Consilium de ptisi

Cappittel 3

____________________________________________________________

Cappittel von schlaffen vnd wachen.

Nach dem nachstessen sol sy dan 2 stund also warten in rueb vnd dan zu bett gan, do schlauffen nit on 7 stunden; ze vil schlaffen macht vil houpt fluß. Och durch langen schlauff wirt der ußwurff fast verhindert dadurch die prust eng vnd beschwart wirt. hie ist nit myn raut noch maynung, daß dise frow vil wache, wan vil wachen derret den lib, sunder myn radt ist eben dick schlaffen ond nit ze lang, darum so der tag lang ist, so sol sie nach ymmis 2 stund ruben, vnd dan sich ze schlaff neigen ein stund oder 2 mit wol wehochtem houpt; wan tieff vnd nider ligen thuot nit wol in disem prechen. Ouch glich uff das essen schlaffen, beschwart das houpt mit flussen. Nun sindt solich fluß yn diser person gar schadlich, wann sy fliessend hynab in die prust, merent da das aytter vnd serung. Ouch hat die frow ein flussig houpt, dar vm si sich vast hutten muß, vor allem daß diß fluß meret da von ich hernach so ich mer zit hab schriben wird, vnd wie man wider stand thun solle disem fluß, da mit daß die materi nit yn die prust vom houpt fliesse, diß ist ein sundrige materi die sunst gar vil conuent frawen an trifft, ist ouch subtil da von ze schriben vnd eben schwar dem gemeinen artzt.