BIBLIOTHECA AUGUSTANA

 

Walther von der Vogelweide

nach 1170 - um 1230

 

Sprüche und Lieder

in chronologischer Anordnung

 

Leopoldston

(um 1208/09)

 

«Rît ze hove, Dietrîch!» (82,11)

Owê, daz wîsheit unde jugent (82,24)

Dêst wâr, Reinmâr, dû riuwest mich (83,1)

Swâ der hôhe nider gât (83,14)

Ich muoz verdienen swachen haz (83,27)

Drîe sorge hab ich mir genomen (84,1)

 

______________________________________________________________

 

 

 

II

Owê daz wîsheit unde jugent

(Reinmarnachruf I)

L 82,24

Owê daz wîsheit unde jugent,

des mannes schœne noch sîn tugent

niht erben sol, sô ie der lîp erstirbet!

daz mac wol klagen ein wîser man,

5

der sich des schaden versinnen kan:

Reinmâr, waz guoter kunst an dir verdirbet!

dû solt von schulden iemer des geniezen,

daz dich des tages wolte nie verdriezen,

dun spræchest ie den frouwen wol mit ir vil reinen siten.

10

des sülen si iemer danken dîner zungen.

hetest anders niht wan eine rede gesungen:

«sô wol dir, wîb, wie reine dîn nam!», dû hetest alse gestriten

an ir lop, daz elliu wîb dir iemer gnâden solten biten.

 

 

III

Dêst wâr, Reinmâr, dû riuwes mich

(Reinmarnachruf II)

L 83,1

Dêst wâr, Reinmâr, dû riuwest mich

michels harter danne ich dich,

ob dû lebtest und ich wær erstorben.

ich wil ez bî mînen triuwen sagen,

5

dich selben wolt ich lützel klagen:

ich klage dîn edelen kunst, daz si ist verdorben.

dû kundest al der werlte fröide mêren,

sô dû ez ze guoten dingen woltest kêren.

mich riuwet dîn wol redender munt und dîn vil süezer sanc,

10

daz die verdorben sind bî mînen zîten.

daz dû niht eine wîle mohtest bîten.

sô leist ich dir geselleschaft, mîn singen ist niht lanc.

dîn sêle müeze wol gevarn und habe dîn zunge danc.