BIBLIOTHECA AUGUSTANA

 

Johannes Eck

1486 - 1543

 

Tractat von den landen Scithia

 

J1v

 

________________________________________________________

 

 

 

 

<fol. J I verso>

 

Das leben sitten und wesen der

Scithi genannt die Ciarchassi.

 

Scithi kriechischer und lateinischer sprach also genannt / von den Tartern unnd Türcken / aber Ciarchassi und in jr selbst aygen sprach Adigay gehayßsen / wonen von dem flußs Tana auff dem landt Asia / an den selben gestatten des möres gegen Bosphoro Cimerio / yetzund Vosporo genannt / und sant Johanns schoß und die schoß des möres Ciabachi und möres des flußs Tana vor zeyten der Meotisch see / von dannen und ausserhalb der schoß an den gestatten des möres beynahent an das ort Wussy gegen Sirocho oder Sud ost gegen dem flußs Phasy / alldo grenitzen die anstossent an Angaxia ain tail des landes Colchide / und solich gestatten des möres sampt dem innwendigen umbschwaiff des genannten see begreifft sich biß in fünfhundert welscher meyl / durch geet in die land gegen aufgang bey acht tag rayssen da es zuom weytesten ist. Sy bewonen das ganz landt weghafft / sunder stöt oder gemauert vesten oder schlösser und jr größte und mayste bewonung und sammlung ist in ainem tal zwischen dem land Cromuc genannt mer wonhaft bößere gegne / des luffts miltere / und des ertrichs halben fruchtbarer weder andre jr flecken. Sy grenitzen auf dem land mit den Tartern / jr sprach ist gantz getaylt und gesundert von andern jren nachpauren / geet vast auß dem hals. Sy veryehen christelichen glauben / haben kriechisch priester / und tauffen sich nit vor acht jaren jr vil mit ainander mit schlechtem weychwasser / und gar kurtze benedeyung derselben jrer priester. Die kommen nit in die kirchen biß sy auf sechtzig jar alt werden / dann so sy des raubs geleben als sy all thuond / achten sy nicht zimlich die kirchen mit jrem eingang zuo uneren. nach solichem alter verlassen sy die rauberey unnd geend zuo dem gotz dienst in die kirchen / wölche sy auch in der jugent haymsuochen und den gots dienst hören / yedoch zuo roßs und außwendig der kirchen haltent und nit anderst / jre weyber geperen auff dem stro / wöllen das solichs das erst pett der Creatur sein sol / dar=