BIBLIOTHECA AUGUSTANA

 

Kleanthes

ca. 300 - 232/31 a. Chr. n.

 

Ὓμνος εἰς Δία

 

Textus:

Kleanthes, in: Griechische Literatur in Text und Darstellung,

Band 4: Hellenismus, Griechisch und Deutsch

ed. Bernd Effe, Stuttgart; Reclam 1985

 

_______________________________________________________________________

 

 

 

Κύδιστ᾽ ἀθανάτων, πολυώνυμε παγκρατὲς αἰεὶ

Ζεῦ φύσεως ἀρχηγέ, νόμου μετὰ πάντα κυβερνῶν,

χαῖρε· σὲ γὰρ πάντεσσι θέμις θνητοῖσι προσαυδᾶν.

ἐκ σοῦ γὰρ γενόμεσθα, θεοῦ μίμημα λαχόντες

5

μοῦνοι, ὅσα ζώει τε καὶ ἕρπει θνήτ᾽ ἐπὶ γαῖαν·

τῶι σε καθυμνήσω, καὶ σὸν κράτος αἰὲν ἀείσω.

σοὶ δὴ πᾶς ὅδε κόσμος ἑλισσόμενος περὶ γαῖαν

πείθεται ἧι κεν ἄγηις, καὶ ἑκὼν ὑπὸ σεῖο κρατεῖται·

τοῖον ἔχεις ὑποεργὸν ἀνικήτοις ἐνὶ χερσὶν

10

ἀμφήκη πυρόεντ᾽ αἰειζώοντα κεραυνόν·

τοῦ γὰρ ὑπὸ πληγῆις φύσεως πάντ᾽ ἔργα τελεῖται·

ὧι σὺ κατευθύνεις κοινὸν λόγον, ὅς διὰ πάντων

φοιτᾶι μιγνύμενος μεγάλωι μικροῖς τε φάεσσιν

‹ὅς τόσσος γεγαὼς ὕπατος βασιλεὺς διὰ πάντος.›

15

οὐδέ τι γίγνεται ἔργον ἐπὶ χθονὶ σοῦ δίχα, δαῖμον,

οὔτε κατ᾽ αἰθέριον θεῖον πόλον, οὔτ᾽ ἐνὶ πόντωι,

πλὴν ὁπόσα ῥέζουσι κακοὶ σφετέραισιν ἀνοίαις.

ἀλλὰ σὺ καὶ τὰ περισσὰ ἐπίστασαι ἄρτια θεῖναι,

καὶ κοσμεῖν τἄκοσμα, καὶ οὐ φίλα σοὶ φίλα ἐστίν.

20

ὧδε γὰρ εἰς ἕν πάντα συνήρμοκας ἐσθλὰ κακοῖσιν,

ὥσθ᾽ ἕνα γίγνεσθαι πάντων λόγον αἰὲν ἐόντα.

ὅν φεύγοντες ἐῶσιν ὅσοι θνητῶν κακοί εἰσιν,

δύσμοροι, οἵ τ᾽ ἀγαθῶν μὲν ἀεὶ κτῆσιν ποθέοντες

οὔτ᾽ ἐσορῶσι θεοῦ κοινὸν νόμον οὔτε κλύουσιν,

25

ὧι κεν πειθόμενοι σὺν νῶι βίον ἐσθλὸν ἔχοιεν·

αὐτοὶ δ᾽ αὖθ᾽ ὁρμῶσιν ἄνοι κακὸν ἄλλος ἐπ᾽ ἄλλο,

οἳ μὲν ὑπὲρ δόξης σπουδὴν δυσέριστον ἔχοντες,

οἳ δ᾽ ἐπὶ κερδοσύνας τετραμμένοι οὐδενὶ κόσμωι

ἄλλοι δ᾽ εἰς ἄνεσιν καὶ σώματος ἡδέα ἔργα

30

. . . . . . ‹ἐπ᾽ ἄλλοτε δ᾽ ἄλλα φέρονται,

σπεύδοντες μάλα πάμπαν ἐναντία τῶνδε γενέσθαι.›

ἀλλὰ Ζεῦ πάνδωρε κελαινεφὲς ἀργικέραυνε,

ἀνθρώπους ῥύου ‹μὲν› ἀπειροσύνης ἀπὸ λυγρῆς·

ἥν σύ, πάτερ, σκέδασον ψυχῆς ἄπο, δὸς δὲ κυρῆσαι

35

γνώμης, ἧι πίσυνος σὺ δίκης μέτα πάντα κυβερνᾶις,

ὄφρ᾽ ἂν τιμηθέντες ἀμειβώμεσθά σε τιμῆι,

ὑμνοῦντες τὰ σὰ ἔργα διηνεκές, ὡς ἐπέοικε

θνητὸν ἐόντ᾽, ἐπεὶ οὔτε βροτοῖς γέρας ἄλλο τι μεῖζον

οὔτε θεοῖς, ἢ κοινὸν ἀεὶ νόμον ἐν δίκηι ὑμνεῖν.

 

 

 

Ephebos (ca. 300 a. Chr. n., Antikensammlung der Staatlichen Museen zu Berlin)