Carminum liber primus

Carmen X

___________________________________________________

Metrum:

Sapphicum

Mercuri, facunde nepos Atlantis,

qui feros cultus hominum recentum

voce formasti catus et decorae

more palaestrae,

5

te canam, magni Iovis et deorum

nuntium curvaeque lyrae parentem,

callidum quidquid placuit iocoso

condere furto.

te, boves olim nisi reddidisses

10

per dolum amotas, puerum minaci

voce dum terret, viduus pharetra

risit Apollo.

quin et Atridas duce te superbos

Ilio dives Priamus relicto

15

Thessalosque ignis et iniqua Troiae

castra fefellit.

tu pias laetis animas reponis

sedibus virgaque levem coerces

aurea turbam, superis deorum

20

gratus et imis.