| |
|
-
- D a s n a r r e n s c h y f f .
X C V . v ō v e r f u r ū g a m f y r t a g
- __________________________________________
- Mancher soltt zů der kyrchen gan
Vnd an dem fyrtag műssig stan
Der sich doch vil geschefft nymbt an
- vō verfurūg am fyrtag
- Das synt burger zů Affenbergk
Die all jr sachen / vnd jr werck
Sparen alleyn vff gbannen tagen
Die műssen vff den affen wagen
- 5
- Dem eynen / můß man roß beschlagen
Dem andern knœpflin setzen an
Das man nůn langst soltt han gethan
Do man saß by dem spyl vnd wyn /
Dem füllet man die spitzen syn
- 10
- Vil hudelen můß man dar jn stossen /
Dem můß man an důn rœck / vnd hosen
Das mœcht er sunst nit legen an
Hett ers nit vff eyn fyrtag gthan /
Die kœch zů richten für / vnd glůt
- 15
- Ee man die kylch morgens vff důt
So fyndt man by jn schlemmē vñ brassē
Ee yemans recht kumbt / vff die gassen
So synt die wynhuser schier voll
Das tribt man on end yemerdol
- 20
- Vor vß / vff den gebannen tagen /
So andere werck synt vnderschlagen
So důt man faren mit den karrhen /
Der fyrtag manchen macht zům narrē
Der meynt der fyrtag sy erdacht
- 25
- Das kleyner arbeit gott nit acht
Als das mans holtz jm spiel brætt schlag
Vnd kartten sytzt eyn gantzen tag /
Vil lont sunst wercken jr gesynd
Vnd hant keyn acht das dienst vnd kynd
- 30
- Zů kyrchen / predig / gotz dienst gon
Oder frűg zů der meß vff ston
Den mætt went sie erst recht vß kochen
Den sie gesotten hant die wochen /
Keyn hantwerck ist dem nit gefűg
- 35
- Das es am fyrtag ettwas dűg
Sie synt dem pfenning also gferd
Als ob keyn tag me wer vff erd
Eyn teil stont schwætzen vff der gassen
Die andern sytzen spyelen / prassen
- 40
- Manchem jm wyn do me zerrynt
Dann er eyn woch mit arbeit gwynnt /
Der műß ein schmürtzler / hümpeler sin
Wer nit will sitzen by dem wyn
Tag / vnd nacht / biß die katzen kreygt
- 45
- Oder der morgen lufft har weygt /
Die juden spotten vnser ser
Das wir dem fyrtag důnt solch ere
Den sie noch haltten also styff
Das ich sie nit jnns narren schiff
- 50
- Woltt setzen / wann sie nit all stunt
Sunst jrrten / wie eyn douber hundt
Eyn arm man holtz am fyrtag laß
Vnd wart versteynt / alleyn vmb das /
Die Machabeer woltten nitt
- 55
- Am fyrtag wœren sich zů strit
Ir wurden vil erschlagen dott /
Man samlet nytt das hymel brott
Vff den fyrtag / als gott gebot /
Aber wir arbeytten on nott
- 60
- Vnd sparen vil vff den fyrtag
Das wir nit thün went andere tag /
O narr den fyrtag halt / vnd ere
Es sint noch wercktag vil vnd mere
Wann du schon fulest jn dem grunt
- 65
- Vß gyttikeit als laster kunt
|
|