Carminum liber tertius

Carmen XXVI

___________________________________________________

Metrum:

Alcaicum

Vixi puellis nuper idoneus

et militavi non sine gloria:

nunc arma defunctumque bello

barbiton hic paries habebit,

5

laevom marinae qui Veneris latus

custodit: hic, hic ponite lucida

funalia et vectis et arcus

oppositis foribus minacis.

o quae beatam diva tenes Cyprum et

10

Memphin carentem Sithonia nive,

regina, sublimi flagello

tange Chloen semel arrogantem.