Handschrift B

____________________________________________________________

XVIII

(HS A 9r-10r, HS B 7r-8r, HS c 17v-19v, Klein 18)

I

ES fügt ſich do ich was uon zehen jaren alt/

 ich wolt beſehen wie die werlt wer geſtalt/

7v

mit ellend armüt mangen winkel haiſs und kalt/

hab ich gebawt bey criſten kriechen haiden/

5

Drey pfenning jndem peutel und ein ſtücklin brot/

das was von haim mein zerung do ich loff jn not/

uon fremden freunden ſo hab ich manchen tropffen rot/

gelazzen ſeyder das ich wand uerſchaiden/

Jch loff ze füſs/ mit ſwerer büſs/ bys das mir ſtarb/

10

mein uatter zwar/ wol viertzen jar/ nye roſs erwarb/

wan eines roupt ſtal/ ich halbs zu mal/ mit ualber varb/

und des geleich ſchied ich da von mit laide/

Zwar renner koch/ ſo was ich doch/ und marſtaller/

auch an dem rüder/ zoch ich zu mir/ das war ſwër/

15

in kandia/ und anderswo/ ouch widerhar/

uil manchen kittel was mein beſtes klaide/

II

GEn preuſſen littwan tartarey türkey über mer/

gen frankreich lampart yspanien mit zwayen kunges her/

traibmich die mynn auf meines aigen geldes wer/

20

Ruprecht Sigmund bayd mit des adlers ſtreiffen/

Frantzoiſch möriſch katloniſch und kaſtilian/

teutzſch latein windiſch lampertiſch reuſchiſch und roman/

die zehen ſprach hab ich gebraucht wenn mir zerran/

auch kund ich fidlen trumen paugken pfeiffen/

25

Jch hab umbfarn/ jnsel und arm/ manig land/

auff ſcheffen gros/ der ich genos/ uon sturmes band/

des hoch und nider/ meres gelider/ uaſt berant/

die ſwarczen ſee lert mich ein vas begreiffen/

Do mir zerbrach/ mit ungemach/ mein wargatein/

30

ein koufman was ich/ doch genas ich/ und kom hyn/

ich und ein rewſs/ indem geſtreuſs/ houbgüt gewin/

das ſücht den grund/ und ſwam ich zu dem reyffen/

III

AJn künigin uon Arragon was ſchon und zart/

da für ich knyet zu willen raicht ich jr den bart/

35

mit hendlein weyſs bant ſy darein ein ringlin zart/

lieplich und ſprach non mayplus dis ligaides/

Von iren banden ward ich jndie oren mein/

geſtochen durch mit einem meſſin nädelein/

nach jr gewonheit ſloſs ſy mir zwen ring dorein/

40

die trüg ich lang und nennt man ſy raycades/

Jch ſücht ze ſtund/ künig Sigmund/ wo ich jn vand/

den mund er ſpreutzt und macht ein kreutz/ do er mich kant/

der rüfft mir ſchier/ du zaigeſt mir/ hie diſen tant/

freuntlich mich fragt tün dir die ring nicht laides/

45

Weib vnd ouch man/ mich ſchowten an/ mit lachen ſo/

newn personier/ kunglicher zier/ die waren da/

ze pärpian/ ir Babſt von lun/ genant petro/

der Römiſch künig/ der zehent vnd die von praydes –

IV

MEin tümes leben wolt ich verkeren das iſt war/

50

und ward ein halber beghart wol zway gancze jar/

mit andacht was der anfangk ſicherlichen zwar/

hett mir die mynn das ende nicht erſtöret/

Die weyl ich rait und ſüchet ritterliche ſpil/

und dient zu willen ain' frowen des ich hil/

55

die wolt mein nye genaden ein' nuſſen vil/

bys das ein kutten meinen leib bedoret/

8r

Vil manig ding/ mir do gar ring/ zu handn' ging/

do mich die kappen/ mit dem lappen/ umbefing/

zwar uor und ſeyt/ mir nye kain meyt/ ſo wol verhing/

60

die mein wort freuntlich gen jr gehöret/

Mit kurczer ſchnür/ die andacht für/ zum gibel aus/

do ich die kutt/ uon mir do ſchutt/ jnnebel rauſs/

ſeyd hat mein leib/ mit leid vortreib/ uil mangen ſtrauſs/

gelitten und iſt halb mein freud erfröret/

V

ES wër zu lang ſolt ich erzellen all mein not/

ia zwinget mich erſt ein außerweltes mündli rot/

da uon mein hercz iſt wunt bys jnden bittern tod/

uor ir mein leib hat mangen ſwaiß berunnē/

Dick rot und blaich hat ſich uerkert mein angeſicht/

70

wann ich der zarten dieren hab gewunne phlicht/

uor zittern ſeuftzen hab ich offt emphunden nicht/

des leibes mein als ob ich wër verbrunnen/

Mit groſſem ſchrick/ ſo bin ich dick/ zwayhundert meyl/

uon ir gerößt/ und nye getrößt/ zu kainer weyl/

75

kelt regen ſnee/ tet nye ſo we/ mit froſtes eyl/

ich brunne wenn mich hiczt die liebe ſunne/

won ich ir bey/ ſo iſt unfrey/ mein mitt und maß/

uon ain' frawen/ ſo müß ich pawen/ ellend ſtraſs/

jnwilden rat/ bys das genadt/ lat jren haſs/

80

und hulff mir die mein trawren käm zu wunne/

VI

UJerhundert weib und mer an aller manne zal/

uand ich ze Nyo die wonten jnder jnsell ſmal/

kain ſchöner pild beſach nye mentzſch jnainem ſal/

noch mocht jr kaine diſem weib geharmen/

85

Von der ich trag auff mein rugk ein ſwëre hurd/

ach got weſſt ſy doch halbe meines laides burd/

mir wër vil deſter ringer offt wie we mir wurd/

und het geding wie es jr müſſt erbarmen/

Wenn ich jnellend/ dick mein hend/ offt winden müſs/

90

mit groſſem leiden/ tün ich meiden/ jren grüſs/

ſpat vnd auch frü/ mit kainer rü/ ſo ſläff ich ſüſs/

das klag ich jren zarten weyſſen armen/

Jr knaben maid/ bedenckt das laid/ die mynne phlegen/

wie wol mir wart/ do mir die zart/ bot iren ſegen/

95

zwar auff mein er/ weſſt ich nicht mer/ jr wider gegen/

des müßt mein oug in zähern dick erbarmen/

VII

ICh han gelebt wol vierczig jar leicht mynner zway/

mit toben wüten tichten ſingen mangerlay/

es wër wol zeit das ich meins aigen kindes geſchray/

100

elichen hört jnainer wiegen gellen/

So kan ich der uergeſſen nymm' ewiklich/

die mir hat geben müt uff diſem ertereich/

jnaller werlt kund ich nicht finden jren gleich/

auch fürcht ich ſer elicher weibe bellen/

105

In vrtail rat/ uil weyſer hat/ geſchäczet mich/

dem ich geuallen/ han mit ſchallen/ liederlich/

jch Wolkenſtein/ leb ſicher klain/ u'nünfftiklich/

das ich der werlt alſo lang beginn zu hellen/

Vnd wol bekenn/ ich wais nicht wenn/ ich ſterben ſol/

110

das mir nicht ſcheiner/ uolgt wann meiner/ berche zol/

het ich dann got/ zu ſeim gebott/ gedienet wol/

ſo forcht ich klain dort haiſſer flamme wellen –