Carmina

Carmen C

[ad Marcum Caelium.]

_________________________________________________________

metrum: distichon dactylicum

Caelius Aufilenum et Quintius Aufilenam

flos Veronensum depereunt iuvenum,

hic fratrem, ille sororem. hoc est quod dicitur illud

«fraternum» vere «dulce sodalicium».

5

cui faveam potius? Caeli, tibi: nam tua nobis

per facta exhibitast unica amicitia,

cum vesana meas torreret flamma medullas.

sis felix, Caeli, sis in amore potens!