BIBLIOTHECA AUGUSTANA

 

C. Valerius Catullus

ca. 87 - 54 a. Chr. n.

 

Carmina

 

Carmen XXI

[ad Aurelium.]

 

_________________________________________________________

 

 

 

metrum: hendecasyllabus

 

 

Aureli, pater esuritionum,

non harum modo, sed quot aut fuerunt

aut sunt aut aliis erunt in annis,

pedicare cupis meos amores.

5

nec clam: nam simul es, iocaris una,

haerens ad latus omnia experiris.

frustra: nam insidias mihi instruentem

tangam te prior irrumatione.

atque id si faceres satur, tacerem:

10

nunc ipsum id doleo, quod esurire

a temet puer et sitire discet.

quare desine, dum licet pudico,

ne finem facias, sed irrumatus.