| |
|
-
- D a s n a r r e n s c h y f f .
X L V I I I . [ E y n g e s e l l e n s c h i f f ]
- __________________________________________
- [Eyn gesellen schiff]
- Eyn gsellen schiff fert yetz do hær /
Das ist von hantwercks lüten schwær
Von allen gwerben vnd hantyeren /
Jeder syn gschyrr důt mit jm fűren
- 5
- Keyn hantwerck stat me jnn sym wærdt
Es ist als überleydt / beschwært
Jeder knecht / meyster werden will
Des sint yetz aller hantwerck vil
Mancher zů meysterschafft sich kert
- 10
- Der nye das hantwerck hat gelert
Eyner dem andern werckt zů leyd
Vnd tribt sich selbs dick vber die heyd
Das ers wolfeyl erzügen kan
Des můß er offt zům thor vß gan
- 15
- Was dyser nit will wolfeyl gæn
Do findt man sunst dryg oder zwen
Die meynen das erzügen wol
Důnt doch nit arbeyt / als man sol
Dann man hyen sudelt yetz all ding
- 20
- Das man sie geben mœg gering
Do by mag man nit langzyt bliben
Dür kouffen / vnd wolfeyl vertriben
Mancher eym andern macht eyn kouff
Der blibt / so er zům thor vß loufft
- 25
- Vff wolfeyl gæn / gat yederman
Vnd ist doch gantz keyn werschafft dran
Dann wenig kosten man dran leidt
Vnd würt als vff die yl bereydt
Das es alleyn eyn muster hab
- 30
- Do mit die hantwerck gont vast ab
Mœgent nit wol erneren sich
Was du nit důst / das dů doch ich
Vnd leg dar an keyn kost noch wile
Echt ich alleyn mœg machen vil /
- 35
- Ich selbs / das ich die worheyt sag
Mit disen narren hab vil tag
Vertriben / ee ichs hab erdicht
Noch sint sie nit recht zů gericht
Ich hett bedœrfft noch lenger tag
- 40
- Keyn gůt werck / yl erlyden mag
Der moler der Apelli bracht
Syn tafel / die er bald hat gmacht
Vnd sprach er hett geylt do mit
Fand er jnn bald on anttwürt nitt
- 45
- Er sprach / die arbeyt zeigt wol an
Das du hast wenig flyß gethon
Vnd wunder ist / das du nit vil
Der glych hast gmacht jn kurtzer wil
Keyn arbeit dett nie gůt zůr yl
- 50
- Den stich es nit wol lyden mag
Zwentzig par schů / vff eynen tag
Eyn dutzen tægen vß bereytten
Vil wercken / vnd vff borg dann beitten
Vertrybt gar manchem offt das lachen
- 55
- Bœß zymerlüt vil spænen machen
Die murer důnt gern grosse brüch
Die schnyder důnt gar witte stich
Do würt die natt gar leittig von
Die trucker in dem brasß vmb gon
- 60
- Vff eynen tag / eyn wochen lon
Verzeren / das ist jr gefert
Ir arbeyt ist doch schwer vnd hert
Mitt trucken / vnd (mit) bosselyeren
Mit setzen / strichen / corrigieren
- 65
- Vff tragen / mit der schwartzen kunst
Varb brennend / jn des füres brunst
Vnd ryben die / vnd vigen spitzen /
Vil sint die lang jnn arbeyt sitzen
Machen doch nit dest besser werck
- 70
- Das důt / sie sint von affenberck
Vnd hant die kunst nit baß gelert
Mancher in disem schyff gern fert
Dann es sint vil gůt bossen drynn
Die groß arbeit vnd kleynen gwynn
- 75
- Hant / vnd verzeren das doch licht
Dann jnn ist wol by der wynfücht
Vff kunfftigs / hant gar wenig sorg
Wann man alleyn jnn gibt vff borg
Mancher eyn bletzschkouff machen kan
- 80
- Do er nit vil gewynnet an /
Man kan yetz nüt verkouffen me
Man hab dann gott geschworen ee
Vnd so man lang schwœrt / jn vnd vß
So wurt eyn vischerschlag dann druß
- 85
- Do by merckt man das all diß welt
Sich vast des kœllschen bœttchen helt
Dat halff ab / ist yetz vast der schlagk
Berott dich gott / bricht keym den sack
Die hantwerck faren all do hær
- 90
- Noch sint vil schifflin halber lær
|
|