BIBLIOTHECA AUGUSTANA

 

Konrad von Würzburg

um 1225 - 1287

 

Der Trojanerkrieg

 

Die vierte Schlacht

Siegesfeier der Trojaner.

Aufruf Agamemnons zur Tötung Hektors.

Beginn der vierten Schlacht.

Heldentaten des Hektor.

 

40217 - 40424

 

__________________________________________________________________________________

 

 

 

Nû daz Troiære mit gewalt

der Kriechen rotte manicvalt

getriben heten ûf die fluht,

40220

dô kêrtens' alle mit genuht

in fröuden zuo der veste.

die schadehaften geste

die vuoren ouch in ir gezelt.

erlæret wart daz wîte velt

40225

von siechen und von wunden.

die wurden bî den stunden

gefüeret alle an ir gemach.

rât unde helfe in dô geschach

mit binden und mit salben.

40230

die fürsten bêdenthalben

dô liezen an die ruowe sich.

Hector der künic lobelich

mit fröuden wart enpfangen.

geriten und gegangen

40235

wart im engegen ûz der stift.

er wart rîlicher hantgift

und hôhes krâmes dô gewert,

wan sîner künfte wart gegert

von liehter vrouwen bilde.

40240

reht als ein wunder wilde

wart er beschouwet und besehen.

hey, waz im lobes wart verjehen

von clâren wîben hôchgeborn

dur sîne manheit ûz erkorn,

40245

der wunder was ûf in geleit!

man bôt im hôhe wirdekeit

mit rîcher handelunge.

Troiære samenunge

diu lepte in schalle manger slaht.

40250

si was in fröuden al die naht

dur daz vil manicvalte heil,

daz si des siges wâren geil

des tages worden ûf dem wal.

gelegen was der Kriechen schal

40255

in den gezelten bî der stunt.

an fröuden was ir herze wunt

von ir verlüste manicvalt.

dâ trûrte bêde junc und alt,

wan daz her Agamennon

40260

aleine vröuden was gewon,

dur daz si wurden sigelôs.

sît man ze herren in verkôs

und z'eime houbetmanne,

dô ruochte er, ob si danne

40265

verzerten leben unde guot.

geloubent, daz ein hôher muot

an im begunde rîchsen!

iedoch wolt er gelîchsen

mit rede zuo dem mâle,

40270

dur daz man sunder twâle

dâ wider an in kæme

und in ze herren næme

und z'einem stæten houbetman.

er vienc dâ mit den fürsten an

40275

ein sprâchen unde ein kôsen.

dur smeichen und dur lôsen

sprach er dô wider si zehant:

ir herren alle sît gemant,

daz ir von adele sît geborn

40280

und lânt iu sîn den schaden zorn

und die verlust von herzen leit,

daz wir von dem gevilde breit

sô zagelichen sîn vertriben,

daz die von Troie sint beliben

40285

gewaltic unser hiute.

owê der werden liute,

die man uns leider hât benomen!

wir sîn ze swærem valle komen

und in grôz ungemach bî namen.

40290

suln wir uns des niht iemer schamen,

daz uns ein einic ritter

all in den schaden bitter

kan wîsen unde kêren,

daz wir an hôhen êren

40295

beroubet werden unde an habe?

 

Hector tötet die Griechen

 

Hector der helt der hât uns abe

gebrochen alterseine

daz lop, daz wir gemeine

und algelîche solten hân.

40300

ach got, waz hât er uns getân

ze schaden und ze schanden!

von sînen vrechen handen

wir alle sîn geswachet:

des smieret unde lachet

40305

vil rôter münde an sînen lîp.

Andromachâ, sîn êlich wîp,

mac in vil gerne schouwen,

swenn unser aller vrouwen

uns übellichen sehent an,

40310

dar umbe daz ein einic man

sol twingen uns gemeine.

Polixinâ diu reine

und Helenâ diu clâre

die mügent in ouch zwâre

40315

lieplîche enpfâhen under in,

sît er sô manigen ritter hin

mit sîner hant gevellet hât.

nâch wirde ringet unde stât

sîn ellentrîcher wille.

40320

herr unde friunt Achille,

waz mac Dêîdamîe

diu glanze wandels vrîe

nû sprechen, wenn ir wirt geseit,

daz iuch her Hector hât geleit

40325

an êren unde an kreften nider?

ich weiz wol, daz er iuwer lider

het alsô gar zerdroschen,

daz iuwer prîs erloschen

muoz vor allen vrouwen stân.

40330

wirt daz niht schiere widertân,

des iuch sîn ellent hât gewert?

er mohte ûf iu sîn edel swert

ze stücken hân gebliuwen,

wan ich gesach entriuwen

40335

nie vaster keinen man gebern.

welt ir iuch niht des schaden wern

und widertuon daz laster?

ir sint gehœnet vaster,

denne ie würde mannes lîp.

40340

wie sol iuch iemer werdez wîp

mit willen an geblicken,

geruochet ir niht schicken,

daz ir gerechent iuch an ime?

jô prüeve ich daz wol und vernime,

40345

daz Troie in kurzen stunden

von uns wirt überwunden,

wan daz Hector si vristet.

sîn manheit überlistet

und übersterket unser kraft.

40350

diu stat und alle ir ritterschaft

uns Kriechen wære ein kleinez dinc,

ob der vil starke jungelinc

wære alterseine tôt gelegen.

verdürbe Ector der küene degen,

40355

wir hæten alzehant gesiget.

Troiære zuoversiht diu liget

und al ir sælde in sîner hant.

ir heil daz ist ûf in gewant

und ir genædeclicher trôst.

40360

diu stat von sorgen wirt erlôst,

die wîle er hât den lebetagen.

welt ir den sic von hinnen tragen

mit uns, geselle Achilles,

sô vlîzent iuch vil harte des,

40365

daz Hector hie ze schaden kome!

daz wirt benamen unser vrome,

wan disiu lantriviere

verdirbet von uns schiere

an liuten unde an rîcher habe.

40370

diu stat diu wirt gebrochen abe

und muoz hie komen ze valle:

dâ von sô werbent alle

und ir ze vorderst, daz wir mügen

mit kreften und mit starken zügen

40375

des küniges sun ersterben!

ist, daz wir in verderben

alsô, daz er belibe tôt,

wir überwinden alle nôt.

 

Der künic Agamennon

40380

den Kriechen riet alsus dâ von,

daz er geviele in deste baz

und er dô würde ân allen haz

gesetzet wider an sîn ampt.

er wolte sich in allensampt

40385

mit worten lieben gerne,

dur daz ir leitesterne

niht würde Palomîdes.

nû si verhancten alle des,

daz er belibe ir houbetman,

40390

die fürsten an ir ruowe dan

dô giengen unde leiten sich.

nû sich der morgen wunneclich

wolt ûf die heide machen

und êrst begunde lachen

40395

dur den himel ûf daz velt,

dô kêrten ûz für diu gezelt

die Kriechen algelîche.

ir wâpencleider rîche

die ritter heten an geleit

40400

und wâren alle dô bereit

ze kampfe und z'einem strîte.

ir schar si bî der zîte

rottierten, als in wol gezam.

Troiære tâten ouch alsam

40405

und fuoren ûz der veste.

die burger und die geste

ze velde schône kâmen.

si zogeten ûf den sâmen

ze beiden sîten wol bewart.

40410

Hector der hete dô geschart

sîn her und sîne ritterschaft

und kam mit werlicher kraft

zogende gegen den Kriechen,

der er sô manigen siechen

40415

machte mit sîner vrechen hant.

ouch wart gnuogen dô bekant

von im der bitterlîche tôt.

dâ liten angest unde nôt

die Kriechen von Troiæren.

40420

ouch sach man si beswæren

sêr an ir grôzen ritterschaft,

wan ir werlîchiu kraft

in tet dô vil ze leide

ûf der geblüemten heide.

 

[Hier bricht das Werk ab.]