Verfåten vun de Free un

Hansestadt Hamborg

2002

______________________________________________________________________________

Verfåten vun de

Free un Hansestadt Hamborg

Vun'n 6. Juni 1952 (HmbBL I 100-a),

toletzt ännert an'n 16. Mai 2001 (HmbGVBl. S. 106)

Wat hier achteran ståhn deit, dat hett de Börgerschop as Gesett beslåten un de Senåt bekannt måkt:

De Låg un de Geschichte hebbt de Free un Hansestadt Hamborg mit ehren Håben en besünner Opgåv för dat düütsche Volk towiest. Se will Düütschland mit all de Ennen vun de Eer un all de Völker verbinnen un so ton Freden bidrägen.

De Stadt helpt un lenkt de Weertschop un måkt so meuglich, wat se disse Opgåv leusen un dat levern kann, wat de Minschen bruukt. De Weertschop is för disse Opgåven free; de Minschen köönt sick dorto ok as Genossenschop tosåmensluten.

All Lüüd mööt sick dorför insetten, wat't dat Ganze goot geiht. Se helpt de, de swåk un in Not sünd, un sorgt dorför, wat de Düchtigen opstiegen köönt. De Arbeitskraft steiht ünner den Schutz vun'n Stååt.

All Minschen schöllt politisch, sozial un ökonomisch de sülvigen Rechte hebben; wat dat wohr ward, verbinnt sick de politisch Demokratie mit de Ideen vun Demokratie in de Weertschop.

De Natur as Levensgrundlåg steiht ünner den besünnern Schutz vun'n Stååt.

Disse Gedanken sünd de Grundlåg; dorop boot sick disse Verfåten op, de sick de Free un Hansestadt Hamborg dör de Börgerschop gifft.