BIBLIOTHECA AUGUSTANA

 

Q. Horatius Flaccus

65 - 8 a. Chr. n.

 

Carminum liber primus

 

Carmen XXXII

 

___________________________________________________

 

 

 

Metrum:

Sapphicum

 

Poscimus, si quid vacui sub umbra

lusimus tecum, quod et hunc in annum

vivat et pluris, age dic Latinum,

barbite, carmen,

 

5

Lesbio primum modulate civi,

qui ferox bello tamen inter arma,

sive iactatam religarat udo

litore navim,

 

Liberum et Musas Veneremque et illi

10

semper haerentem puerum canebat

et Lycum nigris oculis nigroque

crine decorum.

 

o decus Phoebi et dapibus supremi

grata testudo Iovis, o laborum

15

dulce lenimen mihi cumque salve

rite vocanti.