Ἀνθολογία Παλατινή

1. Τὰ τῶν χριστιανῶν ἐπιγράμματα

______________________________________________________________________

101.

ΜΕΝΑΝΔΡΟΥ ΠΡΟΤΙΚΤΟΡΟΣ

Εἰς Πέρσην μάγον γενόμενον χριστιανὸν

καὶ μαρτυρήσαντα

Ἦν πάρος ἐν Πέρσηισιν ἐγὼ μάγος Ἰσβοζήτης,

εἰς ὀλοὴν ἀπάτην ἐλπίδας ἐκκρεμάσας.

εὖτε δὲ πυρσὸς ἔδαπτεν ἐμὴν πόλιν, ἦλθον ἀρῆξαι·

ἦλθε δὲ καὶ Χριστοῦ πανσθενέος θεράπων·

5

κείνωι δ᾽ ἐσβέσθη δύναμις πυρός, ἀλλὰ καὶ ἔμπης

νικηθεὶς νίκην ἤνυσα θειοτέρην.