Handschrift B

____________________________________________________________

XXII

(HS A 29r-29v, HS B 10r-10v, HS c 25v-26v, Klein 22)

I

DEs groſſen herren wunder/

nyemand uolsingen mag/

doch wil ich ains beſunder/

uaſt legen an den tag/

5

wie ſich der mentzſch formieret/

jnder planeten purt/

uon dem er wirt gezieret/

geſwechet vnd naturt/

Zwelf zaichen klar durch yetten/

10

die volgen auch darzẅ/

mit ſiben der planeten/

teglichen ſpat und frü/

ſich maiſterlichen ſencken/

tieff in des menczſchen prüt/

15

darnach es ſich müſs lencken/

mit leib ſynn vnd gemüt/

10v

AJn planet ich eẅ melde/

uon erſt der ſunne fluſs/

darnach des mannes zelde/

20

Mars und mercurius/

Jouis uenus zwen klüge/

zu recht nyemäd uerdringt/

mit ſeuberlichem füge/

Saturnus zu jm ſpringt/

25

Der leo jn ſeinem zaichen/

ein zwelffer iſt genant/

ein krebs mit ſeinem ſlaichen/

geleichet dem tarant/

ſtier wider die junckfrowe/

30

das zwiling uiſch ein ſchücz/

leg auf die wag und ſchowe/

waſſerman den Stainbock ſprütz/

II

UNd welcher uon der ſunne/

orient geboren iſt/

35

dem geit der leo die wunne/

ſtarck ring zu aller friſt/

klüg fündig haiſs und fraidig/

ersam ouch dick geſund/

ſläffrig und ſelten laidig/

40

unbleiblich zu aller ſtund/

Smal füſs und mitten klaine/

brait antlitz brüſte groſs/

klain houbt klar öglin raine/

ſchon nas nymt jr genoſs/

45

dick forſchen nach dem ſchaden/

uil mër der ſind ſy fro/

undienſtlich hubſch geladen/

und achtent klain der dro/

Der mon iſt kalt und feuchte/

50

der krebs alſo geſtalt/

jr menczſchen faiſter euchte/

der ſlaff tüt jn gewalt/

groſs houbt und klaine ougen/

ſibel der nasen ſpitz/

55

uon lugern groß an lougen/

ſawmig launiger witz/

Cheuſch jnder mynne wunder/

uil freud iſt jn ein gaſt/

und allzeit gern beſunder/

60

uon hertter heut getaſt/

dünn lebson klaine zende/

der amplick lang gezafft/

ſmal ſchulter dicke hende/

bewart gar tugendhafft/

III

AJn herr der böſen glider/

Mars dürr und grīmlich haiſs/

der Tarant und ein wider/

ſten jn dem ſelben krais/

jr lob ich nicht uaſt treute/

70

in mentzſchlicher natur/

ſy früchtent uaſt ſwach jr leute/

mit leib ſyn und figur/

Jr volgk iſt gar uerlogen/

krieg stelen rouben tüt/

75

unendlich gar betrogen/

ſchendt frawn und prieſter güt/

dünn wang gerümpffen rümer/

teuff ougen jnnder praw/

brait ſchult' weyt mülig lümer/

80

falſch zung bös hye und da/

Ain adelar ich finde/

an dem Mercurio/

darnach ein hübſch geſinde/

junckfrow das zwilig ſo/

85

die würcken göttlich criſtan/

reich mild warhafft getrew/

ſcharff tichter klug juriſten/

ſtainmecz' goldsmid new/

Die red mit red verkeren/

90

hübſch prawn ein mittre leng/

forchtig und hören geren/

fremd ſach jr antlicz eng/

lang nas ein hohe ſtieren/

ſchon augen dick das har/

95

verswigen weys jr hieren/

rain ſauber über jar/

IV

JOuis der tugent krone/

uber alle tugent friſch/

der ſchücz hilfft jm des ſchone/

100

darzü der edel uiſch/

feucht haiſs zu fride ſchieſſen/

ſich ſchamen bözer weyſs/

hofflich an als verdrieſſen/

zu waidenhait den breys/

105

Clain houbt ſchon har murr nasen/

groſs bruſt ein runt person/

eng braw dünn lebs an fasen/

lang zend dick waden gedon/

mißtrawig wanckler ſynne/

110

zu reuten gier von ſtat/

genaiget zu der mynne/

hüglich zu aller tat/

Venus der wune haile/

ſein mentzſchen waidenlich/

115

die wag des ſtieres gaile/

ſy machet gogelreich/

mit ſaittenspil und ſingen/

was die natur erfrewt/

zu bülen tanczen ſpringn'/

120

ſy nyemand vbergewt/

Dick hals klain houbt vil löcke/

ſwartz ougen ſtieren brait/

lanck krumb der nasen ſchöcke/

groſs zend ſchön hend gemait/

125

kurtz arm klain dicke füſſe/

nach der person wol lanck/

die vnkeuſch iſt jn ſüſſe/

das nachſt jr liebſter gedanck/

V

SAturen kalt dürr geboren/

130

ſein kinder böz gelart/

der Stainbock mit den horen/

ſtat jnder ſelben art/

ze morden ſtelen rouben/

frowen ſchenter ſind bekant/

135

ze ſpil ſwërn trinken glouben/

untrewlich ſind gewant/

Von aiſſen engring täsig/

trüb augen ſwarcz nas flach/

dick har brait hercz gar heſſig/

140

dick lebs törocht jr ſach/

gäch durch des zornes flame/

zu wankelhait geplunſt/

vßrichtig von dem ſtamme/

des waſſermānes flunſt/

145

Doch wirt jr fluſs gemenget/

uom zaichen waſſerman/

ein tail da von geſprenget/

als ich ew ſagen kan/

ſich ſchamen diſer dinge/

150

blaich weyſs jr angeſicht/

jr zu kunfft mit gelinge/

natürlich nyemt uernicht/

Doch hat der mentzſch ein adel/

von got natürlich brait/

155

ob jn ein böſer tadel/

berürt als ich uor ſayt/

das er jm mag entrīnen/

durch tugenthaffte ſpreutz/

und fleiſs ſich rainer ſynne/

160

mit hilff des heilgen crewtz/