BIBLIOTHECA AUGUSTANA

 

Q. Horatius Flaccus

65 - 8 a. Chr. n.

 

Carminum liber alter

 

Carmen XVIII

 

___________________________________________________

 

 

 

Metrum:

Hipponacteum

 

Non ebur neque aureum

mea renidet in domo lacunar,

non trabes Hymettiae

premunt columnas ultima recisas

 

5

Africa neque Attali

ignotus heres regiam occupavi

nec Laconicas mihi

trahunt honestae purpuras clientae.

 

at fides et ingeni

10

benigna vena est pauperemque dives

me petit: nihil supra

deos lacesso nec potentem amicum

 

largiora flagito,

satis beatus unicis Sabinis.

15

truditur dies die

novaeque pergunt interire lunae:

 

tu secanda marmora

locas sub ipsum funus et sepulcri

inmemor struis domos

20

marisque Bais obstrepentis urges

 

submovere litora,

parum locuples continente ripa:

quid quod usque proximos

revellis agri terminos et ultra

 

25

limites clientium

salis avarus? pellitur paternos

in sinu ferens deos

et uxor et vir sordidosque natos.

 

nulla certior tamen

30

rapacis Orci fine destinata

aula divitem manet

erum. quid ultra tendis? aequa tellus

 

pauperi recluditur

regumque pueris, nec satelles Orci

35

callidum Promethea

revexit auro captus. hic superbum

 

Tantalum atque Tantali

genus coercet, hic levare functum

pauperem laboribus

40

vocatus atque non vocatus audit.