BIBLIOTHECA AUGUSTANA

 

Clemens Alexandrinus

ca. 150 - ca. 215

 

Ὑμνος τοῦ σωτῆρος Χριστοῦ

τοῦ ἁγίου Κλήμεντος

 

Textus:

in: Die griechische Literatur in Text und Darstellung,

Kaiserzeit (graece et germanice)

ed. H. Görgemanns, Stuttgart: Reclam 1988

Iota subscriptum - conventio scribendi mediaevalis -

conversum est in iota adscriptum.

 

――――――――――――――――――――――――――――――――

 

 

 

Στόμιον πώλων ἀδαῶν, 

πτερὸν ὀρνίθων ἀπλανῶν, 

οἴαξ νηῶν ἀτρεκής, 

ποιμὴν ἀρνῶν βασιλικῶν· 

5

τοὺς σοὺς ἀφελεῖς 

παῖδας ἄγειρον, 

αἰνεῖν ἁγίως, 

ὑμνεῖν ἀδόλως 

ἀκάκοις στόμασιν 

10

παίδων ἡγήτορα Χριστόν. 

 

Βασιλεῦ ἁγίων, 

λόγε πανδαμάτωρ 

πατρὸς ὑψίστου, 

σοφίας πρύτανι, 

15

στήριγμα πόνων 

αἰωνοχαρές, 

βροτέας γενεᾶς 

σῶτερ Ἰησοῦ· 

ποιμήν, ἀροτήρ, 

20

οἴαξ, στόμιον, 

πτερὸν οὐράνιον 

παναγοῦς ποίμνης, 

ἁλιεῦ μερόπων 

τῶν σῳζομένων 

25

πελάγους κακίας, 

ἰχθῦς ἁγνοὺς 

κύματος ἐχθροῦ 

γλυκερῆι ζωῆι δελεάζων· 

 

ἡγοῦ προβάτων 

30

λογικῶν ποιμὴν, 

ἁγίων ἡγοῦ, 

βασιλεῦ παίδων ἀνεπάφων. 

 

Ἴχνια Χριστοῦ 

ὁδὸς οὐρανία. 

35

λόγος ἀέναος, 

αἰὼν ἄπλετος, 

φῶς ἀίδιον, 

ἐλέους πηγή, 

ῥεκτὴρ ἀρετῆς 

40

σεμνῆι βιοτῆι 

θεὸν ὑμνούντων, 

Χριστὲ Ἰησοῦ· 

γάλα οὐράνιον 

μαστῶν γλυκερῶν 

45

νύμφης χαρίτων, 

σοφίας τῆς σῆς, 

ἐκθλιβόμενον 

οἱ νηπίαχοι 

ἀταλοῖς στόμασιν 

50

ἀτιταλλόμενοι, 

θηλῆς λογικῆς 

πνεύματι δροσερῶι 

ἐμπιμπλάμενοι, 

αἴνους ἀφελεῖς, 

55

ὕμνους ἀτρεκεῖς 

βασιλεῖ Χριστῶι, 

μισθοὺς ὁσίους 

ζωῆς διδαχῆς, 

μέλπωμεν ὁμοῦ, 

60

πέμπωμεν ἁπλῶς 

παῖδα κρατερόν.

 

Χορὸς εἰρήνης 

οἱ χριστόγονοι, 

λαὸς σώφρων, 

65

ψάλλωμεν ὁμοῦ 

θεὸν εἰρήνης.