Libro de los estados

El segundo libro

___________________________________________________

[Capítulo XXVII]

[El] capítulo xxvii° fabla commo Julio provava que la cruz fue de tres maderos.

«Otrosí, la razón por que quiso que de aquel madero fuese la cruz, esto sería muy luenga razón de dezir. Mas lo que yo ende tengo es esto. En la cruz fueron tres maderos: palma et oliva et ciprés. Por la palma nos da a entender el su sennorío, et por el oliva la paz que por la su passion era puesta entre Dios et los omnes, et el ciprés nos da a entender que por la su muerte eran la muerte et el diablo vençidos.»