BIBLIOTHECA AUGUSTANA

 

Das Nibelungenlied

1190/1200

 

 

Handschrift C

 

3. Aventiure

 

___________________________________________________

 

 

Auentv wie Sivrit ze Wormze chome

 

DEn herren mvten selten     deheiniv hercenleit

er horte sagen mære     wie ein schoniv meit

in Burgonden wære     ze wnsche wolgetan

davon er sit vil arebeit     vn ovch frevden gewan

45

Div ir vnmazen schone     was vil witen chunt

vn ir vil hochgemvte     zv der selben stunt

an der iunchfrowen     so manic helt ervant

ez ladete vil der geste     in daz Gvntheres lant

46

Swaz man nach ir minne     der <werbenden> sach

Chriemhilt in ir sinne     ir selber nie veriach

daz si deheinen wolde     zeime trvte han

er was ir noch vil vremde     dem si wart sider vndertan

Do gedaht vf hohe minne     daz Sigelinde chint

ez was ir aller werben     wider in ein wint

er mohte wol verdienen     schoner frowen lip

sit wart div edel Chriemh'     des starchen Sifrides wip

48

Im rieten sine mage     vn genvge sine man

sit daz er vf minne     vlizzen sich began

daz er eine næme     div im mohte zemen

do sprach der herre Sifrit     so wil ich Chriemh' nemen

49

die edeln iuncfrowen     vz Burgonden lant

durch ir vil grozen schone     von sage ist mir bechant

nie keiser wart so riche     der wolde haben wip

im enzæme wol ze minnen     der iungen kuniginne lip

50

Disiv selben mære     vernam do Sigemvnt

ez [3r]reite sin gesinde     da uon wart im chunt

der wille sines kindes     was im grimme leit

daz er werben wolde     die vil herlichen meit

51

Ez gefriesch ovch Sigelint     des edeln kuniges wip

si hete grozze sorge     vmbe ir kindes lip

den vorhte si verliesen     von Gunthers man

den gewerp man do dem degene     sere leiden began

Do sprach der starche Sivrit     vil lieber vater min

ane edeler frowen minne     wolde ich immer sin

ich enwrbe dar min herce     vil groze liebe hat

swaz ieman reden chunde     des ist deheiner slahte rat

53

Sit dv niht wil erwinden     sprach der kunic do

so bin ich dines willen     inneklichen vro

vn wil dirz helfen fugen     so ich beste chan

doch hat der chunic Gvnther     vil manigen vbermvten man

54

Ob ez ander niemen wære     wan Hagene der degen

der chan mit vbermvte     der hochverte pflegen

daz ich vil sere fvrhte     deiz vns werde leit

ia ist mir solher mære     dicke vil von in geseit

55

Was mag vns daz gewerren     sprach do Sifrit

swaz ich friwentliche     niht ab in erbit

daz mac doch mit ellen     erwerben wol min hant

ich trow im an ertwingen     bediv lvt vn lant

Do sprach der furste Sigemvnt     din rede div ist mir leit

wan wrden disiv mære     ze Rine geseit

dvne dorftes nimmer     geriten in daz lant

Gunther vn Gernot     sint mir lange wol bekant

57

Mit gewalt niemen     erwerben mac die meit

so sprach der kunic Sigemvnt     daz ist mir wol geseit

wellen aber wir mit rechen     riten in daz lant

vnsern besten friwenden     sol div reise sin bechant

58

Des enist mir niht ze mvote     sprach do Sifrit

daz mir svln rechen     ze Rine volgen mit

durch deheine hervart     daz were mir leit

da mit ich solde ertwingen     die vil herlichen meit

59

Si mac svs wol erwerben     da min eines hant

ich wil mit zwelf gesellen     in Gunthers lant

dar sult ir mir helfen     vater Sigemunt

do gap man sinen degenen     ze kleiden gra vn punt

Do vernam ovch disiv mære     sin mvter Sigelint

si begunde trvren     vmbe ir liebez kint

ia vorhte si vil sere     die Guntheres man

div edele kuniginne     darvmbe weinen began

61

Do chom der herre Sivrit     da er die frowen sach

wider sine mvter     gvetlicher sprach

irn svlt niht weinen     durch den willen min

ia wil ich ane sorge     vor allen wiganden sin

62

Nv helfet mir der reise     in Burgonden lant

daz ich un mine rechen     haben solch gewant

daz so stolze degene     mit eren mvgen tragen

des wil ich genade     iv mit triwen immer sagen

63

Sit dv niht wil erwinden     sprach do Sigelint

so hilf ich dir der reise     min einigez kint

mit der besten wæte     die ritter ie getrvoch

dir vn den dinen degenen     ir sult ir furen genvoch

Des neig ir mit zvhten     der vil chvne man

er sprach     ich wil <zer verte>     niemen mere han

niwan zwelf gesellen     [3v]den sol man prufen wat

ich wil versvchen gerne     wie ez vmbe Chriemhilde stat

65

Da sazen schone frowe     naht un tac

luzzil deheiner mvoze     ir deheiniv pflach

vnze si geworhten     die Sifrides wat

er wolde siner verte     han deheiner slahte rat

66

Sin vater hiez im zieren     sin ritterlich gewant

da mit er varn wolde     in Burgonden lant

die ir uil liehten brunne     die wrden ovch bereit

vn ir vil gvten helme     ir <schilde> schon vn breit

67

Do nahet int ir reise     zen Burgonden dan

si heten vmbe ir sorge     wiez im solde ergan

ob si immer wider solden     chomen in daz lant

do svomte man den degenen     von dannen waffen vn gewant

68

Ir rosse div warn schone     ir gereite goldes rot

lebt iemen vbermvter     des enwas niht not

denne wære Sivrit     vn die sine man

wie schone er vrlovbes     gerte zen Burgonden dan

In werte trvorechliche     der kunic vn ovch sin wip

er troste minneklichen     do ir beider lip

er sprach     ir sult niht weinen     durch den willen min

immer ane sorge     mvget ir wol mines libes sin

70

Ez was leit den rechen     ez weint ovch manic meit

ich wæn in hete rehte     ir herce daz geseit

daz in so vil ir friwende     da von gelege tot

von schulden si do klageten     des gie in endeliche not

71

An dem sehsten morgen     ze Wormze vf den sant

riten die vil chunen     allez ir gewant

was uon rotem golde     ir gereite wol getan

ir ross div giengen ebene     des herren Sifrides man

72

Ir schilde warn niwe     starc vn breit

vn lieht ir helme     da ze hove reit

Sifrit der vil chune     in Guntheres lant

man gesach an heleden     nie so herlich gewant

Div ort der swerte giengen     nider vf die sporn

ez furten scharpfe geren     die ritter vz erchorn

Sivrit der furt ir einen     wol zweier spannen breit

der ze sinen ekken     harte vreislichen sneit

74

Die goldes roten zevme     furtens an der hant

von siden furgebuge     sus <chomens> in daz lant

daz volch si allenthalben     kapfen an began

do liefen in engegene     des kunic Guntheres man

75

Die hochgemvten rechen     ritter vn knehte

die sprungen in begegene     daz was michel reht

vn enpfiengen dise geste     in ir herren lant

si namen in die moere     vn ir schilde von der hant

76

Div ross si wolden dannen     ziehen an ir gemach

Sifrit der starche     zv den helden sprach

lat uns noch die moere     eine wile stan

wir wellen schiere hinnen     des ich gvten willen han

77

Man sol ovch unser schilde     ninder von uns tragen

wa ich den kunic uinde     kan mir daz iemen sagen

Gunthern den richen     vz Burgonden lant

do sagetez im ir einer     dem iz rehte was bekant

Welt ir den kunic uinden     daz mac vil wol geschehen

vf ienem sal witen     han ich <in> gesehen

bi den sinen degenen     welt ir zv zim gan

ir mvget da vor [4r]im vinden     manigen vz erwelten man

79

Do waren ovch dem kunige     div mære nv geseit

daz vf sinem hofe wæren     ritter vil gemeit

die furten liehte brunne     vn herlich gewant

si enkande niemen     in der Burgonden lant

80

Den wirt des hete wnder     von wanne koemen dar

die herliche rechen     in wæte lieht gevar

un mit so schonen schilden     niwe un breit

daz im daz niemen sagete     daz was im groezliche leit

81

Des antwrte ein reche     der hiez Ortwin

starch un chvone     mohter wol sin

Sit wir ir niht erchennen     so sult ir heizen gan

nach mime hoheim Hagene     den sul wir si sehen lan

82

Dem sint kunt div riche     vn ovch div fremden lant

mager si bekennen     daz tvot er uns bechant

in hiez der chunic bringen     mit den sinen man

sach man in zvhtekliche     ze hofe fur den chunic gan

83

Waz sin der kunic wolde     des vragete Hagene

ez sint in mime huse     vremde degene

die niemen hie bekennet     ob ir si ê gesehen

habt in vremden landen     des svlt ir Hagene mir veriehen

84

Das tvn ich <sicherlichen>     zeinem venster er do gie

sin ovge er do wenchen     zv den gesten lie

wol behagete im ir geverte     vn ovch ir gewant

si warn im vil vremde     in der Burgonden lant

Er sprach     von swannen furen     die rechen an den Rin

ez mohten selbe fursten     oder fursten boten sin

ir ross div sint so schone     ir chleider harte gvot

swannen si ioch riten     si sint vil hohe gemvot

86

Also sprach do Hagene     als ich mich kan verstan

swie ich Sifriden     noh nie gesehen han

so wil ich wol getrowen     swie ez sich gefuget hat

so ist ez der reche     der dort so herlichen stat

87

Er bringet niwe mære     her in dizze lant

die chvnen Nibelunge     slvch des heldes hant

Schilbunc vn Nibelunch     div richen kuniges chint

er frumte starchiv wnder     mit siner grozen chrefte sint

88

Da der helt aleine     an alle helfe reit

er vant vor einem berge     daz ist mir wol geseit

bi Nibelunges horde     vil manigen kunen man

die warn im ê fremde     vnz er ir chunde da gewan

Hort der Nibelunges     der was gar getragen

vz einem holn berge     nv horet wnder sagen

wie in teilen wolden     der Nibelunge man

daz sach der degen Sifrit     den helt es wndern began

90

Er chom zv zin so nahen     daz er die rechen sach

vn ovch in die <degene>     ir einer drunder sprach

hie chumt der starch Sivrit     der helt von Niderlant

vil seltseniv mære     er an den Nibelungen vant

91

Den rechen wol enpfiengen     Schilbunc vn <Nibelunch>

mie gemeinem site     die edeln fursten iunch

den schaz in baten teilen     den vil chunen man

vn batens in so lange     vnz er inz loben began

92

Er sach so vil gesteines     als wir horen sagen

hundert chantzwægene     ez mohten niht getragen

noch [4v]me des roten goldes     von Nibelunge lant

daz solde in allez teilen     des chunen Sifrides hant

93

Do gaben si im ze miete     daz Nibelunges swert

si wrden mit dem dienste     vil vbele gewert

den in da leisten solde     der vil chune man

ern kundes niht verenden     do wart der helt von in bestan

Den schatz er vngeteilet     beliben mvse lan

do begunden mit im striten     der zweier kunige man

mit ir vater swerte     daz Palmvnch was genant

ez streit ab in der chune     den hort vn Nibelung lant

95

Si heten da ir friunde     zwelf chune man

die starch als risen warn     waz chundez si vervan

die slvoch sit mit zorne     div Sifrides hant

vn rechen sibenhundert     dwanger von Nibelunge lant

96

Dar zv die richen kunige     die sluger beide tot

er chom von Albriche     sit in groze not

der wande sine herren     rechen da zehant

vnz er die grozen sterche     sit an Sifride vant

97

Done chunde im gestriten     daz starche getwerch

alsam die lewen wilde     si liefen an den berch

da er die tarnkappen     Albrichæ ane gewan

do wart des hordes herre     Sifrit der vil chune man

Die da getorsten striten     die lagen alle erslagen

den schatz hiez er do balde     furen vn tragen

da in ê da namen     die Nibelunges man

Albrich der vil starche     do die kameren gewan

99

Er mvos im swern eide     er dient im so sin kneht

aller hande dienste     was er im gereht

so sprach von Tronege Hagene     daz hat er getan

also grozer chrefte     nimere reche gewan

100

Noch weiz ich an im mere     daz mir ist bekant

einen lintrachen     sluoch des heledes hant

do badet er in dem blvote     des ist der helt gemeit

von also vester hvte     daz in nie wafen sit versneit

101

Nv svln wir den rechen     enpfahen deste baz

daz wir iht verdienen     den sinen starchen haz

sin lip der ist so chune     man sol in holden han

er hat mit sinen ellen     so mænigiv wnder getan

Do sprach der chunich riche     dv maht wol haben war

nv sich     wie degenliche     er stet gein strites var

er unt die sine degene     der wnderchune man

wir suln im begegene     hin nider zv dem rechen gan

103

Daz mvgt ir     sprach do Hagene     wol mit eren tvn

er ist von hohem chunne     eines richen kuniges svn

er stet in der gebære     mich dunchet     wizze christ

ez ensin niht kleiniv mære     darvmbe er her geriten ist

104

Do sprach der wirt des landes     nv si vns willechomen

er ist edel un chvone     daz han ich wol vernomen

des sol ovch er geniezen     in Burgonden lant

do gie der chunic Gunther     da er Sifriden vant

105

Der wirt vn sine rechen     enpfiengen so den gast

daz in an ir zvhten     wenich iht gebrast

des begunde in nigen     der vil chune man

man sah in zvhtekliche     mit den sinen rechen stan

Mich wndert [5r]dirre mære     sprach der wirt zehant

von wanne ir     edel Sifrit     sit chomen in daz lant

oder waz ir werbet     ze Wormez an den Rin

do sprach der gast zem kunige     daz sol ivch vnverdaget sin

107

Mir wart gesaget mære     in mins vater lant

daz hie bi iv wæren     daz het ich gern <erkant>

die chunsten rechen     des han ich vil vernomen

die ie kunic gewnne     dar vmbe bin ich her bechomen

108

Ovch hort ich iv selben     der degenheite iehen

daz man kunic deheinen     chuner habe gesehen

des giht iv vil der lute     vber elliv disiv lant

nvne wil ich niht erwinden     vnz ez mir werde bechant

109

Ich bin ovch reche     vn solde chrone tragen

ich wil daz gern fugen     daz si von mir sagen

daz ich habe von rehte     lute vn lant

darvmbe sol min ere     vn min hovbt wesen pfant

110

Nv ir sit so chune     als mir ist geseit

iane rvche ich     ist iemen     liep oder leit

ich wil an iv ertwingen     swaz ir mugt han

lant vn burge     daz sol mir wesen allez undertan

Den chunic hete wnder     vn sine man allesam

vmbe disiv mære     die er hie vernam

daz er des hete willen     er næme im siniv lant

daz horten sine degene     do wart in zvernen bechant

112

Wie hete ich daz verdienet     sprach Gunther der degen

des min vater lange     mit eren hat gepflegen

daz wir daz solden vliesen     von iemannes kraft

wir liezen vbel schinen     daz ovch wir pflegen ritterschaft

113

Ich enwil es niht erwinden     sprach aber der chune man

ez enmvge von dinem ellen     din lant den vride han

ich wils alles walten     vn ovch div erbe min

erwirbestvz mit ellen     die svln von rehte wesen din

114

Din lant vn ovch daz mine     suln geliche ligen

sweder unser einer     am andern mac gesigen

dem sol ez allez dienen     die lute vn ovch div lant

da widerredet aleine     der herre Gernot zehant

115

Wir han des niht gedingen     sprach do Gernot

daz wir iht lande irtwingen     daz iemen drumbe tot

gelige vor rechen handen     wir haben richiv lant

div dienent vns von rehte     ze nieman sint si baz bewant

<In> vil grimmem mvote     da stunden die friunde sin

do was ovch dar vnder     der herre Ortwin

der sprach     disiv svone     ist mir von hercen leit

iv hat der starche Sifrit     vnverdienet widerseit

117

Ob ir vn iwer bruder     hetet niht die wer

vn ob er danne furte     ein michil kuniges her

ich trwote wol erstriten     daz der chune man

die grozen vbermvete     von warn schulden mvse lan

118

Daz zvrnde harte sere     der helt von Niderlant

sich ensol niht vermezzen     wider mich din hant

ich bin ein kunic riche     so bistv kuniges man

ia enzimt dir niht mit strite     deheinen minen genoz bestan

119

Nach swerten rief do sere     von Metzen Ortwin

er mohte Hagenen swester suon     von Tronege vil [5v]wol sin

daz der so lange dagete     daz was dem kunige leit

do vnderstundez Gernot     der ritter <kvone> vn gemeit

120

Er sprach ze Ortwine     lat iwer zvrnen stan

vns en hat herre Sifrit     solhes niht getan

wir mugen ez noch wol scheiden     mit zvhten     dest min rat

vn haben in ze frivnde     daz uns lobelicher stat

121

Des antwrte Hagene     vns mac wol wesen leit

allen iwern degenen     daz er ie gereit

durch striten her ze Rine     er soldez haben lan

im heten min herren     solher leide niht getan

Do sprach aber Sifrit     der chreftige man

mvte ivch daz     her Hagene     daz ich gesprochen han

so sol ich lazen chiesen     daz die hende min

wellent vil gewaldech     hie zen Burgonden sin

123

Daz sol ich eine wenden     sprach do Gernot

allen sinen degenen reden er verbot

iht mit vbermvete     des im wære leit

do gedaht ovch Sifrit     an die vil herlichen meit

124

Wie zæme vns mit iv striten     sprach aber Gernot

swaz helde nv dar under     mvsen ligen tot

wir hetens luzzil ere     ob wir ez wolden tvon

des antwrt Sifrit     des kunic Sigemundes sun

125

Warumbe bitet Hagene     vn ovch Ortwin

daz er niht gahet striten     mie den frivnden sin

der er also manigen     hie ze lande hat

si mvsin rede vermiden     daz was Gernotes rat

126

Ir sult vns wesen willechomen     sprach Giselher daz kint

vn iwer hergesellen     die hie mit iv sint

wir suln iv gerne dienen     ich un die mage min

do hiez man den gesten     schenchen Guntheres win

Do sprach der wirt des landes     allez daz wir han

gervchet irs nach eren     daz si iv vndertan

vn si mit iv geteilet     lip un gvot

do wart der herre Siurit     ein luzzel senfter gemvot

128

Do hiez man in behalten     alliz ir gewant

man gab in herberge     die besten die man vant

Sivrides knappen     man schvof in gvot gemach

den gast man sit vil gerne     da zen Buregonden sach

129

Man bot im michel ere     darnach ze manigen tagen

tusint stunden mere     danne ich iv kunde gesagen

daz hete verscholt sin ellen     ir svlt wol wizzen daz

in sach vil luzzil iemen     der im were gehaz

130

Sich vlizzen kurzewile     die kunige vn ovch ir man

so was er ie der beste     swes man da began

des chunde im volgen niemen     so michel was sin kraft

so si den stein wrfen     oder schuzzen den schaft

131

Swa so vor den frowen     durch ir hofscheit

churzewile pflagen     die ritter vil gemeit

da sah man ie vil gern     den helt vz Niderlant

er het vf hohe minne     sine sinne gewant

Ze hofe die schonen frowen     vrageten mêre

wer der stolze vremde     reche wêre

sin lip der ist so schone     vil riche sin gewant

do sprachen ir genvge     ez ist der chunic von Niderlant

133

Swes iemen da begunde     des was sin lip bereit

[6r]er trvoch in sinem mvte     ein minnekliche meit

vn ovch in ein div frowe     die er noch niene gesach

div im in heinliche     vil dicke gvtliche sprach

134

Swenne vofem hofe wolde     spilen da div kint

ritter vn knappen     daz sach vil diche sint

Criemh' durch div venster     div kuniginne her

deheiner kurzewile     bedorfte div kuniginne mer

135

Vn wesser daz in sehe     die er in hercen trvoch

da het er kurcewile     immer ane genvoch

solt ovoch er si sehen     ir sult gelovben daz

daz im in dirre werlde     chunde nimmer werden baz

Swenner bi den rechen     vf dem hofe stvnt

also noch die lute     durch kurzewile tvont

so stvnt so minnekliche     daz Sigelinde chint

daz in dvrch hercenliebe     trvtte manic frowe sint

137

Er daht ovch manige zite     wie sol daz geschehen

daz ich die maget edele     mit ovgen mvge gesehen

die ich von hercen minne     vn lange han getan

div ist mir vil vremde     des mvz ich dicke truric stan

138

Swenne die kunige riche     riten in ir lant

so mvsin ie die rechen     mit in al zehant

da mit reit ovch Sifrit     daz was den frowen leit

er het durch hohe minne     diche michel arebeit

139

Svs wonter bi den herren     daz ist al war

in Guntheres lande     volleklich ein iar

daz er die minneklichen     die zite niene gesach

von der im sit vil liebe     vn ovch vil leide geschach