BIBLIOTHECA AUGUSTANA

 

Wolfram von Eschenbach

1170/75 - nach 1220

 

Parzival

 

Buch II

 

__________________________________________________________________________________

 

 

 

Dâ ze Spâne im lande

er den künec erkande.

daz was sîn neve Kaylet:

30

nâch dem kêrt er ze Dôlet.

59

der was nâh rîterschefte gevarn,

dâ man niht schilde dorfte sparn.

dô hiez ouch er bereiten sich

(sus wert diu âventiure mich)

5

mit speren wol gemâlen

mit grüenen zindâlen:

ieslîchez hete ein banier,

drî härmîn anker dran sô fier

daz man ir jach für rîcheit.

10

si wâren lang unde breit,

und reichten vaste unz ûf die hant,

sô mans zem spers îser bant

dâ niderhalp ein spanne.

der wart dem küenen manne

15

hundert dâ bereitet

und wol hin nâch geleitet

von sînes neven liuten.

êren unde triuten

kunden sin mit werdekeit.

20

daz was ir hêrren niht ze leit.

 

er streich, in weiz wie lange, nâch,

unzer geste herberge ersach

ime lande ze Wâleis.

dâ was geslagen für Kanvoleis

25

manc poulûn ûf die plâne.

ine sagez iu niht nâch wâne:

Gebiet ir, sô ist ez wâr.

sîn volc hiez er ûf halden gar:

der hêrre sande vor hin în

30

den kluogen meisterknappen sîn.

60

der wolde, als in sîn hêrre bat,

herberge nemen in der stat.

dô was im snellîchen gâch:

man zôch im soumære nâch.

 

5

sîn ouge ninder hûs dâ sach,

schilde wærn sîn ander dach,

und die wende gar behangen

mit spern al umbevangen.

diu künegîn von Wâleis

10

gesprochen hete ze Kanvoleis

einen turney alsô gezilt,

dês manegen zagen noch bevilt

swa er dem gelîche werben siht:

von sîner hant es niht geschiht.

15

si was ein maget, niht ein wîp,

und bôt zwei lant unde ir lîp

swer dâ den prîs bezalte.

diz mære manegen valte

hinderz ors ûf den sâmen.

20

die solch gevelle nâmen,

ir schanze wart gein flust gesagt.

des phlâgen helde unverzagt,

si tâten rîters ellen schîn.

mit hurteclîcher rabbîn

25

wart dâ manc ors ersprenget

und swerte vil erklenget.

 

Ein schifprücke ûf einem plân

gieng übr einen wazzers trân,

mit einem tor beslozzen.

30

der knappe unverdrozzen

61

tetez ûf, als im ze muote was.

dar ob stuont der palas:

ouch saz diu küneginne

zen venstern dar inne

5

mit maneger werden frouwen.

die begunden schouwen,

waz dise knappen tâten.

die heten sich berâten

und sluogen ûf ein gezelt.

10

umb unvergolten minnen gelt

wart ez ein künec âne:

des twang in Belacâne.

 

mit arbeit wart ûf geslagn

daz drîzec soumær muosen tragn,

15

ein gezelt: daz zeigte rîcheit.

ouch was der plân wol sô breit,

daz sich die snüere stracten dran.

Gahmuret der werde man

die selben zît dort ûze enbeiz.

20

dar nâch er sich mit vlîze vleiz,

wier höfslîche kœme geritn.

des enwart niht langer dô gebitn,

sîne knappen an den stunden

sîniu sper ze samne bunden,

25

ieslîcher fünviu an ein bant:

daz sehste fuorter an der hant

Mit einer baniere.

sus kom gevarn der fiere.

 

vor der küngîn wart vernomn

30

daz ein gast dâ solte komn

62

ûz verrem lande,

den niemen dâ rekande.

«sîn volc daz ist kurtoys,

beidiu heidensch und franzoys:

5

etslîcher mag ein Anschevîn

mit sîner sprâche iedoch wol sîn.

ir muot ist stolz, ir wât ist clâr,

wol gesniten al für wâr.

ich was sînen knappen bî:

10

die sint vor missewende frî:

sie jehent, swer habe geruoche,

op der ir hêrren suoche,

den scheid er von swære.

von im vrâgt ich der mære:

15

dô sageten si mir sunder wanc,

ez wære der künec von Zazamanc.»

 

disiu mær sagt ir ein garzûn.

«âvoy welch ein poulûn!

iwer krône und iwer lant

20

wærn derfür niht halbez phant.»

«dune darft mirz sô loben niht.

mîn munt hin wider dir des giht,

ez mac wol sîn eins werden man,

der niht mit armüete kan.»

25

alsus sprach diu künegîn.

«wê wan kumt er et selbe drîn?»

 

Den garzûn si des vrâgen bat.

höfslîchen durch die stat

der helt begunde trecken,

30

die slâfenden wecken.

63

vil schilde sach er schînen.

die hellen pusînen

mit krache vor im gâben dôz.

von würfen und mit slegen grôz

5

zwên tambûre gâben schal:

der galm übr al die stat erhal.

der dôn iedoch gemischet wart

mit floytieren an der vart:

ein reisenote si bliesen.

10

nu sulen wir niht verliesen,

wie ir hêrre komen sî:

dem riten videlære bî.

 

dô leite der degen wert

ein bein für sich ûfez phert,

15

zwên stivâl über blôziu bein.

sîn munt als ein rubîn schein

von rœte als ober brünne:

der was dicke und niht ze dünne.

sîn lîp was allenthalben clâr.

20

lieht reideloht was im sîn hâr,

swâ manz vor dem huote sach:

der was ein tiwer houbetdach.

grüene samît was der mandel sîn:

ein zobel dâ vor gap swarzen schîn,

25

ob einem hemde daz was planc.

von schouwen wart dâ grôz gedranc.

 

Vil dicke aldâ gevrâget wart,

wer wære der ritter âne bart,

der fuorte alsölhe rîcheit.

30

vil schiere wart daz mære breit:

64

si sagetenz in für unbetrogn.

do begundens an die brüke zogn,

ander volc und ouch die sîne.

von dem liehten schîne,

5

der von der künegîn erschein,

derzuct im neben sich sîn bein:

ûf rihte sich der degen wert,

als ein vederspil, daz gert.

diu herberge dûht in guot.

10

alsô stuont des heldes muot:

si dolt ouch wol, diu wirtîn,

von Wâleis diu künegîn.

 

dô vriesch der künec von Spâne,

daz ûf der Lêôplâne

15

stüend ein gezelt, daz Gahmurete

durch des küenen Razalîges bete

beleip vor Pâtelamunt.

daz tet im ein rîter kunt.

dô fuor er springende als ein tier,

20

er was der freuden soldier.

der selbe rîter aber sprach

«iwer muomen sun ich sach

kumende als er ie was fier.

ez sint hundert banier

25

zuo eime schilde ûf grüene velt

gestôzen für sîn hôch gezelt:

die sint ouch alle grüene.

ouch hât der helt küene

Drî härmîn anker lieht gemâl

30

ûf ieslîchen zindâl.»

65

«ist er gezimieret hie?

âvoy sô sol man schouwen wie

sîn lîp den poinder irret.

wie erz mit hurte wirret!

5

der stolze künec Hardîz

hât mit zorne sînen vlîz

nu lange vaste an mich gewant:

den sol hie Gahmuretes hant

mit sîner tjoste neigen.

10

mîn sælde ist niht der veigen.»

 

sîne boten santer sân

dâ Gaschier der Oriman

mit grôzer mässenîe lac,

unt der liehte Killirjakac:

15

die wâren dâ durch sîne bete.

zem poulûn si mit Kailete

fuoren mit geselleschaft.

do enphiengen si durh liebe kraft

den werden künec von Zazamanc.

20

si dûht ein beiten gar ze lanc

daz sin niht ê gesâhen;

des si mit triwen jâhen.

dô frâgter si der mære,

wer dâ ritter wære.

 

25

dô sprach sîner muomen kint

«ûz verrem lande hie sint

ritter die diu minne jagt,

vil küener helde unverzagt.

 

Hie hât mangen Bertûn

30

roys Utrepandragûn.

66

ein mære in stichet als ein dorn,

daz er sîn wîp hât verlorn,

diu Artûses muoter was.

ein phaffe der wol zouber las,

5

mit dem diu frouwe ist hin gewant:

dem ist Artûs nâch gerant.

ez ist nu ime dritten jâr,

daz er sun und wîp verlôs für wâr.

hie ist och sîner tohter man,

10

der wol mit rîterschefte kan,

Lôt von Norwæge,

gein valscheit der træge

und der snelle gein dem prîse,

der küene degen wîse.

15

hie ist och Gâwân, des suon,

sô kranc daz er niht mac getuon

rîterschaft enkeine.

er was bî mir, der kleine:

er sprichet, möhter einen schaft

20

zebrechen, trôst in des sîn kraft,

er tæte gerne rîters tât.

wie fruos sîn ger begunnen hât!

hie hât der künec von Patrigalt

von speren einen ganzen walt.

25

des fuore ist da engein gar ein wint,

wan die von Portegâl hie sint.

die heizen wir die vrechen:

si wellnt durch schilde stechen.

Hie hânt die Provenzâle

30

schilde wol gemâle.

67

hie sint die Wâleise,

daz si behabent ir reise

durch den poinder swâ sis gernt:

von der kraft ir landes si des wernt.

5

hie ist manc ritter durch diu wîp,

des niht erkennen mac mîn lîp.

al die ich hie benennet hân,

wir lign mit wârheit sunder wân

mit grôzer fuore in der stat,

10

als uns diu küneginne bat.

 

ich sage dir wer ze velde ligt,

die unser wer vil ringe wigt.

der werde künec von Ascalûn,

unt der stolze künec von Arragûn,

15

Cidegast von Lôgroys,

unt der künec von Punturtoys:

der heizet Brandelidelîn.

da ist ouch der küene Lehelîn.

da ist Môrholt von Yrlant:

20

der brichet ab uns gæbiu phant.

dâ ligent ûf dem plâne

die stolzen Alemâne:

der herzoge von Brâbant

ist gestrichen in diz lant

25

durch den künec Hardîzen.

sîne swester Alîzen

gap im der künec von Gascôn:

sîn dienst hât vor enphangen lôn.

 

Die sint mit zorne hie gein mir.

30

nu sol ich wol getrûwen dir.

68

gedenke an die sippe dîn.

durch rehte liebe warte mîn.»

 

dô sprach der künec von Zazamanc

«dune darft mir wizzen keinen danc,

5

swaz dir mîn dienst hie zêren tuot.

wir sulen haben einen muot.

stêt dîn strûz noch sunder nest?

du solt dîn sarapandratest

gein sînem halben grîfen tragn.

10

mîn anker vaste wirt geslagn

durch lenden in sîns poinders hurt:

er muoz selbe suochen furt

hinderm ors ûfme grieze.

der uns zein ander lieze,

15

ich valt in, odr er valte mich:

des wer ich an den triwen dich.»

 

Kaylet ze herbergen reit

mit grôzen freuden sunder leit.

sich huob ein krîieren

20

vor zwein helden fieren:

von Poytouwe Schyolarz

und Gurnemanz de Grâharz

die tjostierten ûf dem plân.

sich huop diu vesperîe sân.

25

hie riten sehse, dort wol drî:

den fuor vil lîhte ein tropel bî.

si begunden rehte rîters tât:

des enwas et dô dechein rât.

 

Ez was dennoch wol mitter tac:

30

der hêrre in sîme gezelte lac.

69

dô vriesch der künec von Zazamanc

daz die poynder wît unde lanc

wârn ze velde worden

al nâch rîters orden.

5

er huob och sich des endes dar

mit maneger banier lieht gevar.

ern kêrt sich niht an gâhez schehen:

müezeclîche er wolde ersehen

wiez ze bêder sît dâ wær getân.

10

sînen tepich leit man ûf den plân,

dâ sich die pônder wurren

unt diu ors von stichen kurren.

von knappen was umb in ein rinc,

dâ bî von swerten klingâ klinc.

15

wie si nâch prîse rungen,

der klingen alsus klungen!

von spern was grôz krachen dâ.

ern dorfte niemen vrâgen wâ.

poynder wârn sîn wende:

20

die worhten rîters hende.

 

diu rîterschaft sô nâhe was,

daz die frouwen ab dem palas

wol sâhn der helde arbeit.

doch was der küneginne leit

25

daz sich der künec von Zazamanc

dâ mit den andern niht endranc.

si sprach «wê war ist er komn,

von dem ich wunder hân vernomn?»

 

Nu was ouch rois de Franze tôt,

30

des wîp in dicke in grôze nôt

70

brâhte mit ir minne:

diu werde küneginne

hete aldar nâch im gesant,

ob er noch wider in daz lant

5

wær komen von der heidenschaft.

des twanc si grôzer liebe kraft.

 

Ez wart dâ harte guot getân

von manegem küenem armman,

die doch der hœhe gerten niht,

10

des der küngîn zil vergiht,

ir lîbes unde ir lande:

si gerten anderr phande.

 

nu was och Gahmuretes lîp

in harnasche, dâ sîn wîp

15

wart einer suone bî gemant;

daz ir von Schotten Vridebrant

ze gebe sande für ir schaden:

mit strîte heter si verladen.

ûf erde niht sô guotes was.

20

dô schouwet er den adamas:

daz was ein helm. dar ûf man bant

einen anker, dâ man inne vant

verwieret edel gesteine,

grôz, niht ze kleine:

25

daz was iedoch ein swærer last.

gezimieret wart der gast.

 

wie sîn schilt gehêret sî?

mit golde von Arâbî

ein tiweriu bukel drûf geslagn,

30

swære, die er muose tragn.

71

diu gap von rœte alsolhez prehen,

daz man sich drinne mohte ersehen.

ein zobelîn anker drunde.

mir selben ich wol gunde

5

des er het an den lîp gegert:

wand ez was maneger marke wert.

 

Sîn wâpenroc was harte wît:

ich wæne kein sô guoten sît

ie man ze strîte fuorte;

10

des lenge den teppech ruorte.

ob i'n geprüeven künne,

er schein als ob hie brünne

bî der naht ein queckez fiwer.

verblichen varwe was im tiwer:

15

sîn glast die blicke niht vermeit:

ein bœsez oug sich dran versneit.

mit golde er gebildet was,

daz zer muntâne an Kaukasas

ab einem velse zarten

20

grîfen klâ, diez dâ bewarten

und ez noch hiute aldâ bewarent.

von Arâbî liute varent:

die erwerbent ez mit listen dâ

(sô tiwerz ist ninder anderswâ)

25

und bringentz wider zArâbî,

dâ man diu grüenen achmardî

wurket und die phellel rîch.

ander wât ist der vil ungelîch.

den schilt nam er ze halse sân.

30

hie stuont ein ors vil wol getân,

72

gewâpent vaste unz ûf den huof,

hie garzûne ruofâ ruof.

sîn lîp spranc drûf, wand erz dâ vant.

vil starker sper des heldes hant

5

mit hurte verswande:

die poynder er zetrande,

immer durch, anderthalben ûz.

dem anker volgete nâch der strûz.

 

Gahmuret stach hinderz ors

10

Poytwîn de Prienlascors

und anders manegen werden man,

an den er sicherheit gewan.

swaz dâ gekriuzter ritter reit,

die genuzzen sheldes arbeit:

15

diu gewunnen ors diu gaber in:

an im lag ir grôz gewin.

 

gelîcher baniere

man gein im fuorte viere

(küene rotten riten drunde:

20

ir hêrre strîten kunde),

an ieslîcher eins grîfen zagel.

daz hinder teil was ouch ein hagel

an rîterschaft: des wâren die.

daz vorder teil des grîfen hie

25

der künec von Gascône truoc

ûfme schilt, ein rîter kluoc.

gezimieret was sîn lîp

sô wol geprüeven kunnen wîp.

er nam sich vor den andern ûz,

30

do'r ûfem helme ersach den strûz.

73

der anker kom doch vor an in.

dô stach in hinderz ors dort hin

der werde künec von Zazamanc,

und vieng in. dâ was grôz gedranc,

5

hôhe fürhe sleht getennet,

mit swerten vil gekemmet.

Dâ wart verswendet der walt

und manec ritter ab gevalt.

si wunden sich (sus hôrt ich sagn)

10

hindenort, dâ hielden zagn.

 

der strît was wol sô nâhen,

daz gar die frouwen sâhen

wer dâ bî prîse solde sîn.

der minnen gernde Rîwalîn,

15

von des sper snîte ein niwe leis:

daz was der künec von Lohneis:

sîne hurte gâben kraches schal.

Môrholt in einen rîter stal,

ûzem satel ern für sich huop

20

(daz was ein ungefüeger uop):

der hiez Killirjacac.

von dem het der künec Lac

dâ vor enphangen solhen solt,

den der vallende an der erde holt:

25

er hetez dâ vil guot getân.

dô luste disen starken man

daz er in twunge sunder swert:

alsus vienc er den degen wert.

 

hinderz ors stach Kayletes hant

30

den herzogn von Brâbant:

74

der fürste hiez Lambekîn.

waz dô tæten die sîn?

die beschutten in mit swerten:

die helde strîtes gerten.

 

5

Dô stach der künec von Arragûn

den alten Utepandragûn

hinderz ors ûf die plâne,

den künec von Bertâne.

ez stuont dâ bluomen vil umb in.

10

wê wie gefüege ich doch pin,

daz ich den werden Berteneis

sô schône lege für Kanvoleis,

dâ nie getrat vilânes fuoz

(ob ichz iu rehte sagen muoz)

15

noch lîhte nimmer dâ geschiht.

ern dorfte sîn besezzen niht

ûfem ors aldâ er saz.

niht langer man sîn dô vergaz,

in beschutten die ob im dâ striten.

20

dâ wart grôz hurten niht vermiten.

 

dô kom der künec von Punturteis.

der wart alhie vor Kanvoleis

gevellet ûf sîns orses slâ,

daz er derhinder lac aldâ.

25

daz tet der stolze Gahmuret.

wetâ hêrre, wetâ wet!

mit strîte funden si geweten.

sîner muomen sun Kayleten

den viengen Punturteise.

30

dâ wart vil rûch diu reise.

75

do der künec Brandelidelîn

wart gezucket von den sîn,

Einen andern künec si viengen.

dâ liefen unde giengen

5

manc werder man in îsenwât:

den wart dâ gâlûnt ir brât

mit treten und mit kiulen.

ir vel truoc swarze biulen:

die helde gehiure

10

derwurben quaschiure.

 

ine sagez iu niht für wæhe:

dâ was diu ruowe smæhe.

die werden twanc diu minne dar,

manegen schilt wol gevar,

15

und manegen gezimierten helm:

des dach was worden dâ der melm.

daz velt etswâ geblüemet was,

dâ stuont al kurz grüene gras:

dâ vielen ûf die werden man,

20

den diu êre en teil was getân.

mîn gir kan sölher wünsche doln,

daz et ich besæze ûf dem voln.

 

dô reit der künec von Zazamanc

hin dan dâ in niemen dranc,

25

nâch eim orse daz geruowet was.

man bant von im den adamas,

niwan durch des windes luft,

und anders durch decheinen guft.

man stroufte im ab sîn härsenier:

30

sîn munt was rôt unde fier.

76

Ein wîp diech ê genennet hân,

hie kom ein ir kappelân

und kleiner junchêrren dri:

den riten starke knappen bî,

5

zwên soumær giengen an ir hant.

die boten hete dar gesant

diu küneginne Ampflîse.

ir kappelân was wîse,

vil schiere bekanter disen man,

10

en franzois er in gruozte sân.

«bien sei venûz, bêâs sir,

mîner frouwen unde mir.

daz ist rêgîn de Franze:

die rüeret dîner minnen lanze.»

15

einen brief gaber im in die hant,

dar an der hêrre grüezen vant,

unde ein kleine vingerlîn:

daz solt ein wârgeleite sîn,

wan daz enphienc sîn frouwe

20

von dem von Anschouwe.

er neic, dô er die schrift ersach.

welt ir nu hœren wie diu sprach?

 

«dir enbiutet minne unde gruoz

mîn lîp, dem nie wart kumbers buoz

25

sît ich dîner minne enphant.

dîn minne ist slôz unde bant

mîns herzen unt des fröude.

dîn minne tuot mich töude.

sol mir dîn minne verren,

30

sô muoz mir minne werren.

77

Kum wider, und nim von mîner hant

krône, zepter unde ein lant.

daz ist mich an erstorben:

daz hât dîn minne erworben.

5

hab dir ouch ze soldiment

dise rîchen prîsent

in den vier soumschrîn.

du solt ouch mîn ritter sîn

ime lande ze Wâleis

10

vor der houbtstat ze Kanvoleis.

ine ruoche obez diu küngin siht:

ez mac mir vil geschaden niht.

ich bin schœner unde rîcher,

unde kan och minneclîcher

15

minne enphâhn und minne gebn.

wiltu nâch werder minne lebn,

sô hab dir mîne krône

nâch minne ze lône.»

 

an disem brieve er niht mêr vant.

20

sîn härsnier eins knappen hant

wider ûf sîn houbet zôch.

Gahmureten trûren flôch.

man bant im ûf den adamas,

der dicke unde herte was:

25

er wolt sich arbeiten.

die boten hiez er leiten

durch ruowen underz poulûn.

swa gedrenge was, dâ machter rûn.

 

Dirre flôs, jener gewan.

30

dâ moht erholen sich ein man,

78

het er versûmet sîne tât:

alhie was genuoger rât.

si solden tjostieren,

dort mit rotten punieren.

5

si geloubten sich der sliche

die man heizet friwendes stiche:

heinlîch gevaterschaft

wart dâ zefuort mit zornes kraft.

dâ wirt diu krümbe selten sleht.

10

man sprach dâ wênic rîters reht:

swer iht gewan, der habt im daz:

ern ruochte, hetes der ander haz.

si wârn von manegen landen,

die dâ mit ir handen

15

schildes ambet worhten

und schaden wênic vorhten.

 

aldâ wart von Gahmurete

geleistet Ampflîsen bete,

daz er ir ritter wære:

20

ein brief sagt im daz mære.

âvoy nu wart er lâzen an.

op minne und ellen in des man?

grôz liebe und starkiu triuwe

sîne kraft im frumt al niuwe.

25

nu saher wâ der künic Lôt

sînen schilt gein der herte bôt.

der was umbe nâch gewant:

daz werte Gahmuretes hant.

mit hurte er den poinder brach,

30

den künec von Arragûn er stach

79

hinderz ors mit eime rôr.

der künec hiez Schafillôr.

Daz sper was sunder banier,

dâ mit er valte den degen fier:

5

er hetz brâht von der heidenschaft.

die sîne werten in mit kraft:

doch vienger den werden man.

die inren tâten de ûzern sân

vaste rîten ûfez velt.

10

ir vesperî gap strîtes gelt,

ez mohte sîn ein turnei:

wan dâ lac manc sper enzwei.

 

do begunde zürnen Lähelîn,

«sul wir sus entêret sîn?

15

daz machet der den anker treit.

unser entwedr den andern leit

noch hiute da er unsamfte ligt.

si hânt unz vil nâch an gesigt.»

ir hurte gab in rûmes vil:

20

dô giengez ûz der kinde spil.

si worhten mit ir henden

daz den walt begunde swenden.

diz was gelîche ir beider ger,

sperâ hêrre, sperâ sper.

25

doch muose et dulden Lähelîn

einen smæhlîchen pîn.

in stach der künec von Zazamanc

hinderz ors, wol spers lanc,

daz in ein rôr geschiftet was.

30

sîne sicherheit er an sich las.

80

doch læse ich samfter süeze birn,

swie die ritter vor im nider rirn.

 

Der krîe dô vil maneger wielt,

swer vor sîner tjoste hielt,

5

«hie kumt der anker, fîâ fî.»

zegegen kom im gehurtet bî

ein fürste ûz Anschouwe

(diu riwe was sîn frouwe)

mit ûf kêrter spitze:

10

daz lêrt in jâmers witze.

diu wâpen er rekande.

war umber von im wande?

welt ir, ich bescheide iuch des.

si gap der stolze Gâlôes

15

fil li roi Gandîn,

der vil getriwe bruoder sîn,

dâ vor unz im diu minne erwarp

daz er an einer tjost erstarp.

 

dô bant er abe sînen helm.

20

wederz gras noch den melm

sîn strît dâ niht mêr bante:

grôz jâmer in des mante.

mit sîme sinner bâgte,

daz er niht dicker frâgte

25

Kayleten sîner muomen suon,

waz sîn bruoder wolde tuon,

daz er niht turnierte hie.

daz enwesser leider, wie

er starp vor Muntôrî.

30

dâ vor was im ein kumber bî:

81

des twanc in werdiu minne

einer rîchen küneginne.

diu kom och sît nâch im in nôt,

si lag an klagenden triwen tôt.

5

Swie Gahmuret wær ouch mit klage,

doch heter an dem halben tage

gefrumt sô vil der sper enzwei;

wære worden der turnei,

sô wære verswendet der walt.

10

gevärwet hundert im gezalt

wârn, diu gar vertet der fiere.

sîne liehten baniere

wârn den krîgierren worden.

daz was wol in ir orden.

 

15

dô reit er gein dem poulûn.

der Wâleisinne garzûn

huop sich nâch im ûf die vart.

der tiwer wâpenroc im wart,

durchstochen unde verhouwen:

20

den truoger für die frouwen.

er was von golde dennoch guot,

er gleste als ein glüendic gluot.

dar an kôs man rîcheit.

dô sprach diu künegîn gemeit

25

«dich hât ein werdez wîp gesant

bî disem ritter in diz lant.

nu manet mich diu fuoge mîn,

daz die andern niht verkrenket sîn,

die âventiure brâhte dar.

30

ieslîcher nem mîns wunsches war:

82

wan si sint mir alle sippe

von dem Adâmes rippe.

doch wæne et Gahmuretes tât

den hœsten prîs derworben hât.»

 

5

Die andern tæten rîterschaft

mit sô bewander zornes kraft,

daz siz wielken vaste unz an die naht.

die inren heten die ûzern brâht

mit strîte unz an ir poulûn.

10

niwan der künec von Ascalûn

und Môrholt von Yrlant,

durch die snüere in wære gerant.

 

dâ was gewunnen und verlorn:

genuoge heten schaden erkorn,

15

die andern prîs und êre.

nu ist zît daz man si kêre

von ein ander. niemen hie gesiht:

sine wert der phander liehtes niht:

wer solt ouch vinsterlingen spiln?

20

es mac die müeden doch beviln.

 

der vinster man vil gar vergaz,

dâ mîn hêr Gahmuret dort saz

als ez wær tac. des was ez nieht:

dâ wârn ave ungefüegiu lieht,

25

von kleinen kerzen manec schoup

geleit ûf ölboume loup;

manec kulter rîche

gestrecket vlîzeclîche,

derfür manec teppech breit.

30

diu küngîn an die snüere reit

83

mit manger werden frouwen:

si wolte gerne schouwen

den werden künec von Zazamanc.

vil müeder ritter nâch ir dranc.

 

5

[Diu] tischlachen wâren ab genomn

ê si inz poulûn wære komn.

ûf spranc der wirt vil schiere,

und gevangener künege viere:

den fuor och etslîch fürste mite.

10

do enphienger si nâch zühte site.

er geviel ir wol, dô sin ersach.

diu Wâleisîn mit freuden sprach

«ir sît hie wirt dâ ih iuch vant:

sô bin ich wirtîn überz lant.

15

ruocht irs daz i'uch küssen sol,

daz ist mit mînem willen wol.»

er sprach «iur kus sol wesen mîn,

suln dise hêrrn geküsset sîn.

sol künec od fürste des enbern,

20

sone getar och ichs von iu niht gern.»

«deiswâr daz sol och geschehn.

ine hân ir keinen ê gesehn.»

si kuste dies tâ wâren wert:

des hete Gahmuret gegert.

 

25

er bat sitzen die künegîn.

mîn hêr Brandelidelîn

mit zühten zuo der frouwen saz.

grüene binz, von touwe naz,

dünne ûf die tepch geströut,

30

dâ saz ûf des sich hie fröut

84

diu werde Wâleisinne:

si twanc iedoch sîn minne.

er saz für si sô nâhe nidr,

daz sin begreif und zôch in widr

5

Anderhalp vast an ir lîp.

si was ein magt und niht ein wîp,

diu in sô nâhen sitzen liez.

welt ir nu hœren wie si hiez?

diu küngîn Herzeloyde;

10

unde ir base Rischoyde:

die hete der künec Kaylet,

des muomen sun was Gahmuret.

vrou Herzeloyde gap den schîn,

wærn erloschen gar die kerzen sîn,

15

dâ wær doch lieht von ir genuoc.

wan daz grôz jâmer under sluoc

die hœhe an sîner freude breit,

sîn minne wære ir vil bereit.

 

si sprâchen gruoz nâch zühte kür.

20

bi einer wîle giengen schenken für

mit gezierd von Azagouc,

dar an grôz rîcheit niemen trouc:

die truogen junchêrren în.

daz muosen tiure näphe sîn

25

von edelem gesteine,

wît, niht ze kleine.

si wâren alle sunder golt:

ez was des landes zinses solt,

den Isenhart vil dicke bôt

30

frôn Belakân für grôze nôt.

85

dô bôt man in daz trinken dar

in manegem steine wol gevar,

smârâde unde sardîn:

etslîcher was ein rubîn.

 

5

Für daz poulûn dô reit

zwên ritter ûf ir sicherheit.

die wârn hin ûz gevangen,

und kômn her în gegangen.

daz eine daz was Kaylet.

10

der sach den künec Gahmuret

sitzen als er wære unfrô.

er sprach «wie gebârstu sô?

dîn prîs ist doch dâ für rekant,

frôn Herzeloyden unde ir lant

15

hât dîn lîp errungen.

des jehent hie gar die zungen:

er sî Bertûn od Yrschman,

od swer hie wälhisch sprâche kan,

Franzois od Brâbant,

20

die jehent und volgent dîner hant,

dir enkünne an sô bewantem spiln

glîche niemen hie geziln.

des lis ich hie den wâren brief:

dîn kraft mit ellen dô niht slief,

25

dô dise hêrren kômn in nôt,

der hant nie sicherheit gebôt;

mîn hêr Brandelidelîn,

unt der küene Lähelîn,

Hardîz und Schaffillôr.

30

ôwê Razalîc der Môr,

86

dem du vor Pâtelamunt

tæte ouch fîanze kunt!

des gert dîn prîs an strîte

der hœhe und och der wîte.»

 

5

«Mîn frowe mac wænen daz du tobst,

sît du mich alsô verlobst.

dune maht mîn doch verkoufen niht,

wan etswer wandel an mir siht.

dîn munt ist lobs ze vil vernomn.

10

sag et, wie bistu wider komn?»

«diu werde diet von Punturteys

hât mich und disen Schampôneys

ledic lâzen über al.

Môrholt, der mînen neven stal,

15

von dem sol er ledic sîn,

mac mîn hêr Brandelidelîn

ledic sîn von dîner hant.

wir sîn noch anders beide phant,

ich unt mîner swester suon:

20

du solt an uns genâde tuon.

ein vesperîe ist hie erliten,

daz turnieren wirt vermiten

an dirre zît vor Kanvoleiz:

die rehten wârheit ich des weiz.

25

wan d'ûzer herte sitzet hie:

nu sprich et, wâ von oder wie

möhtens uns vor gehalden?

du muost vil prîses walden.»

diu küngîn sprach ze Gahmurete

30

von herzen eine süeze bete.

87

«swaz mînes rehtes an iu sî,

dâ sult ir mich lâzen bî:

dar zuo mîn dienst genâden gert.

wird ich der beider hie gewert,

5

sol iu daz prîs verkrenken,

sô lât mich fürder wenken.»

 

Der künegîn Ampflîsen,

der kiuschen unt der wîsen,

ûf spranc balde ir kappelân.

10

er sprach «niht. in sol ze rehte hân

mîn frouwe, diu mich in diz lant

nâch sîner minne hât gesant.

diu lebt nâch im ins lîbes zer:

ir minne hât an im gewer.

15

diu sol behalden sînen lîp:

wan sist im holt für elliu wîp.

hie sint ir boten fürsten drî,

kint vor missewende vrî.

der heizet einer Lanzidant,

20

von hôher art ûz Gruonlant:

der ist ze Kärlingen komn

und hât die sprâche an sich genomn.

der ander heizet Lîedarz,

fil li cunt Schîolarz.»

 

25

wer nu der dritte wære?

des hœret ouch ein mære.

des muoter hiez Bêâflûrs,

unt sîn vater Pansâmûrs:

die wâren von der feien art:

30

daz kint hiez Lîahturteltart.

88

diu liefen älliu driu für in.

si sprâchen «hêrre, hâstu sin

(dir zelt rêgîn de Franze

der werden minne schanze),

5

sô mahtu spilen sunder phant:

dîn freude ist kumbers ledec zehant.»

 

Dô diu botschaft was vernomn,

Kaylet, der ê was komn,

saz ter küngîn undr ir mandels ort:

10

hinz im sprach si disiu wort.

«sag an, ist dir iht mêr geschehen?

ich hân slege an dir gesehen.»

dô begreif im diu gehiure

sîne quaschiure

15

mit ir linden handen wîz:

an den lac der gotes flîz.

dô was im gamesieret

und sêre zequaschieret

hiufel, kinne, und an der nasen.

20

er hete der küneginne basen,

diu dise êre an im begienc

daz sin mit handen zir gevienc.

 

si sprach nâch zühte lêre

hinz Gahmurete mêre

25

«iu biutet vaste ir minne

diu werde Franzoysinne.

nu êret an mir elliu wîp,

und lât ze rehte mînen lîp.

sît hie unz ich mîn reht genem:

30

ir lâzet anders mich in schem.»

89

daz lobte ir der werde man.

si nam urloup, dô fuor si dan.

si huop Kaylet, der degen wert,

sunder schamel ûf ir pfert,

5

und gienc von ir hin wider în,

aldâ er sach die friunde sîn.

 

Er sprach ze Hardîze

«iwer swester Alîze

mir minne bôt: die nam ich dâ.

10

diu ist bestatet anderswâ,

und werdeclîcher dan ze mir.

durch iwer zuht lât zornes gir.

si hât der fürste Lämbekîn.

al sül si niht gekrœnet sîn,

15

si hât doch werdekeit bekant:

Hânouwe und Brâbant

ir dienet, und manc ritter guot.

kêrt mir ze grüezen iweren muot,

lât mich in iwern hulden sîn,

20

und nemt hin widr den dienest mîn.»

 

der künec von Gascône sprach

als im sîn manlîch ellen jach

«iwer rede was ie süeze:

swer iuch dar umbe grüeze,

25

dem ir vil lasters hât getân,

der woltez doch durch vorhte lân.

mich vienc iwer muomen suon:

der kan an niemen missetuon.»

«ir wert wol ledec von Gahmurete.

30

daz sol sîn mîn êrstiu bete.

90

swenne ir dan unbetwungen sît,

mîn dienst gelebet noch die zît

daz ir mich zeinem friwende nemt.

ir möht iuch nu wol hân verschemt.

5

swaz halt mir von iu geschiht,

mich enslüege doch iur swester niht.»

 

Der rede si lachten über al.

dô wart getrüebet in der schal.

den wirt sîn triwe mente

10

daz er sich wider sente:

wan jâmer ist ein schärpher gart.

ir ieslîcher innen wart

daz sîn lîp mit kumber ranc

und al sîn freude was ze kranc.

15

dô zurnde sîner muomen suon,

er sprach «du kanst unfuoge tuon.»

 

«nein, ich muoz bî riwen sîn:

ich sen mich nâch der künegîn.

ich liez ze Pâtelamunt

20

dâ von mir ist mîn herze wunt,

in reiner art ein süeze wîp.

ir werdiu kiusche mir den lîp

nâch ir minne jâmers mant.

si gap mir liute unde lant.

25

mich tuot frô Belakâne

manlîcher freuden âne:

ez ist doch vil manlich,

swer minnen wankes schamet sich.

der frouwen huote mich ûf pant,

30

daz ich niht rîterschefte vant:

91

dô wânde ich daz mich rîterschaft

næm von ungemüetes kraft.

der hân ich hie ein teil getân.

nu wænt manc ungewisser man

5

daz mich ir swerze jagte dane:

die sah ich für die sunnen ane.

ir wîplich prîs mir füeget leit:

si ist [ein] bukel ob der werdekeit.

 

Einz undz ander muoz ich klagen:

10

ich sach mîns bruoder wâpen tragen

mit ûf kêrtem orte.»

ôwê mir dirre worte!

daz mære wart dô jæmerlîch.

von wazzer wurden d'ougen rîch

15

dem werden Spânôle.

«ôwî küngîn Fôle,

durch dîne minne gap den lîp

Gâlôes, den elliu wîp

von herzen klagen solten

20

mit triwen, op si wolten

daz ir site bræhte

lop swâ mans gedæhte.

küngîn von Averre,

swie lützel ez dir werre,

25

den mâg ich doch durch dich verlôs,

der rîterlîchen ende kôs

von einer tjoste, diu in sluoc

do'r dîn kleinœte truoc.

fürsten, die gesellen sîn,

30

tuont herzenlîche ir klagen schîn.

92

si hânt ir schildes breite

nâch jâmers geleite

zer erden gekêret:

grôz trûren si daz lêret.

5

alsus tuont si rîterschaft.

si sint verladen mit jâmers kraft,

sît Gâlôes mînr muomen suon

nâch minnen dienst niht solde tuon.»

 

Dô er vernam des bruoder tôt,

10

daz was sîn ander herzenôt.

mit jâmer sprach er disiu wort.

«wie hât nu mîns ankers ort

in riwe ergriffen landes habe!»

der wâppen teter sich dô abe.

15

sîn riwe im hertes kumbers jach.

der helt mit wâren triwen sprach

«von Anschouwe Gâlôes!

fürbaz darf niemen vrâgen des:

ez enwart nie manlîcher zuht

20

geborn: der wâren milte fruht

ûz dîme herzen blüete.

nu erbarmet mich dîn güete.»

 

er sprach ze Kaylette

«wie gehabt sich Schôette,

25

mîn muoter freuden arme?»

«sô daz ez got erbarme.

dô ir erstarp Gandîn

und Gâlôes der bruoder dîn,

unt dô si dîn bî ir niht sach,

30

der tôt och ir daz herze brach.»

93

dô sprach der künec Hardîz

«nu kêrt an manheit iwern vlîz.

ob ir manheit kunnet tragn,

sô sult ir leit ze mâzen klagn.»

5

sîn kumber leider was ze grôz:

ein güsse im von den ougen vlôz.

er schuof den rittern ir gemach,

und gienc da er sîne kamern sach,

ein kleine gezelt von samît.

10

die naht er dolte jâmers zît.

 

Als der ander tac erschein,

si wurden alle des enein,

die innern und daz ûzer her,

swer dâ mit strîteclîcher wer

15

wære, junc oder alt,

oder blœde oder balt,

dien solden tjostieren nieht.

dô schein der mitte morgen lieht.

si wârn mit strîte sô verribn

20

unt d'ors mit sporn alsô vertribn,

daz die vrechen ritterschaft

ie dennoch twanc der müede kraft.

diu küngîn reit dô selbe

nâch den werden hin ze velde,

25

und brâht si mit ir in die stat.

die besten si dort inne bat

daz si zer Lêôplâne riten.

done wart ir bete niht vermiten:

si kômen dâ man messe sanc

30

dem trûregen künec von Zazamanc.

94

als der benditz wart getân,

dô kom frou Herzeloyde sân.

an Gahmuretes lîp si sprach:

si gerte als ir diu volge jach.

5

dô sprach er «frouwe, ich hân ein wîp:

diu ist mir lieber danne der lîp.

ob ich der âne wære,

dennoch wess ich ein mære,

dâ mit ich iu enbræste gar,

10

næm iemen mînes rehtes war.»

 

«Ir sult die Mœrinne

lân durch mîne minne.

des toufes segen hât bezzer kraft.

nu ânet iuch der heidenschaft,

15

und minnet mich nâch unser ê:

wan mirst nâch iwerr minne wê.

oder sol mir gein iu schade sîn

der Franzoyser künegîn?

der boten sprâchen süeziu wort,

20

si spiltn ir mære unz an den ort.»

 

«jâ diu ist mîn wâriu frouwe.

ich brâht in Anschouwe

ir rât und mîner zühte site:

mir wont noch hiute ir helfe mite,

25

dâ von daz mich mîn frouwe zôch,

die wîbes missewende ie flôch.

wir wâren kinder beidiu dô,

unt doch ze sehen ein ander vrô.

diu küneginne Amphlîse

30

wont an wîplîchem prîse.

95

mir gap diu gehiure

vom lande de besten stiure:

(ich was dô ermer denne nuo)

dâ greif ich willeclîchen zuo.

5

zelt mich noch für die armen.

ich solt iuch, frouwe, erbarmen:

mir ist mîn werder bruoder tôt.

durch iwer zuht lât mich ân nôt.

kêrt minne dâ diu freude sî:

10

wan mir wont niht wan jâmer bî.»

 

«Lât mich den lîp niht langer zern:

sagt an, wâ mite welt ir iuch wern?»

«ich sage nâch iwerre frâge ger.

ez wart ein turney dâ her

15

gesprochen: des enwart hie niht.

manec geziuc mir des giht.»

«den hât ein vesperîe erlemt.

die vrechen sint sô hie gezemt,

daz der turney dervon verdarp.»

20

«iwerr stete wer ich warp

mit den diez guot hie hânt getân.

ir sult mich nôtrede erlân:

ez tet hie manec ritter baz.

iwer reht ist gein mir laz;

25

niwan iwer gemeiner gruoz,

ob ich den von iu haben muoz.»

 

als mir diu âventiure sagt,

dô nam der ritter und diu magt

einen rihtære übr der frouwen klage.

30

dô nâhet ez dem mitten tage.

96

man sprach ein urteil zehant,

«swelch ritter helm hie ûf gebant,

der her nâch rîterschaft ist komn,

hât er den prîs hie genomn,

5

den sol diu küneginne hân.»

dar nâch diu volge wart getân.

dô sprach si «hêr, nu sît ir mîn.

ich tuon iu dienst nâch hulden schîn,

und füege iu sölher fröuden teil,

10

daz ir nâch jâmer werdet geil.»

 

Er het iedoch von jâmer pîn.

dô was des abrillen schîn

zergangen, dar nâch komen was

kurz kleine grüene gras.

15

daz velt was gar vergrüenet;

daz plœdiu herzen küenet

und in gît hôchgemüete.

vil boume stuont in blüete

von dem süezen luft des meien.

20

sîn art von der feien

muose minnen oder minne gern.

des wolt in friundîn dâ gewern.

 

an [frôn] Herzeloyden er dô sach:

sîn süezer munt mit zühten sprach

25

«frowe, sol ich mit iu genesen,

sô lât mich âne huote wesen.

wan verlæt mich immer jâmers kraft,

sô tæt ich gerne rîterschaft.

lât ir niht turnieren mich,

30

sô kan ich noch den alten slich,

97

als dô ich mînem wîbe entran,

die ich ouch mit rîterschaft gewan.

dô si mich ûf von strîte bant,

ich liez ir liute unde lant.»

5

si sprach «hêr, nemt iu selbe ein zil:

ich lâz iu iwers willen vil.»

«ich wil frumen noch vil der sper enzwei:

aller mânedglîch ein turnei,

des sult ir frouwe ruochen,

10

daz ich den müeze suochen.»

diz lobte si, wart mir gesagt:

er enphienc diu lant unt och die magt.

 

Disiu driu junchêrrelîn

Ampflîsen der künegîn

15

hie stuonden, unde ir kappelân,

dâ volge und urteil wart getân,

aldâ erz hôrte unde sach.

heinlîche er Gahmureten sprach.

«man tet mîner frouwen kunt

20

daz ir vor Pâtelamunt

den hœhsten prîs behieltet

unt dâ zweir krône wieltet.

si hât ouch lant unde muot,

und gît iu lîp unde guot.»

 

25

«dô si mir gap die rîterschaft,

dô muos ich nâch der ordens kraft,

als mir des schildes ambet sagt,

derbî belîben unverzagt.

wan daz ich schilt von ir gewan,

30

ez wær noch anders ungetân.

98

ich werdes trûric oder geil,

mich behabt hie rîters urteil.

vart wider, sagt ir dienest mîn;

ich sül iedoch ir ritter sîn.

5

ob mir alle krône wærn bereit,

ich hân nâch ir mîn hœhste leit.»

er bôt in sîne grôze habe:

sîner gebe tâten si sich abe.

die boten fuorn ze lande

10

gar ân ir frouwen schande.

sine gerten urloubes niht,

als lîhte in zorne noch geschiht.

ir knappen fürsten, disiu kint

wârn von weinen vil nâch blint.

15

Die den schilt verkêrt dâ hânt getragn,

den begunde ir friwent ze velde sagn

«frou Herzeloyd diu künegîn

hât behabt den Anschevîn.»

«wer was von Anschouwe dâ?

20

unser hêrre ist leider anderswâ,

durch rîters prîs zen Sarrazîn.

daz ist nu unser hôhster pîn.»

«der hie den prîs hât bezalt

unt sô mangen ritter ab gevalt,

25

unt der sô stach unde sluoc,

unt der den tiwern anker truoc

ûf dem helme lieht gesteinet,

daz ist den ir dâ meinet.

mir sagt der künec Kaylet,

30

der Anschevîn wær Gahmuret.

99

dem ist hie wol gelungen.»

nâch den orsen si dô sprungen.

ir wât wart von den ougen naz,

dô si kômen dâ ir hêrre saz.

5

si enphiengen in, ernphienc ouch sie.

freude und jâmer daz was hie.

 

dô kuster die getriuwen,

er sprach «iuch sol niht riuwen

zunmâzer wîs der bruoder mîn:

10

ich mag iuch wol ergetzen sîn.

kêrt ûf den schilt nâch sîner art,

gehabt iuch an der freuden vart.

ich sol mîns vater wâpen tragn:

sîn lant mîn anker hât beslagn.

15

der anker ist ein recken zil:

den trage und nem nu swer der wil.

Ich muoz nu lebelîche

gebâren: ich bin rîche.

wan solt ich volkes hêrre sîn?

20

den tæte wê der jâmer mîn.

frou Herzeloyde, helfet mir,

daz wir biten, ich unt ir,

künge und fürsten die hie sîn,

daz si durch den dienest mîn

25

belîben, unz ir mich gewert

des minnen werc zer minnen gert.»

die bete warb ir beider munt:

die werden lobtenz sâ ze stunt.

 

ieslîcher fuor an sîn gemach:

30

diu künegîn zir friunde sprach

100

«nu habt iuch an mîne phlege.»

si wîst in heinlîche wege.

sîner geste phlac man wol ze frumn,

swar halt ir wirt wære kumn.

5

daz gesinde wart gemeine:

doch fuor er dan al eine,

wan zwei junchêrrelîn.

juncfrouwen unt diu künegîn

in fuorten dâ er freude vant

10

und al sîn trûren gar verswant.

entschumphiert wart sîn riwe

und sîn hôchgemüete al niwe:

daz muose iedoch bî liebe sîn.

frou Herzeloyd diu künegîn

15

ir magettuom dâ âne wart.

die munde wâren ungespart:

die begunden si mit küssen zern

und dem jâmer von den freuden wern.

 

Dar nâch er eine zuht begienc:

20

si wurden ledic, dier dâ vienc.

Hardîzen und Kaylet,

seht, die versuonde Gahmuret.

da ergienc ein sölhiu hôhgezît,

swer der hât gelîchet sît,

25

des hant iedoch gewaldes phlac.

Gahmuret sich des bewac,

sîn habe was vil ungespart.

aræbesch golt geteilet wart

armen rîtern al gemeine,

30

unt den küngen edel gesteine

101

teilte Gahmuretes hant,

und ouch swaz er dâ fürsten vant.

dâ wart daz varnde volc vil geil:

die enphiengen rîcher gâbe teil.

 

5

lât si rîten, swer dâ geste sîn:

den gap urloup der Anschevîn.

dez pantel, daz sîn vater truoc,

von zoble ûf sînen schilt man sluoc.

al kleine wîz sîdîn

10

ein hemde der künegîn,

als ez ruorte ir blôzen lîp,

diu nu worden was sîn wîp,

daz was sîns halsperges dach.

ahzehniu manr durchstochen sach

15

und mit swerten gar zerhouwen,

ê er schiede von der frouwen.

daz leit ouch si an blôze hût,

sô kom von rîterschaft ir trût,

der manegen schilt vil dürkel stach.

20

ir zweier minne triwen jach.

 

Er hete werdekeit genuoc,

dô in sîn manlîch ellen truoc

hin über gein der herte.

mich jâmert sîner verte.

25

im kom diu wâre botschaft,

sîn hêrre der bâruc wær mit kraft

überriten von Babylôn.

einer hiez Ipomidôn,

der ander Pompeius.

30

den nennet d'âventiure alsus.

102

daz was ein stolz werder man

(niht der von Rôme entran

Julîus dâ bevor):

der künec Nabchodonosor

5

sîner muoter bruoder was,

der an trügelîchen buochen las

er solte selbe sîn ein got.

daz wære nu der liute spot.

ir lîp, ir guot was ungespart.

10

die gebruoder wârn von hôher art,

von Nînus, der gewaldes pflac

ê wurde gestiftet Baldac.

der selbe stift ouch Ninnivê.

in tet schade und laster wê:

15

der jach der bâruc zurborn.

des wart gewunnen unt verlorn

genuoc ze bêden sîten:

man sach tâ helde strîten.

dô schift er sich über mer,

20

und vant den bâruc mit wer.

mit freuden er enphangen wart,

swie mich jâmer sîner vart.

 

Waz tâ geschehe, wiez dort ergê,

gewin und flust, wie daz gestê,

25

desn weiz frou Herzeloyde nieht.

diu was als diu sunne lieht

und hete minneclîchen lîp.

rîcheit bî jugent phlac daz wîp,

und freuden mêre dan ze vil:

30

si was gar ob dem wunsches zil.

103

si kêrte ir herze an guote kunst:

des bejagte si der werlde gunst.

frou Herzeloyd diu künegin,

ir site an lobe vant gewin,

5

ir kiusche was für prîs erkant.

küngîn über driu lant,

Wâleys und Anschouwe,

dar über was si frouwe,

si truog ouch krôn ze Norgâls

10

in der houbetstat ze Kingrivâls.

ir was ouch wol sô liep ir man,

ob ie kein frouwe mêr gewan

sô werden friunt, waz war ir daz?

si möhtez lâzen âne haz.

 

15

do er ûze beleip ein halbez jâr,

sîns komens warte si für wâr:

daz was ir lîpgedinge.

dô brast ir freuden klinge

mitten ime hefte enzwei.

20

ôwê unde heiâ hei,

daz güete alsölhen kumber tregt

und immer triwe jâmer regt!

alsus vert diu mennischeit,

hiute freude, morgen leit.

 

25

Diu frouwe umb einen mitten tac

eins angestlîchen slâfes pflac.

ir kom ein forhtlîcher schric.

si dûhte wie ein sternen blic

si gein den lüften fuorte,

30

dâ si mit kreften ruorte

104

manc fiurîn donerstrâle.

die flugen al zemâle

gein ir: dô sungelt unde sanc

von gänstern ir zöphe lanc.

5

mit krache gap der doner duz:

brinnde zäher was sîn guz.

 

ir lîp si dâ nâch wider vant,

dô zuct ein grif ir zeswen hant:

daz wart ir verkêrt hie mite.

10

si dûhte wunderlîcher site,

wie sie wære eins wurmes amme,

der sît zerfuorte ir wamme,

und wie ein trache ir brüste süge,

und daz der gâhes von ir flüge,

15

sô daz sin nimmer mêr gesach.

daz herze err ûzem lîbe brach:

die vorhte muose ir ougen sehen.

ez ist selten wîbe mêr geschehen

in slâfe kumber dem gelîch.

20

dâ vor was si ritterlîch:

ach wênc, daz wirt verkêret gar,

si wirt nâch jâmer nu gevar.

ir schade wirt lanc unde breit:

ir nâhent komendiu herzenleit.

 

25

Diu frouwe dô begunde,

daz si dâ vor niht kunde,

beidiu zabeln und wuofen,

in slâfe lûte ruofen.

vil juncfrouwen sâzen hie:

30

die sprungen dar und wacten sie.

105

dô kom geriten Tampanîs,

ir mannes meisterknappe wîs,

und kleiner junchêrren vil.

dâ giengez ûz der freuden zil.

5

die sagten klagende ir hêrren tôt:

des kom frou Herzeloyde in nôt,

si viel hin unversunnen.

die ritter sprâchen «wiest gewunnen

mîn hêrre in sîme harnas,

10

sô wol gewâpent sô er was?»

 

swie den knappen jâmer jagte,

den helden er doch sagte

«mînen hêrren lebens lenge vlôch.

sîn härsenier von im er zôch:

15

des twanc in starkiu hitze.

gunêrtiu heidensch witze

hât uns verstoln den helt guot.

ein ritter hete bockes bluot

genomen in ein langez glas:

20

daz sluoger ûf den adamas:

dô wart er weicher danne ein swamp.

den man noch mâlet für daz lamp,

und ouchz kriuze in sîne klân,

den erbarme daz tâ wart getân.

 

25

dô si mit scharn zein ander ritn,

âvoy wie dâ wart gestritn!

Des bâruckes ritterschaft

sich werte wol mit ellens kraft.

vor Baldac ûfme gevilde

30

durchstochen wart vil schilde,

106

dâ si zein ander gâhten.

die poynder sich tâ flâhten,

sich wurren die banier:

dâ viel manec degen fier.

5

aldâ worht mîns hêrren hant

dâ von ir aller prîs verswant.

dô kom gevarn Ipomidôn:

mit tôde er mîme hêrren lôn

gap, daz er in nider stach

10

dâ'z manec tûsent ritter sach.

 

von Alexandrîe

mîn hêrre valsches vrîe

gein dem künege kêrte,

des tjost in sterben lêrte.

15

sînen helm versneit des spers ort

durch sîn houbet wart gebort,

daz man den trunzûn drinne vant.

iedoch gesaz der wîgant,

al töunde er ûz dem strîte reit

20

ûf einen plân, die was breit.

übr in kom sîn kappelân.

er sprach mit kurzen worten sân

sîne bîhte und sande her

diz hemde unt daz selbe sper

25

daz in von uns gescheiden hât.

er starp ân alle missetât.

junchêrren und die knappen sîn

bevalch er der künegîn.

Er wart geleit ze Baldac.

30

diu kost den bâruc ringe wac.

107

mit golde wart gehêret,

grôz rîcheit dran gekêret

mit edelem gesteine,

dâ inne lît der reine.

5

gebalsemt wart sîn junger rê.

vor jâmer wart vil liuten wê.

ein tiwer rubîn ist der stein

ob sîme grabe, dâ durch er schein.

uns wart gevolget hie mite:

10

ein kriuze nâch der marter site,

als uns Kristes tôt lôste,

liez man stôzen im ze trôste,

ze scherm der sêle, überz grap.

der bâruc die koste gap:

15

ez was ein tiwer smârât.

wir tâtenz âne der heiden rât:

ir orden kan niht kriuzes phlegn,

als Kristes tôt uns liez den segn.

ez betent heiden sunder spot

20

an in als an ir werden got,

niht durch des kriuzes êre

noch durch des toufes lêre,

der zem urteillîchen ende

uns lœsen sol gebende.

25

diu manlîche triwe sîn

gît im ze himel liehten schîn,

und ouch sîn riwic pîhte.

der valsch was an im sîhte.

In sînen helm, den adamas,

30

ein epitafum ergraben was,

108

versigelt ûfz kriuze obeme grabe.

sus sagent die buochstabe.

«durch disen helm ein tjoste sluoc

den werden der ellen truoc.

5

Gahmuret was er genant,

gewaldec künec übr driu lant.

ieglîchez im der krône jach:

dâ giengen rîche fürsten nâch.

er was von Anschouwe erborn,

10

und hât vor Baldac verlorn

den lîp durch den bâruc.

sîn prîs gap sô hôhen ruc,

niemen reichet an sîn zil,

swâ man noch ritter prüeven wil.

15

er ist von muoter ungeborn,

zuo dem sîn ellen habe gesworn:

ich mein der schildes ambet hât.

helfe und manlîchen rât

gap er mit stæte'n friunden sîn:

20

er leit durch wîp vil schärpfen pîn.

er truoc den touf und kristen ê:

sîn tôt tet Sarrazînen wê

sunder liegen, daz ist wâr.

sîner zît versunnenlîchiu jâr

25

sîn ellen sô nâch prîse warp,

mit ritterlîchem prîse er starp.

er hete der valscheit an gesigt.

nu wünscht im heiles, der hie ligt.»

diz was alsô der knappe jach.

30

Wâleise man vil weinen sach.

109

Die muosen wol von schulden klagn.

diu frouwe hête getragn

ein kint, daz in ir lîbe stiez,

die man ân helfe ligen liez.

5

ahzehen wochen hete gelebt

des muoter mit dem tôde strebt,

frou Herzeloyd diu künegin.

die andern heten kranken sin,

daz si hulfen niht dem wîbe:

10

wan si truoc in ir lîbe

der aller ritter bluome wirt,

ob in sterben hie verbirt.

dô kom ein altwîser man

durch klage über die frouwen sân,

15

dâ si mit dem tôde ranc.

die zene err von ein ander twanc:

man gôz ir wazzer in den munt.

aldâ wart ir versinnen kunt.

 

si sprach «ôwê war kom mîn trût?»

20

diu frouwe in klagete über lût.

«mînes herzen freude breit

was Gahmuretes werdekeit.

den nam mir sîn vrechiu ger.

ich was vil junger danne er,

25

und bin sîn muoter und sîn wîp.

ich trage alhie doch sînen lîp

und sînes verhes sâmen.

den gâben unde nâmen

unser zweier minne.

30

hât got getriwe sinne,

110

sô lâzer mirn ze frühte komn.

ich hân doch schaden ze vil genomn

An mînem stolzen werden man.

wie hât der tôt ze mir getân!

5

er enphienc nie wîbes minnen teil,

ern wære al ir vröuden geil:

in müete wîbes riuwe.

daz riet sîn manlîch triuwe:

wand er was valsches lære.»

10

nu hœrt ein ander mære,

 

waz diu frouwe dô begienc.

kint und bûch si zir gevienc

mit armen und mit henden.

si sprach «mir sol got senden

15

die werden fruht von Gahmurete.

daz ist mînes herzen bete.

got wende mich sô tumber nôt:

daz wær Gahmurets ander tôt,

ob ich mich selben slüege,

20

die wîle ich bî mir trüege

daz ich von sîner minne enphienc,

der mannes triwe an mir begienc.»

diu frouwe enruochte wer daz sach,

daz hemde von der brust si brach.

25

ir brüstel linde unde wîz,

dar an kêrte si ir vlîz,

si dructes an ir rôten munt.

si tet wîplîche fuore kunt.

alsus sprach diu wîse.

30

«du bist kaste eins kindes spîse:

111

die hât ez vor im her gesant,

sît ichz lebende im lîbe vant.»

 

Diu frouwe ir willen dar an sach,

daz diu spîse was ir herzen dach,

5

diu milch in ir tüttelîn:

die dructe drûz diu künegîn.

si sprach «du bist von triwen komn.

het ich des toufes niht genomn,

du wærest wol mîns toufes zil.

10

ich sol mich begiezen vil

mit dir und mit den ougen,

offenlîch und tougen:

wande ich wil Gahmureten klagn.»

diu frouwe hiez dar nâher tragn

15

ein hemde nâch bluote var,

dar inne ans bâruckes schar

Gahmuret den lîp verlôs,

der werlîchen ende kôs

mit rehter manlîcher ger.

20

diu frouwe vrâgte ouch nâch dem sper,

daz Gahmurete gab den rê.

Ipomidôn von Ninnivê

gap alsus werlîchen lôn,

der stolze werde Babylôn:

25

daz hemde ein hader was von slegn.

diu frouwe woldez an sich legn,

als si dâ vor hete getân,

sô kom von ritterschaft ir man:

dô nâmen siz ir ûzer hant.

30

die besten über al daz lant

112

bestatten sper und ouch daz bluot

ze münster, sô man tôten tuot.

in Gahmuretes lande

man jâmer dô bekande.

 

5

Dann übr den vierzehenden tac

diu frouwe eins kindelîns gelac,

eins suns, der sölher lide was

daz si vil kûme dran genas.

 

hiest der âventiure wurf gespilt,

10

und ir begin ist gezilt:

wand er ist alrêrst geborn,

dem diz mære wart erkorn.

sîns vater freude und des nôt,

beidiu sîn leben und sîn tôt,

15

des habt ir wol ein teil vernomn.

nu wizzet wâ von iu sî komn

diss mæres sachewalte,

und wie man den behalte.

man barg in vor ritterschaft,

20

ê er kœme an sîner witze kraft.

 

dô diu küngîn sich versan

und ir kindel wider zir gewan,

si und ander frouwen

begunde betalle schouwen

25

zwischen beinn sîn visellîn.

er muose vil getriutet sîn,

do er hete manlîchiu lit.

er wart mit swerten sît ein smit,

vil fiwers er von helmen sluoc:

30

sîn herze manlîch ellen truoc.

113

die küngîn des geluste

daz sin vil dicke kuste.

si sprach hinz im in allen flîz

«bon fîz, scher fîz, bêâ fîz.»

 

5

Diu küngîn nam dô sunder twâl

diu rôten välwelohten mâl:

ich meine ir tüttels gränsel:

daz schoup sim in sîn vlänsel.

selbe was sîn amme

10

diu in truoc in ir wamme:

an ir brüste si in zôch,

die wîbes missewende vlôch.

si dûht, si hete Gahmureten

wider an ir arm erbeten.

15

si kêrt sich niht an lôsheit:

diemuot was ir bereit.

 

[frou] Herzeloyde sprach mit sinne

«diu hœhste küneginne

Jêsus ir brüste bôt,

20

der sît durch uns vil scharpfen tôt

ame kriuze mennischlîche enphienc

und sîne triwe an uns begienc.

swes lîp sîn zürnen ringet,

des sêle unsamfte dinget,

25

swie kiuscher sî und wære.

des weiz ich wâriu mære.»

 

sich begôz des landes frouwe

mit ir herzen jâmers touwe:

ir ougen regenden ûf den knabn.

30

si kunde wîbes triwe habn.

114

beidiu siufzen und lachen

kunde ir munt vil wol gemachen.

si vreute sich ir suns geburt:

ir schimph ertranc in riwen furt.

5

Swer nu wîben sprichet baz,

deiswâr daz lâz ich âne haz:

ich vriesche gerne ir freude breit.

wan einer bin ich unbereit

dienstlîcher triuwe:

10

mîn zorn ist immer niuwe

gein ir, sît ich se an wanke sach.

ich bin Wolfram von Eschenbach,

unt kan ein teil mit sange,

unt bin ein habendiu zange

15

mînen zorn gein einem wîbe:

diu hât mîme lîbe

erboten solhe missetât,

ine hân si hazzens keinen rât.

dar umb hân ich der andern haz.

20

ôwê war umbe tuont si daz?

 

alein sî mir ir hazzen leit,

ez ist iedoch ir wîpheit,

sît ich mich versprochen hân

und an mir selben missetân;

25

daz lîhte nimmer mêr geschiht.

doch sulen si sich vergâhen niht

mit hurte an mîn hâmît:

si vindent werlîchen strît.

ine hân des niht vergezzen,

30

ine künne wol gemezzen

115

beide ir bærde unt ir site.

swelhem wîbe volget kiusche mite,

der lobes kemphe wil ich sîn:

mir ist von herzen leit ir pîn.

 

5

Sîn lop hinket ame spat,

swer allen frouwen sprichet mat

durch sîn eines frouwen.

swelhiu mîn reht wil schouwen,

beidiu sehen und hœren,

10

dien sol ich niht betœren.

schildes ambet ist mîn art:

swâ mîn ellen sî gespart,

swelhiu mich minnet umbe sanc,

sô dunket mich ir witze kranc.

15

ob ich guotes wîbes minne ger,

mag ich mit schilde und ouch mit sper

verdienen niht ir minne solt,

al dar nâch sî sie mir holt.

vil hôhes topels er doch spilt,

20

der an ritterschaft nâch minnen zilt.

 

hetenz wîp niht für ein smeichen,

ich solt iu fürbaz reichen

an disem mære unkundiu wort,

ich spræche iu d'âventiure vort.

25

swer des von mir geruoche,

dern zels ze keinem buoche.

ine kan decheinen buochstap.

dâ nement genuoge ir urhap:

disiu âventiure

30

vert âne der buoche stiure.

116

ê man si hete für ein buoch,

ich wære ê nacket âne tuoch,

sô ich in dem bade sæze,

ob ichs questen niht vergæze.