclichen springen.

29620

des wart von sînen dingen

geriunes vil begangen.

daz lop het er enphangen

vil gæhes in der Kriechen schar,

daz man dâ nam sîn eines war

29625

für alle ritter ûz erkorn.

man seit, ez würde nie geborn

kein jüngelinc sô frech als er.

dan unde dar, hin unde her

vlouc sînes namen werdekeit.

29630

ze Troie wart von im geseit,

daz er dâ komen wære,

des wart Hector der mære

von herzen sîner künfte vrô,

wan sîn gemüete gerte dô,

29635

daz in sîn ouge solte sehen.

er hôrte sîme namen jehen

sô manicvalter wirde,

daz er mit aller girde

nâch sîner angesihte streit

29640

und er vil kûme des erbeit,

daz im diu state geschæhe,

daz in sîn ouge ersæhe.

 

Die Griechen sind in voller Rüstung zum Kampf bereit

 

Seht, alsô was Achilles

für Troie komen, wan er des

29645

mit hôhem flîze gerte,

daz man in kamphes werte

und daz er solte strîten.

er tet dâ bî den zîten

behendeclîchiu wunder.

29650

hie mite und ouch dar under

der tac gevlozzen schiere kam,

daz der vride ein ende nam,

den Prîamus der stæte

mit den von Kriechen hæte

29655

ein halbez jâr gemachet.

dâ von sô wart gewachet

ûf daz urliuge bî der zît.

si wurden aber ûf den strît

gewarnet bêdenthalben.

29660

dem anger und den alben

wart unmuoze vil beschert.

die welde wurden und der wert

bekümbert aber schiere.

des rîches lantriviere

29665

gar inneclichez leit gewan.

sich huop dâ nôt und angest an

und wart dâ jâmer güebet.

diu stat diu wart betrüebet

bêd innerhalben und dâ vor.

29670

ir türne und alle ir bürgetor

besetzet wurden wol mit wer.

ouch wart bereit der Kriechen her

ze strîte, als im dô wol gezam.

des tages, dô der fride nam

29675

ein ende, als iu nû wart geseit,

dô wurden bêdenthalp bereit

jen ûzern und dis innern.

die grôzen mit den minnern,

die jungen zuo den alten

29680

ze strîte sich dô stalten

mit werken und mit worten.

sich heten vor den porten

gewarnet wol die geste;

ouch wurden in der veste

29685

die burger werlich funden.

diu zimier ûf gebunden

dô wâren algemeine

und daz gesmîde reine

gesliffen unde wol geveget.

29690

mit starken brücken übersteget

die graben wurden und diu mos.

diu wâfenkleider und diu ros

bereit nâch wunsche wâren.

man wolte strîtes vâren,

29695

swenn ûf der morgen bræche.

Prîant an ein gespræche

mit sînen fürsten gienc zehant,

die wurden alle dô gemant

bî sîner stæten hulde,

29700

daz si der Kriechen schulde

geruochten balde rechen.

ûf slahen unde ûf stechen

gereizet wart ir aller muot

mit worten und mit rede guot.

 

29705

Hector der ûz erwelte degen

der ritterschefte solte phlegen

mit sîner lêre z' aller stunt.

als ich iu tet dâ vorne kunt,

sô was der junge starke helt

29710

von sînem vater ûz erwelt

in allen z' eime houbetman:

des nam er sich des strîtes an

mit herzen und mit lîbe dâ.

des künges sun von Lîciâ,

29715

Glaukûn geheizen und genant,

der wart von im dar ûf gemant

mit süezen worten ûz erlesen,

daz er sîn helfer solte wesen,

swenn er die rotte scharte

29720

und ûf den strît bewarte

mit rehter ordenunge.

der hôchgeborne junge

bescheiden gar und ellenthaft

nam für sich dô die ritterschaft

29725

alûf des hoves platze.

den Kriechen z' eime tratze

wolt er sich dâ rottieren.

in zehen schar teilieren

daz her begunde er sâ zehant.

29730

sîn bruoder, Trôilus genant,

der ersten rotte muoste phlegen,

als im der hôchgeborne degen

mit sînen worten ûz beschiet.

er nam die ritterlichen diet

29735

in sînes schirmes huote,

wan er sich in dem muote

gar ellentrîcher sinne fleiz.

von Perse künic Misereiz

was in der schar der beste.

29740

sîn herze tugentveste

bran ûf der vrouwen minne.

noch wâren zwêne drinne,

die man in ganzer wirde vant:

Santippus einer was genant

29745

und der ander Alchamîs.

die drî durch ritterlichen prîs

daz beste gerne tâten.

si wurden wol berâten

mit glanzen wâpenkleiden.

29750

ze helfe in ûz bescheiden

driu tûsent ritter wâren,

die strîtes wolten vâren

mit witzen und mit krefte.

der selben ritterschefte

29755

gebrast an frechen muote niht.

si nam in sîner huote pfliht

der ellentrîche Trôilus.

Hector sprach wider in alsus:

dis ersten schar bevilhe ich dir.

29760

nim war mit hôhen triuwen ir

und leite si ze velde!

in offenlicher melde

var ûf des plânes acker

und sîst ze strîte wacker,

29765

sît dû der aller êrste bist.

wol an gerant halp vohten ist,

dar an soltû gedenken.

lâ dîne schar niht krenken

an herzen noch an sinne!

29770

jô gît ein guot beginne

vil dicke süezen ûzganc,

sô bringet swacher anevanc

vil ofte ein ende bitter.

dâ von, getriuwer ritter,

29775

belîp ein unverzageter man!

swer sich der êrsten juste kan

reht unde wol enthalten,

den siht man dicke walten

mit ellenthafter hende

29780

des siges an dem ende.

 

Alsus wart Trôilus gemant.

mit triuwen er sich underwant

der êrsten rotte wunnevar.

dar nâch wart dô diu ander schar

29785

vil ordenlichen ûf geleit.

Hector, der tugent nie vermeit,

der selben rotte phlegen bat

ouch einen ritter von der stat,

der kebeshalp sîn bruoder was.

29790

doch wizzent, daz er an sich las

êr, unde manheit was gewon.

geheizen Margarîton

der selbe ritter was ze namen.

dem werden und dem lobesamen

29795

diu ander schar bevolhen wart.

ein künic rîch von hôher art,

Hûpolt geheizen und genant,

wart in der selben rotte erkant

für einen ritter ûz erwelt.

29800

ouch fuor dar inne ein ander helt,

der Cupesus genennet was.

die zwêne, als ich geschriben las,

an prîse wâren vollekommen

und für die besten ûz genommen,

29805

die daz ander teil enthielt.

ir zweiger samenunge wielt

vier tûsent tîtter ûz erlesen,

die mit in sterben und genesen

des mâles wolten gerne.

29810

ir strîtes leitesterne,

der Margarîton was genant,

nam si dâ zuo im alzehant

und îlte gegen dem velde hin.

Hector der sprach dô wider in:

29815

nû dar, getriuwer bruoder mîn!

lâ dîne manheit werden schîn

und leite alsô diz ander teil,

daz wir der sigenüfte geil

von dir belîben hiute!

29820

phlic dirre werden liute

mit witzen und mit creften!

swer sich mit nôt beheften

beginne, den erlœse!

ein venre niht ze bœse

29825

solt dû der rotte schînen.

lâ sich dîn herze pînen

ze schaden allen Kriechen!

wan swâ daz houbet siechen

beginnet an der parte,

29830

dâ mac der widerwarte

wol sigehaft belîben.

dû solt ze kamphe trîben

mit werken und mit worten

die schar in allen orten,

29835

daz wirt an êren dîn bejac.

dur liuhtic lop erwerben mac

an strîte nieman alsô wol,

sô der ein houbet heizen sol

und einer rotte waltet.

29840

ob er si wol enthaltet,

man prîset in für mangen man,

wan er dâ wirt gekaphet an

mit flîze vor den allen,

der lop dâ muoz gevallen

29845

den ougen und dem herzen.

man sol den kumbersmerzen

vil gerne lîden unde tragen,

der wirde und êre kan bejagen

für manigen helt besunder,

29850

der was ze strîte munder.

 

Seht, alsô wurden bî der zit

zwô schar geschicket an den strît

mit ordenlichen worten.

diu dritte z' allen orten

29855

wart ouch bereit ûf kamphes spor,

wan si der edel Hector

dô von der ritterschefte spielt.

Pollidamas, der tugende wielt

und fürstenlicher werdekeit,

29860

der wart ir phleger, sô man seit,

unde ir houbetherre dâ.

der künic von Celoniâ,

Rêmus geheizen, als ich las,

ein orthab in der rotte was

29865

und schein der tiurste drinne.

mit creften und mit sinne

kund er bejagen hôhen prîs.

Pamfilias und Amantrîs,

die fürsten rîch und ûz erwelt,

29870

ouch wâren in der schar gezelt

für zwêne ritter ellenthaft.

diu rotte grôze magencraft

von liuten hete an sich genomen.

fünf tûsent ritter vollekommen

29875

dar în geteilet wâren,

der wâfencleider bâren

den ougen liehter varwe schîn.

Pollidamas der solte sîn

ir leiter unde ir houbetman,

29880

den rief Hector des mâles an

mit worten unde sprach im zuo:

Pollidamas mit willen tuo

daz wægest und daz beste!

die werden hôhen geste

29885

mit dîner huote dû bewar

und leite alsô die dritten schar,

daz man si werlich vinde!

var ûf den plân geswinde,

noch sûme dich niht langer!

29890

hilf uns, daz wir den anger

zem êrst besitzen und beligen!

wir mügen deste baz gesigen,

ob wir daz velt gewinnen,

ê daz dar ûf beginnen

29895

die Kriechen sich erspreiten.

daz wir mit ruowe beiten

der widersachen ûf dem wal,

daz gît in schedelichen val

und mac in werden ein verlust.

29900

ê si bereiten sich zer just

und wizzen, wie si wellen varen,

ê sîn wir an si mit den scharen

sô rehte sinneclichen brâht,

daz wir uns hânt dar ûf bedâht,

29905

waz uns daz beste danne sî.

wir machen si des siges vrî,

sô wir gewarnet halten

und nihtes mêr enwalten,

wan daz wir trahten und gehügen,

29910

wie si den prîs verlieren mügen.

 

Mit disen worten unde alsô

wart diu dritte rotte dô

ze strîte wol bereitet

und ûf daz velt geleitet

29915

rîlichen mit gezierde.

dar nâch sô wart diu vierde

geschicket balde für die stat,

die wîsen unde füeren bat

Hector den bruoder sîn zehant,

29920

der was Dêîfebus genant

und leite ûf êren sînen flîz.

er wart ân allen itewîz

der vierden rotte leitestap,

wan im daz heil vrou Sælde gap,

29925

daz er des lîbes hiez ein degen.

der schar begunde er schône phlegen

und nam sich ir mit willen an.

dâ wâren inne zwêne man,

die wol nâch prîse rungen.

29930

ir lop daz was erklungen

für manigen ritter ûz erkorn.

si wâren herren hôchgeborn

verr unde wîte erkennet.

geheizen und genennet

29935

der eine was Prethemesus,

sô hiez der ander Estreus

und was des muotes gar ein helt.

zwei tûsent schützen ûz erwelt

die brâhte man des über ein,

29940

daz si ze velde mit den zwein

begunden rîten unde zogen.

si fuorten alle starke bogen

erziuget wol ûz horne.

Hector der hôchgeborne

29945

bevalch die schar Dêîfebô.

güetlichen sprach er z' im alsô:

der vierden rotte, bruoder, phlic!

hilf uns bejagen hie den sic

und üebe dîner jugende craft.

29950

dû bist ein ritter ellenthaft

und ein vermezzen jüngelinc,

dâ von die schar ze velde brinc,

als ez gezæme ir êren!

lâ zuo der flühte kêren

29955

dekeinen, der dar under sî!

jô wirt ein her des siges frî

dur einen herzelôsen man.

ein zage vil mangen ritter kan

erwenden sîner degenheit

29960

dâ von sô sîst dar ûf bereit,

daz ir dekeiner fliehe!

dîn rât ze kamphe ziehe

die werden vremeden geste.

dû selbe tuo daz beste,

29965

durch daz si bî dir bilde nemen

und sich der zageheite schemen!

 

Hector der ûz erwelte man

den bruoder sîn alsus began

dâ lêren unde wîsen.

29970

die vierden schar mit îsen

bereit und mit geschütze

die nam an sich der nütze

und der getriuwe jüngelinc.

ûf strît wart aller sîn gerinc

29975

und sînes herzen muot geleit.

diu fünfte rotte wart bereit

dar nâch in kurzer wîle.

Hector mit sneller île

formieren si begunde,

29980

wan er si bilden kunde

vil schône, als ir gemæze was.

ein ritter hiez Pyctagoras,

der ouch sîn kebesbruoder schein

und âne wandelbæren mein

29985

wart stæte an êren funden,

den hiez er bî den stunden

der fünften rotte walten,

wan er si wol enthalten

mit hôher witze mohte.

29990

swaz lobe und êre tohte,

des lac an im ein wunder.

er was ze strîte munder,

daz er beschouwen dicke liez.

Esdrasein werder künic hiez

29995

von Grossiâ genennet,

den hete man erkennet

für den besten in der schar.

sîn wirde schein durliuhtic gar

alsam ein spiegel niuwe.

30000

noch wart ein helt getriuwe

beschouwet in der parte,

der fleiz sich êren harte

durch minneclicher wîbe lôn.

er was geheizen Filiôn

30005

und hete gar ein rîchez lant.

Doglas der herre was genant,

von dem er dar gesendet was.

er und der künic Estras

di tiursten wâren in der schar.

30010

si brâhten einen wagen dar

und einen karrich alsô rîch,

daz dâ dekeiner sîn gelîch

wart gefüeret ûf den wec.

ûz ebenô dem holze quec,

30015

daz niemer kan ûf erden

erfûlen noch erwerden,

diu reder wâren und die naben,

und was dar în nâch wunsche ergraben

rîlicher bilde zeichen.

30020

erziuget sîne speichen

ûz helfenbeine wâren,

die blanken schîn gebâren

und als ein krîde lûhten wîz.

swacheit und aller itewîz

30025

dem wagen was entwahsen.

sîn dîhsel und sîn ahsen,

die wâren lûter silberîn.

an dem erwelten glanze sîn

wart ein ouge niht betrogen.

30030

gesoten leder was gezogen

dar über z' eime tache rîch,

dem an gezierde was gelîch

dekeiner slahte kovertiur.

ez bran von golde sam ein fiur

30035

in eime rôten glaste

und was gewieret vaste

mit liehten margarîten,

die glizzen bî den zîten

verr unde schône dort her dane.

30040

vorn auf dem wagene was ein vane

gestecket, der schein grüene

und was ein löuwe küene

von blâwer sîden drîn geweben.

der stuont, als ob er künde leben,

30045

und was gekrœnet schône.

von golde schein sîn krône

gar wunneclîche, sô man seit.

sehs tûsent man ze fuoz bereit

sach man des wagens warten,

30050

die truogen hallenbarten

sêr unde wol gesliffen.

swaz si dâ mite ergriffen,

daz was ze tôde gar verlorn.

die selben heten des gesworn,

30055

si wolten ê geligen tôt,

ê si durch keiner slahte nôt

sich von dem wagene liezen schaben.

daz wal daz wolten si behaben

und sic ûf im erwerben

30060

od aber alle ersterben

des tages ûf dem grüenen plân.

seht, alsô was ir muot getân

und ir aller sin gestalt.

sô frech und alsô rehte balt

30065

fuozgengel wurden nie gesehen.

sich liezen under in dâ spehen

fünf hundert ritter hôchgemuot,

die riten ors unmâzen guot

und fuorten rîchiu wâfenkleit.

30070

diu fünfte rotte wart bereit

alsus nâch hôhen prîse.

Pyctagoras der wîse

der nam si balde in sîne phlege.

er îlte zuo der strâze wege

30075

als ein getürstic houbetman.

Hector rief in des mâles an

und sprach dô wider in zehant:

nû, sælic bruoder, sîst gemant,

daz dû die rotte lêrest

30080

und si ze strîte kêrest

mit ordenlichen witzen!

si mac daz wal besitzen

mit êren manger hande.

die vrechen sarjande,

30085

die mit dem wagene strîchent,

mit hôher maht gerîchent

an mangem ritter ûf dem plân.

wer mac ir creften widerstân

und ir gewæfen, daz si tragent?

30090

geloube, daz si prîs bejagent,

ob si niht werden underriten!

dû solt si manen unde biten,

daz si belîbent samenthaft

alsô, daz ir geselleschaft

30095

mit strîte nieman scheide:

sô wirt diu grüene heide

gerœtet gar mit bluote.

an liuten unde an guote

begênt si mortgrimmigen schaden.

30100

daz velt mit tôten wirt geladen

von ir barten grimmeclich.

ob si niht hiute scheident sich

und sich z' ein ander haltent,

ze stücken si dâ spaltent

30105

ûf der geblüemten heide

ros unde man diu beide.

 

Sus fuor diu fünfte rotte hin.

Hector der kêrte sînen sin

wîslichen ûf die sehsten schar.

30110

diu wart mit hôhen flîze gar

von im geschepfet und bereit

und ordenlichen ûf geleit,

als ez gemæze ir prîse was.

der ellentrîche Enêas

30115

der wart ir leiter unde ir voget.

er was ûf mangen strît gezoget

und kunde ir wol ze trôste komen,

des hete in Hector dô genomen

ze pfleger über si zehant.

30120

ein herre drinne wart erkant

für einen werden Sarrazîn,

der kunde ein edel ritter sîn

des lîbes und des guotes.

er schein sô freches muotes,

30125

daz er zen besten wart gezalt.

er was ein rîcher amiralt

und was geheizen Cardes.

sîn herze fleiz sich alles des,

daz lop hiez unde frumekeit.

30130

wol siben tûsent man bereit

nâch ritterlichen êren,

die sach man dur in kêren

mit willen in die sehsten schar,

der solte Enêas nemen war

30135

und si ze strîte leiten hin.

Hector der sprach dô wider in

wîslîche, als im gebære was:

vil werder fürste Enêas,

der sehsten rotte nim dich an!

30140

phlic ir als ein getürstic man,

der mangen strît gesuochet hât!

jô mac si dîner künste rât

wol ûf daz beste kêren

dû kanst si baz gelêren,

30145

denn ich bewîsen künne dich.

an dîn vil starkez ellent sich

und leite si ze strîte alsô,

daz wir des siges werden vrô!

 

Diz tuon ich, herre, sprach er z' ime

30150

mit willen ich dîn wort vernime

und leiste gerne dînen muot.

sus wart diu sehste schar behuot

und ouch geschicket ûf die vart.

dar nâch diu sibende rotte wart

30155

geschephet und gebildet.

Hector, dem unverwildet

êr unde ganziu wirde schein,

bevalch die schar ân allen mein

dem bruoder sîn, Pârîse.

30160

sît er nâch hôhem prîse

mit flîze kunde ringen,

sô muoste er si dâ bringen

ze velde ritterlich alsus.

ein helt, geheizen Perseus,

30165

des lîbes ein bewæret degen,

wart in der selben schar gewegen

für mangen ritter hôchgeborn.

er was ein herzog ûz erkorn

und hete glanzen prîs bejaget.

30170

driu tûsent ritter unverzaget

und schützen drîzic hundert

dâ wurden ûz gesundert

ze helfe sîner frechen hant.

diu sibende rotte wart gesant

30175

mit êren sus ze velde.

in offenlicher melde

nam si Pârîs ze handen

Hector, vor allen schanden

gereinet unde lûter,

30180

der sprach: geselle trûter

und ûz erwelter bruoder mîn,

die schar lâ dir bevolhen sîn,

sô daz dû si ze strîte manst!

sît daz dû selbe schiezen kanst,

30185

sô füege, daz die schützen

wol brûchen unde nützen

ir bogen unde ir strâlen.

die schicke z' allen mâlen,

daz si vor der rotte varen

30190

und si die ritterschaft bewaren

vor angestbæren phîlen,

die drunder wellen îlen

von den vertânen Kriechen.

si machent mangen siechen

30195

der sich vor in niht hüetet.

ir volc mit schozzen wüetet,

diu man erfürhten gerne sol.

gelüppes und vergifte vol

sint alle ir scharpfen gêre.

30200

dâ von dû, bruoder, lêre

die schützen algelîche

mit dîner helfe rîche,

daz si niht laz belîben

und von der schar vertrîben

30205

die leiden Kriechen hinder sich,

die mit ir phîlen engeslich

der sêle manigen lîp verherent,

ob ez niht unser schützen werent

unde ir schoz niht wider wegent

30210

mit grimmen strâlen, der si phlegent!

 

Hie mite wart diu sibende schar

geschicket ûf ir strâze var

und ûf ir snellen verte spor.

des wart des mâles Hector

30215

der ahten rotte flîzhaft,

die spielt er von der ritterschaft

mit rehter ordenunge.

si bat der freche junge

dô kêren für daz bürgetor.

30220

der werde grâve Anthênor

wart ir ze phleger dô gezelt,

wan er des lîbes was ein helt

und sich vil hôher witze fleiz.

ein künic, der hiez Panfimeiz,

30225

und Agrimanz der markîs,

die zwêne lûterbæren prîs

erwarben in der ahten schar:

si wâren vollekomen gar

an herzen unde an lîbe.

30230

durch willen stolzer wîbe

wolten si ze strîte komen

und heten craft an sich genomen

ûf kampfes âventiure.

si liezen hôhe stiure

30235

der ahten rotte werden schîn.

mit in geteilet wâren drîn

fünf tûsent ritter wol bereit,

die fuoren alle, sô man seit,

gezieret wol als engel.

30240

zwei tûsent fuozgengel

die wâren z' in verstricket.

sus wart diu schar geschicket

in grâven Anthênoris phlege.

Hector der mante in ûf dem wege,

30245

daz er daz beste riete

der ritterlichen diete

und si ze velde bræhte,

alsô daz man gedæhte

an sînen namen iemer

30250

noch sîn vergezze niemer

biz an die jungeslichen zît.

er wart gereizet ûf den strît

vil sêre bî der stunde

von sîme wîsen munde.

 

30255

Dar nâch sô wart die niunde schar

bereit mit hôhem flîze gar,

als ez ir wirde wol gezam.

Hector der ritter lobesam

begunde si formieren

30260

und ûf den strît bildieren

mit worten und mit handen.

den vater sîn Prîanden

behüeten er die rotte bat.

die fuozliut alle von der stat,

30265

der sîn gewalt nâch prîse wielt,

nam er dâ für sich unde spielt

dar ûz ein ungefüege schar.

daz volc wart z' einer rotte gar

von im geschephet alzehant

30270

und wart der vater sîn gemant

ûf sîne stæten huote.

wîslichen sprach der guote:

phlic, vater, dirre liute

und schicke si noch hiute

30275

werlichen an daz bürgetor!

belîben lâz dû si dâ vor

und heiz die porten si bewaren,

daz wir niht werden hindervaren

noch underdrungen aber nû!

30280

gedenke, vater mîn, wie dû

verlüstebæren schaden kür

und dise guoten stat verlür,

durch daz die porten alle

Troiæren z' eime valle

30285

beliben wâren unbewart

der vater dîn von hôher art

enphienc den grimmen tôt dervon.

der werde künic Lâmedon

ein bitterlichez ende kôs,

30290

durch daz die Kriechen huotelôs

ervârten dise veste.

die schadebæren geste

zuo den burgæren drungen în,

dâ von diu state muoste sîn

30295

ân allen widersaz verlorn.

herr unde vater hôchgeborn,

dâ von solt dû dich nû bewarn.

heiz für diu tor die liute varn,

die man ze fuoz hie vinde,

30300

und lâ der stete gesinde

dâ beiten unde harren

der grendel und der barren,

der sol ez hüeten unde phlegen,

und haltâ dû, getriuwer degen,

30305

dâ vor mit tûsent mannen,

der bogene sîn gespannen

unde ir strâlen ûf geleit!

ze keime dinge wis bereit,

wan zuo der sache aleine,

30310

daz dû diu tor gemeine

mit den fuozliuten wol bewarst

und mit in an die grendel varst.

 

Der werde künic Prîant

mit guoten willen dô zehant

30315

erfulte sînes sunes bete.

swaz im Hector gerâten hete,

daz tet er vil geswinde.

Troiære fuozgesinde

gemeine und algelîche

30320

nam dô der künic rîche

und îlte für die porten,

diu wart in allen orten

von im behuot mit flîze gar.

seht, alsô was diu niunde schar

30325

bescheidenlichen ûf geleit.

dar nâch diu zehende wart bereit,

der Hector selbe wolte phlegen.

der ellenthafte wîse degen

an sich vil ritterlîche las,

30330

swaz burger in der veste was

ze ros, die nam er an sich gar.

ûz in begunde er eine schar

dô schephen unde machen

und wolte die bewachen

30335

mit der vil starken huote sîn.

ein wunder liute wart dar în

geleget und geschicket,

der zal mit rede entstricket

unsanfte möhte werden.

30340

si müezen ûf der erden

von mir belîben ungezelt.

Hector gewan sô mangen helt

in sîner samenunge,

daz weder munt noch zunge

30345

ir namen kan betiuten.

swaz von strîtbæren liuten

ze ros in Troie funden wart,

die nam der helt von hôher art

in sîne ritterlichen phlege,

30350

sô daz diu stat doch alle wege

mit huote was bewachet.

diu zehende schar gemachet

wart sus von im ân allen haz

und mit gezierde michel baz

30355

gegestet und bereitet.

schôn über si gespreitet

wart sînes hôhen herzen büne.

wol drîzic unêlicher süne

Prîant sîn vater hæte,

30360

der nam Hector der stæte

sich ein teil des mâles an.

ûz in las er wol zehen man

ze helfe in sîne rotte starc.

ir name, der sich nie verbarc,

30365

wirt von mir hie kunt getân.

ir einer hiez Casibilân

und der ander Edron,

der dritte was Dinodaron

von mangem man genennet.

30370

der vierde wîte erkennet

geheizen was Anthônje.

der fünfte hiez Odônje

und wart sîn ellent wîte erkant.

Dolunt der sehste was genant,

30375

der sich in êren schouwen liez.

Rodamolus der sibende hiez

und was ein ritter ûz erwelt.

Dolotalus der ahte helt

was geheizen, als ich las.

30380

der niunde sun genennet was

ân allen spot Sinfiliens.

der zehende hiez Quintiliens

und hete liehten prîs bejaget.

die werden burger unverzaget

30385

die nam Hector in sîne schar,

dur daz diu parte wunnevar

beschirmet wære deste baz.

sîn rotte an creften niht ze laz

sô rehte grôz erlûhte,

30390

daz in des niht endûhte,

daz er die schar gemeine

verrihten möhte aleine.

 

Hector ist mit seinen Kämpen zur Schlacht bereit

 

Nû daz Hector der küene helt

die zehen schar vil ûz erwelt

30395

alsus geteilet hæte,

dô sprach der degen stæte

in allen zuo gemeine:

getriuwen helde reine

und ellenthaften liute,

30400

sît sich mîn vater hiute

vil starker helfe an iu versiht

und er iu des getriuwet niht,

daz ir belîbent zagehaft,

sô zeigent iuwer magencraft

30405

und iuwer hôhen degenheit

und werdent im alsô bereit

mit helfebæren sachen,

daz er beginne wachen

dar ûf mit êweclicher hüge,

30410

daz er iu des gedanken müge,

daz ir durch in hie lîdent!

ist, daz ir hiute mîdent

vorht unde zagelichen muot,

er muoz durch iuch lîp unde guot

30415

mit willen iemer wâgen.

swer hie von sînen mâgen

gescheiden wirt dur strîtes nôt,

den wil er unze an sînen tôt

erhœhen an den êren

30420

und sîne gülte mêren

die wîle, daz er leben sol.

er mac in des ergetzen wol,

des im ze schaden wirt getân:

dâ von geruochent im gestân

30425

mit triuwen ûf der heide wît!

ir burger, die ze Troie sît

mit hûse nû gesezzen,

ir sult des niht vergezzen,

daz iu diz wunneclîche lant

30430

baz unde nâher ist gewant,

dan ez den gesten allen sî,

die niht der stat gesezzen bî

mit hûse und mit geslehte sint:

dâ von beschirment iuwer kint

30435

und iuwer guot und iuwer leben,

nâch dem die Kriechen wellen streben

gewalteclichen alle!

ir sult iuch vor dem valle

behüeten algelîche,

30440

daz iuwer heimisch rîche

bekome in vremeder liute hant.

jâ sol man umb daz vaterlant

sweiz unde bluot verrêren.

ê man sich lâze kêren

30445

mit keiner slahte crefte

von rehter eigenschefte,

ê sol man drumbe ligen tôt.

des lânt iuch nâch dem bluote rôt

der Kriechen balde dürsten!

30450

ir künge und alle ir fürsten,

die mînem vater bî gestânt,

sît daz ir iuch gemüejet hânt

durch in ûz fremeden landen her,

sô kêrent dar ûf iuwer ger,

30455

daz ir sîn rîche helfent weren,

dur daz er iemer dur iuch geren

lîp unde gülte müeze.

getriuwen helde süeze,

erschreckent von der sache niht,

30460

daz man der Kriechen wunder siht

vor dirre schœnen veste ligen!

daz reht daz hilfet uns gesigen

und vellet si die schulde grôz,

daz si des schaden nie verdrôz,

30465

den wir gar unverdienet liten.

ich wil iuch algemeine biten,

daz ir belîbent unverzaget

und nieman ûf die fluht gejaget

werd under iu noch hiute.

30470

gedenkent, hôhen liute,

daz ir von adele sint geborn

und rechent mînes vater zorn

mit ellentrîchen handen!

ein ritter muoz in schanden

30475

ân ende sîn vermæret,

ûf dem diu fluht bewæret

eht z' einem mâle werden kan.

der edele hôchgeborne man

mit êren sol daz velt behaben

30480

old aber tôt dar în begraben

werden sunder alle fluht.

ez swachet sînes lîbes fruht

und sîniu kint an werdekeit,

ob man von im ze mære seit,

30485

daz man in fliehen sæhe:

dâ von ist alsô wæhe,

daz er mit êren tôt gelige,

denn iemer schande an im gesige

und êweclichez laster.

30490

wir sülen deste vaster

nâch hôhem prîse werben,

daz wir niht alle ersterben

an ritterlicher wirde.

mit freches herzen girde

30495

sol man durch êre tragen pîn.

ich wil der aller êrste sîn,

der ûf den strît sich wâget.

mîn herze niht betrâget

gewinnes noch verlüste,

30500

wan ez in mîner brüste

mit einer lanzen wirt durchgraben,

ê daz den sic an uns behaben

die Kriechen ûf dem plâne

und wir sîn werden âne.

 

30505

Mit disen worten kêrte für

der jüngelinc von hôher kür

und îlte enwec mit sîner schar.

ouch heten sich ze strîte gar

die Kriechen dô geslihtet.

30510

ir volc daz was gerihtet

in rehter ordenunge teil.

fünfzehen schar durch siges heil

dar ûz geschephet wâren,

die strîtes wolten vâren

30515

und den von Troie tuon gedon.

der künic Agamennon

der hete alsô daz her geschart

und sîne ritterschaft bewart,

als ein gar ellentrîcher degen.

30520

der êrsten rotte solte phlegen

Patroclus unde Achilles,

die wurden beide flîzic des,

daz si den prîs behielten

und si des siges wielten

30525

ûf den plânîe grüene.

niun tûsent ritter küene

in beiden wurden undertân,

die mit in solten ûf den plân

in ir geleite kêren.

30530

seht, alsô wart nâch êren

diu êrste schar wol ûf geleit.

diu ander rotte was bereit

ouch ordenlîche bî der zît

und wol gezieret ûf den strît

30535

durch ganzer werdekeite lôn.

ir phlac der künic Meriôn

und ein herzoge wît erkant,

der was Menesteus genant

und hete strîtes ie gegert.

30540

der selbe rîche fürste wert

was bürtic von Athêne.

daz ander teil die zwêne

behüeten solten under in.

dur si ze strîte fuoren hin

30545

sehs tûsent ritter ellenthaft,

die gerne wolten mit ir craft

verschulden werder wîbe gruoz.

zwelf tûsent man bereit ze fuoz

gemischet wâren drunder.

30550

der dritten schar besunder

Ascalapfus der werde phlac,

der sich ze hôhem prîse wac

mit der vil starken hende sîn.

ein helt geheizen Alin

30555

half im der rotte walten.

der kunde in êren alten

mit unverzageten muote.

sîn edel herze bluote

schôn ûf der tugende zwîe.

30560

der künic von Kumenîe

der was sîn vater von geburt.

er wart in êren dâ gespurt

mit ellentrîches herzen ger.

der küene Ascalaphus und er

30565

die dritten rotte lêrten,

dar în durch helfe kêrten

driuzehen tûsent man bereit.

die fuorten rîchiu wâfenkleit

und stahelringe liehtgevar.

30570

nû merkent, wer die vierden schar

dâ leiten solte ûf strîtes spor!

daz tet der künic Prothênor

und Archelaus der milte.

fünf tûsent liehter schilte,

30575

die glanzen schîn gebâren,

dar în geteilet wâren

ahte hundert arembrust.

die fünfte schar ûf strîtes just

von Sparte Menelaus enthielt,

30580

der zehen tûsent ritter wielt

dar inne z' einer stiure,

die fuorten kovertiure

von sîden und von golde fîn.

der sehsten rotte phleger sîn

30585

ein künic dâ begunde,

der wol gebrûchen kunde

ûf strîten harnasch unde ros.

er was geheizen Epistros

und schein getürstic unde wîs.

30590

der werde fürste Schelopfîs,

von Fotiliâ geborn,

der hete im helfe dâ gesworn

und half der sehsten rotte phlegen.

si zwêne heten sich gewegen

30595

vil harte kostbærlichen dar.

si fuorten in der sehsten schar

vier tûsent ritter an den strît,

die lobes und êren bî der zît

vil gerne wolten vâren.

30600

niun tûsent schützen wâren

der ritterschaft gesellet.

seht, alsô was gestellet

diu sehste rotte wunnevar.

bevolhen was diu sibende schar

30605

in eines werden herren phlege,

der vaht nâch êren alle wege

dur minneclicher wîbe lôn:

ez was der künic Telamôn,

der krône truoc ze Salamîn.

30610

in der geselleschefte sîn

vier amiralde fuoren,

die lobten unde swuoren

stiur unde helfe sîner hant.

si wurden mir alsus genant.

 

30615

Der eine hiez Pollixenon,

und der ander Dorion,

sô hiez der dritte Amfileus,

und was der vierte Theseus

genennet und geheizen.

30620

verr ûz ir lande kreizen

wâren si gestrichen dar.

mit in beleip diu sibende schar

gezieret wol nâch werdekeit.

vierzehen tûsent man bereit

30625

dar inne kêrten ûf den plân.

diu ahte rotte wol getân

besetzet wol nâch êren was.

ir phlac der künic Dôas

und Ajax der kleine.

30630

ir zweiger helfe reine

diu wart der ahten rotte schîn.

zwelf tûsent ritter wâren drîn

geteilet bî den stunden.

diu niunde rotte funden

30635

wart in eines herren hant,

der was Ipomenes genant

und lebte in hôhem prîse.

Filithôas der wîse

der half behüeten im die schar.

30640

zwelf tûsent ritter wunnevar

in beiden wurden undertân,

die kêrten mit in ûf den plân

schier unde in kurzer wîle.

Nestor geborn von Pîle,

30645

des lîbes ein kürlicher degen,

der zehenden rotte muoste phlegen

mit siben tûsent mannen,

der bogen ûf gespannen

ze strîte wâren harte.

30650

in dirre selben parte

driu tûsent ritter fuoren,

die zageheit verswuoren

und sich ze strîte wâgen.

der eilften rotte phlâgen

30655

zwên ûz erwelte künige rîch,

der beider wille stuont gelîch,

wan si gesellen wâren.

si kunden wirde vâren

mit frecher und mit frîer hant.

30660

als ich von in geschriben vant,

sô hiez der eine Ulixes,

der ander Dîomêdes

was genennet schône.

nâch werder wîbe lône

30665

ir hant vermezzenlichen streit.

ahtzehen tûsent man bereit

si zwêne fuorten ûf daz wal,

die wol gezieret über al

dô kêrten an des strîtes vart.

30670

der zwelften rotte phlegende wart

der künic Palomîdes,

der selbe fleiz sich alles des,

daz lobe und êren wol gezam.

sehs tûsent ritter lobesam

30675

im wâren ûz gesundert.

fuozgengel ahzig hundert

sich heten drîn gemischet,

der herze was erfrischet

unde erniuwet wol mit craft.

30680

zwên edele künge tugenthaft

die phlâgen der drîzehenden schar

und nâmen ir mit flîze war

durch hôher werdekeite prîs.

Urielus und Delonîs

30685

geheizen wâren si ze namen.

den werden und den lobesamen

sach man dâ volgen ûf dem plân

fünf tûsent ritter wol getân

und sarjande unmâzen vil,

30690

der zal ich hie betiuten wil

ûf zweinzig tûsent man ze fuoz,

die gerne kumbers tâten buoz

den Kriechen mit ir helfe dô.

ein künic von gebürte hô

30695

was Cappadon genennet,

der wart ze vogte erkennet

über die vierzehende schar.

ûf die plânîe wunnevar

solt er si leiten an den strît.

30700

dâ fuoren inne bî der zît

niunzehen tûsent man bereit,

der lîp nâch hôher wirde streit

und freches muotes was gewon.

der künic agamennon

30705

der fünfzehende rotte wielt,

dar inne er drîzic tûsent hielt

erwelter manne wol geriten,

die gerne durch sîn êre striten

und im ze helfe wolten stân

30710

mit hôhen creften ûf dem plân.

 

Sus was der Kriechen her bewart

und ordenlichen dâ geschart

in fünfzehen rotte.

ze schaden und ze spotte

30715

wolten si Troiæren komen.

ir houbetherre si genomen

hete für sich an der zît

und mante si vast ûf den strît

mit rede und mit geheizen.

30720

er wolte si dâ reizen

mit worten ûf des kampfes spor.

dâ von seit er in allen vor,

daz er guot, êr unde leben

wolt ûf die wâge dur si geben

30725

mit ganzen triuwen iemer mêr,

dar umbe daz sîn herzesêr

gerochen würde von ir hant.

vil tiure wurden si gemant

bî triuwen und mit eiden,

30730

daz si geruochten scheiden

den bruoder sîn von schanden

und si mit frechen handen

Troiæren teten vil gedon.

sus wolte in Agamennon

30735

ir muot ze strîte wenden.

mit herzen und mit henden

hiez er si balde vehten.

von rittern und von knehten

fuor in der Kriechen ritterschaft

30740

sô rehte grôziu magencraft,

daz mich sîn iemer wundert.

ouch wart vil manic hundert

verlâzen bî dem wilden mer,

die mit ir craft und mit ir wer

30745

beschirmen solten diu gezelt.

ze strîte kêrten ûf daz velt

die Troiær und die Kriechen,

dur daz vil wundersiechen

dâ wurden bêdenthalben,

30750

die mit dekeiner salben

verheilet möhten werden.

ze strîte kam ûf erden

nie sô manger muoter barn,

als ûf den plân begunde varn

30755

ze bêden sîten an der stunt.

des wart vil manger ungesunt

an êren unde an creften.

von lanzen und von scheften

sach man des mâles rîche state.

30760

der heide wuohs dâ michel schate,

den ir diu banier bâren,

diu wol ûz sîden wâren

gebriten und gespunnen

und niht die clâren sunnen

30765

dâ liezen glesten ûf daz wal.

ez wart beschetewet über al

von rossen und von liuten,

der zal ich niht betiuten

mit worten ûf ein ende mac.

30770

die schilte lûhten als der tac

den ougen und dem muote engegen.

dô man die schar begunde wegen

ûf die vil strîteclichen vart,

ahî, waz dâ gesehen wart

30775

rîlicher wâfencleide!

man kunde niht der heide

beschouwen noch des grienes breit

vor der manicfaltekeit

der glanzen kovertiure.

30780

als ob der plân mit fiure

wær angestôzen unde enzunt,

sus bran von golde bî der stunt

daz velt und daz gevilde.

vil manic wunder wilde

30785

von vogeln und von tieren

sach man die decke zieren

und diu rîlichen kursît.

gesteine lûhte enwiderstrît

über tal und über berc.

30790

dâ gleiz daz liehte stahelwerc

nâch wunsche und daz gesmîde.

diu wunneclîche sîde

dâ zierte mangen wâfenroc.

ein ritterlicher ûzzoc

30795

ze bêden sîten wart gesehen.

man sach dâ glenzen unde enprehen

vil mangen schilt gesteinet.

der himel was gereinet

mit einer blâwen varwe

30800

und schein diu sunne garwe

durliuhteclichen über al,

dâ bî den anger und daz wal

gras unde bluomen zierten.

die Kriechen pusûnierten

30805

und die von Troie mangen dôn.

swaz Dâvît unde Salomôn

erdâhten ie von seiten spil,

des wart gehœret alze vil,

dô si zesamene kêrten.

30810

schal unde braht si mêrten

ûf stîgen unde ûf strâzen.

diu ros man hôrte grâzen

und mangen vremeden krîe

dâ ruofen die storîe,

30815

die sich z'ein ander wurren.

man hôrte banier snurren

alsam die segel ûf dem mer.

man sach die vîentlichen her

z' ein ander balde gâhen

30820

und schaden vil enphâhen,

dô si zesamene kêrten

und mangen lîp verseêrten,

der von verlüsteclicher nôt

beleip ûf der plânîe tôt.