Epodon liber

Epodos III

___________________________________________________

Metrum:

trimeter iambeus et dimeter iambeus

Parentis olim siquis impia manu

senile guttur fregerit,

edit cicutis alium nocentius.

o dura messorum ilia.

5

quid hoc veneni saevit in praecordiis?

num viperinus his cruor

incoctus herbis me fefellit? an malas

Canidia tractavit dapes?

ut Argonautas praeter omnis candidum

10

Medea mirata est ducem,

ignota tauris inligaturum iuga

perunxit hoc Iasonem,

hoc delibutis ulta donis paelicem

serpente fugit alite.

15

nec tantus umquam siderum insedit vapor

siticulosae Apuliae

nec munus umeris efficacis Herculis

inarsit aestuosius.

at siquid umquam tale concupiveris,

20

iocose Maecenas, precor,

manum puella savio opponat tuo,

extrema et in sponda cubet.