Handschrift B

____________________________________________________________

XXIII

(HS A 28v, HS B 10v-11r, HS c 27r-27v, Klein 23)

I

WJe uil ich ſing und tichte/

den louff der werlde not/

das ſchäcz ich als für nichte/

11r

wenn ich bedenck den tod/

5

der mich nicht wil begeben/

wie ferr ich uon jm ker/

und ſtellt mir nach dem leben/

ſein gieng mir nahent not/

An wider pott jnsäczen/

10

zeucht er uns all hindan/

mit ſcharpffen klügen läczen/

er yedem richten kan/

güt frid iſt jm zerrunnen/

gar ſnell walt ſein geuert/

15

wer ich jm nicht entrunnen/

er het mich langſt verzert/

Jnwaſſer und auf lande/

ze roſſe füſſen dick/

hett er mich an dem bande/

20

verknüpfft mit ſnellem ſtrick/

hett ich all ſchäcze funden/

die ſoldan ye erkos/

die müſſt er han uerſlundn'/

wer ich geweſen los/

25

Mit fällen waſſers trencke/

und groſſer wunden tief f/

Siben mal ich gedencke/

noch hab ich dhainen brief/

das er mich ſichern welle/

30

zeit weyl minut noch quint/

er iſt mein zergeſelle/

got waiſs wie er mich uindt/

II

MJt warhait wil ich ſprechen/

von erſt ein not gezalt/

35

mit einem pflag ich ze ſtechen/

auff roſſen groſs und valt/

ein tür von klafters klimme/

und dreyer füſſe weyt/

da für ich durch mit grīme/

40

dannocht was es nicht zeit/

Wol vier und zwaintzig staffel/

tieff in eins kellers grund/

die viel ich ab mit raffen/

mein roſs zerbrach den ſlund/

45

mich daucht ich wolt versinken/

inainem uas mit wein/

yedoch bott ich ze trinken/

den güten freunden mein/

Darnach ÿber ettlich wochen/

50

got lech mir ſeinen hüt/

ein ſchiff ward mir zerbrochen/

auff wilden meres flüt/

ich lert ein uas begreiffen/

mit gütem maluisyr/

55

das zoch mich zudem reiffen/

verzagt ſo hett ich ſchier/

Vnd nach derſelben rayse/

ſo was mein erſte gab/

geuangen und ein wayse/

60

ward ich all meiner hab/

mein houbt hett volgeſungen/

von ſlegn' ward es krank/

ouch ward jn mich gedrungen/

ein ſwert nach halbes lanck/

III

AVch ſchwīmen wolt ich leren/

auf einem tieffen ſee/

do ſchoſs ich zu der erden/

das mich ſach nyemād me/

vil ÿber ein güte ſtunde/

70

do kom ich aus der hicz/

uiſch ſücht ich an dem grunde/

mit meiner nasen ſpicz/

Geuangen und gefüret/

ward ich ainſt als ein dieb/

75

mit ſailen zü geſnüret/

das ſchüff meins herczen lieb/

uon der ich hab erworben/

mein aigen leiden ſwër/

wer ſy noch ainſt geſtorben/

80

noch iſt ſy mir geuër/

Des bin ich worden jnnen/

do ich gen vngern rait/

noch von derſelben mynne/

kom ich jngroſſes laid/

85

jnwaſſer wetter wegen/

huſch lert ich mayerol/

und was ouch nach belegen/

der tauggel ward ich uol/

Das iſt ein waſſer ſumpern/

90

von hohen kläpffen groſs/

dorjn uil ich mit pumpern/

des gouggels mich verdroſs/

ich wett umb all die ſtainer/

poliert durch edel dach/

95

ob doch aus hundert ainer/

plib gauggelt er mir nach/

IV

DArnach bey dritthalb iaren/

rnir trauren ward bekant/

von haym ſo wolt ich varen/

100

ein reys jnfremde land/

jnportugal kranaten/

jspania barbarey/

dorjnn kom mir zeſtatten/

vil krumber ſtampaney/

105

Ain herczog hochgeboren/

gehaiſſen friderich/

beweyßt mir ſeinen zoren/

des ward ich lüczel reich/

durch jn ward ich geuangen/

110

an ſchuld auf meinen leib/

ich wand es wër zergangen/

auf diſer erden pleib/

Got lat nicht vngeſtraffet/

uon ſeinem höchſten ſtül/

115

des bin ich wild gezaffet/

danck hab mein alter bül/

die mir hat zü gepfiffen/

vil meines leibes not/

wie wol ſy hat begriffen/

120

vor lang der bitter tod/

Jr lecz die ſlach der ſchawer/

und kracz der wilde bër/

die iſt mir worden ſawer/

das ich jr nymm' ger/

125

het ich die lieb versüdert/

bey ainer haiſſen glüt/

des wër ich bas gefüdert/

an leib ſei er und güt/

V

ES wër noch vil ze ſagen/

130

da wil ich laſſen von/

was ich jn jungen tagen/

geaubenteuert han/

mit kriſtan reuſſen haiden/

jnkriechen güte zeit/

135

der ſchimpf wil mir erlaiden/

ſyd mich das alder ritt/

Vnd waiß wenn er mich zucket/

davon ich hab geſait/

ſtümpfflichen nyder bucket/

140

wie ſchon wer ich berait/

wurd mich der richter howen/

mit ſeinem ſtrengen ſail/

Owe des großen grawen/

wem wurd ich dann zu tail/

145

Darumb jr fürſten herren/

ſo gebt euch ſelber rat/

ich darff euch nicht ze leren/

ir ſecht wol wie es gat/

all menig arm und reiche/

150

macht ewch der ſünde keuſch/

das euch nicht ÿbersliche/

der tod mit ſeim gereuſch/

Welt mich nympt ymm' wunder/

wer dich newr hab geplent/

155

und ſiehſt tëglich beſunder/

das uns der tod entrent/

hewt friſch ſtarck morgen krenklich/

und ÿber morgen tod/

dein lob iſt vnuerfäncklich/

160

bedenckſt du nit die not etc. Amen – Amen – Amen –

Nota diſs uorgeſchriben lied.

Wie uil ich ſing und tichte ſinget ſich jnnder melody

des groſſen herren wunder etc.

Vil hor vnd wänig ſag.

So lebſtu mit frauden manigen tag.