BIBLIOTHECA AUGUSTANA

 

Walther von der Vogelweide

nach 1170 - um 1230

 

Sprüche und Lieder

in chronologischer Anordnung

 

Sprüche der Jahre

1205 bis 1220

 

Spruchlied: Nieman kan mit gerten (L 87,1)

Spruchlied: Wer kan nû ze danke singen (L 110,27)

Spruch XIV: Man seit mir ie von Tegersê (L 104,23)

Spruch XVI: Daz milter man gar wârhaft sî (L 104,33)

 

______________________________________________________________

 

 

 

Nieman kan mit gerten

(Spruchlied. Erziehungslehre. Palindrom-Lied)

I

L 87,1

Nieman kan mit gerten

kindes zuht beherten.

den man zêren bringen mac,

dem ist ein wort als ein slac.

 

5

Dem ist ein wort als ein slac,

den man zêren bringen mac.

kindes zuht beherten

nieman kan mit gerten.

 

II

L 87,9

Hüetent iuwer zungen,

daz zimt wol den jungen.

stôz den rigel für die tür,

lâ kein bœsiu wort dar für.

 

5

Lâ kein bœsiu wort dar für,

stôz den rigel für die tür,

daz zimt wol den jungen.

hüetent iuwer zungen!

 

III

L 87,17

Hüetent iuwere ougen

offenbâr und tougen,

lânt si guote site spehen

und die bœsen übersehen.

 

5

Und die bœsen übersehen!

lânt si guote site spehen

offenbâr und tougen.

hüetent iuwere ougen!

 

IV

L 87,25

Hüetent iuwer ôren,

oder ir sint tôren.

lânt ir bœsiu wort dar in,

daz gunêret iu den sin.

 

5

Daz gunêret iu den sin,

lânt ir bœsiu wort dar in,

oder ir sint tôren.

hüetent iuwer ôren!

 

V

L 87,33

Hüetent wol der drîer,

leider alze frîer.

zungen, ougen, ôren sint

dicke schalkhaft, zêren blint.

 

5

Dicke schalkhaft, zêren blint

zungen, ougen, ôren sint,

leider alze frîer.

hüetent wol der drîer!

 

VI

L 88,1

Nieman ritter wesen mac

drîzec jar und einen tac,

im gebreste muotes,

lîbes oder guotes.

 

5

Lîbes oder guotes,

im gebreste muotes,

drîzec jar und einen tac

nieman ritter wesen mac.

 

______

 

 

Man seit mir ie von Tegersê

(Tegernseespruch)

L 104,23

Man seit mir ie von Tegersê,

wie wol daz hûs mit êren stê,

dar kêrte ich mêr dan eine mîle von der strâze.

ich bin ein wunderlîcher man,

5

daz ich mich selben niht enkan

entstân und mich sô vil an frömede liute lâze.

ich schilte sîn niht, wan got genâde uns beiden:

ich nam dâ wazzer!

alsô nazzer

10

muost ich von des münches tische scheiden.