| |
|
- H y m n i
- ______________________________
- Metrum hymnorum:
Dimeter iambeus acatalecticus:
Melodia hymnorum (reconstructio):
(mp3, ca. 170 kb)
- ______________________________
- Deus creator omnium
- Deus creator omnium,
polique rector, vestiens
diem decoro lumine,
noctem soporis gratia,
- 5
- artus solutos ut quies
reddat laboris usui,
mentesque fessas allevet
luctusque solvat anxios,
grates peracto iam die
- 10
- et noctis exortu preces,
voti reos ut adiuves,
hymnum canentes solvimus.
te cordis ima concinant,
te vox canora concrepet,
- 15
- te diligat castus amor,
te mens adoret sobria:
ut cum profunda clauserit
diem caligo noctium,
fides tenebras nesciat
- 20
- et nox fide reluceat.
dormire mentem ne sinas,
dormire culpa noverit,
castis fides refrigerans
somni vaporem temperet.
- 25
- exuta sensu lubrico
te cordis ima somnient,
ne hostis invidi dolo
pavor quietos suscitet.
Christum rogemus et patrem,
- 30
- Christi patrisque spiritum,
unum potens per omnia
fove precantes, trinitas.
- Aeterne rerum conditor
- Aeterne rerum conditor,
noctem diemque qui regis
et temporum das tempora,
ut alleves fastidium;
- 5
- praeco diei iam sonat,
noctis profundae pervigil,
nocturna lux viantibus,
a nocte noctem segregans.
hoc excitatus lucifer
- 10
- solvit polum caligine,
hoc omnis errorum chorus
vias nocendi deserit.
hoc nauta vires colligit,
pontique mitescunt freta;
- 15
- hoc ipse petra ecclesiae
canente culpam diluit.
surgamus ergo strenue:
gallus iacentes excitat
et somnolentos increpat;
- 20
- gallus negantes arguit.
gallo canente spes redit,
aegris salus refunditur,
mucro latronis conditur,
lapsis fides revertitur.
- 25
- Iesu, labentes respice,
et nos videndo corrige;
si respicis lapsus cadunt
fletuque culpa solvitur.
tu lux refulge sensibus,
- 30
- mentisque somnum discute:;
te nostra vox primum sonet,
et vota solvamus tibi.
deo patri sit gloria
eiusque soli filio
- 35
- cum spiritu paraclito
et nunc et in perpetuum.
- Iam surgit hora tertia
- Iam surgit hora tertia,
qua Christus ascendit crucem;
nil insolens mens cogitet,
intendat affectum precis.
- 5
- qui corde Christum suscipit,
innoxium sensum gerit,
votisque praestat sedulis
sanctum mereri spiritum.
haec hora qua finem dedit
- 10
- diri veterno criminis,
mortisque regnum diruit,
culpamque ab aevo sustulit.
hinc iam beata tempora
coepere Christi gratia,
- 15
- fidei replevit veritas
totum per orbem ecclesias.
celso triumphi vertice
matri loquebatur suae:
«en filius, mater, tuus,»
- 20
- apostolo, «en mater tua,»
praetenta nuptae foedera
alto docens mysterio,
ne virginis partus sacer
matris pudorem laederet.
- 25
- cui fidem caelestibus
Iesus dedit miraculis,
nec credidit plebs impia:
qui credidit salvus erit.
nos credimus natum deum
- 30
- partumque virginis sacrae,
peccata qui mundi tulit
ad dexteram sedens patris.
- In nocte natalis domini
- Intende. qui regis Israel,
super cherubin qui sedes,
adpare Ephrem coram, excita
potentiam tuam et veni.
- 5
- veni, redemptor gentium,
ostende partum virginis,
miretur omne saeculum,
talis decet partus deo.
non ex virili semine,
- 10
- sed mystico spiramine
verbum dei factum est caro,
fructusque ventris floruit.
alvus tumescit virginis,
claustrum pudoris permanet,
- 15
- vexilla virtutum micant,
versatur in templo deus.
procedat e thalamo suo,
pudoris aula regia,
geminae gigans substantiae;
- 20
- alacris occurrat viam.
egressus eius a patre,
regressus eius ad patrem,
excursus usque ad inferos,
recursus ad sedem dei.
- 25
- aequalis aeterno patri
carnis tropaeo accingere,
infirma nostri corporis
virtute firmans perpeti.
praesepe iam fulget tuum
- 30
- lumenque nox spirat novum,
quod nulla nox interpolet
fideque iugi luceat.
- Inluminans altissimus
- Inluminans altissimus
micantium astrorum globos,
pax, vita, lumen, veritas,
Iesu, fave precantibus;
- 5
- seu mystico baptismate
fluenta Iordanis retro
conversa quondam tertio
praesente sacraris die;
seu stella partum virginis
- 10
- caelo micans signaverit,
et hac adoratum die
praesepe magos duxerit;
vel hydriis plenis aquae
vini saporem infuderis;
- 15
- hausit minister conscius,
quod ipse non impleverat.
aquas colorari videns,
inebriare flumina,
elementa mutata stupet
- 20
- transire in usus alteros.
sic quinque milibus virum
dum quinque panes dividis,
edentium sub dentibus
in ore crescebat cibus.
- 25
- multiplicabatur magis
dispendio panis suo.
quis haec videns mirabitur
iuges meatus fontium?
inter manus frangentium
- 30
- panis rigatur profluus;
intacta quae non fregerant
fragmenta subrepunt viris.
- Orabo mente dominum
- Orabo mente dominum,
orabo simul spiritu;
ne vox sola deo canat,
sensusque noster alibi
- 5
- ductus, aberret fluctuans,
vanis praeventus casibus.
- Splendor paternae gloriae
- Splendor paternae gloriae,
de luce lucem proferens,
lux lucis et fons luminis,
dies dierum inluminans,
- 5
- verusque sol inlabere,
micans nitore perpeti,
iubarque sancti spiritus
infunde nostris sensibus.
votis vocemus et patrem -
- 10
- patrem perennis gloriae,
patrem potentis gratiaeb-
culpam releget lubricam.
informet actus strenuos,
dentem retundat invidi,
- 15
- casus secundet asperos,
donet gerendi gratiam,
mentem gubernet et regat
casto fideli corpore;
fides calore ferveat,
- 20
- fraudis venena nesciat.
Christusque nobis sit cibus,
potusque noster sit fides;
laeti bibamus sobriam
ebrietatem spiritus.
- 25
- laetus dies hic transeat,
pudor sit ut diluculum,
fides velut meridies,
crepusculum mens nesciat.
aurora cursus provehit,
- 30
- aurora totus prodeat,
in patre totus filius,
et totus in verbo pater.
deo patri sit gloria,
eiusque soli filio,
- 35
- cum spifitu paraclito
et nunc et in perpetuum.
- Aeterna Christi munera
- Aeterna Christi munera
et martyrum victorias,,
laudes ferentes debitas,
laetis canamus mentibus.
- 5
- ecclesiarum principes,
belli triumphales duces,
caelestis aulae milites
et vera mundi lumina,
terrore victo saeculi
- 10
- poenisque spretis corporis,
mortis sacrae conpendio,
lucem beatam possident.
traduntur igni martyres
et bestiarum dentibus:
- 15
- armata saevit ungulis
tortoris insani manus.
nudata pendent viscera,
sanguis sacratus funditur,
sed permanent inmobiles
- 20
- vitae perennis gratia.
devota sanctorum fides,
invicta spes credentium,
perfecta Christi caritas,
mundi triumphat principem.
- 25
- in his paterna gloria,
in his voluntas spiritus,
exultat in his filius:
caelum repletur gaudio.
te nunc, redemptor, quaesumus,
- 30
- ut martyrum consortio
iungas precantes servulos,
in sempiterna saecula.
- Somno refectis artubus
- Somno refectis artubus,
spreto cubili surgimus,
nobis, pater, canentibus
adesse te deposcimus.
- 5
- te lingua primum concinat,
te mentis ardor ambiat;
ut actuum sequentium
tu, sancte, sis exordium.
cedant tenebrae lumini,
- 10
- et nox diurno sideri;
ut culpa quam nox intulit,
lucis labascat munere.
precamur iidem supplices,
noxas ut omnes amputes;
- 15
- ne ore te canentium
lauderis in perpetuum.
praesta, pater piissime,
patrique compar unice,
cum spiritu paraclito
- 20
- regnans per omne saeculum.
- Consors paterni luminis
- Consors paterni luminis,
lux ipse lucis, et dies,
noctem canendo rumpimus,
assiste postulantibus.
- 5
- aufer tenebras mentium,
fuga catervas daemonum:
expelle somnolentiam,
ne pigritantes obruat.
- 10
- sic, Christe, nobis omnibus
indulgeas credentibus;
ut prosit exorantibus,
quod praecinentes psallimus.
- O lux beata trinitas
- O lux beata trinitas,
et principalis unitas,
iam sol recedit igneus,
infunde lumen cordibus.
- 5
- te mane laudum carmine,
te deprecamur vespere,
te nostra supplex gloria,
per cuncta laudet saecula.
- Fit porta Christi pervia
- Fit porta Christi pervia,
referta plena gratia,
transitque rex, et permanet,
clausa, ut fuit, per saecula.
- 5
- genus superni luminis,
processit aula virginis,
sponsus, redemptor, conditor,
suae gigas ecclesiae.
honor matris et gaudium,
- 10
- immensa spes credentium,
per atra mortis pocula,
resolvit nostra crimina.
- Amore Christi nobilis
- Amore Christi nobilis
et filius tonitrui
arcana Iohannes dei
fatu revelavit sacro.
- 5
- captis solebat piscibus
patris senectam pascere;
turbante dum natat salo,
inmobilis fide stetit.
hamum profundo merserat,
- 10
- piscatus est verbum dei,
iactavit undis retia,
vitam levavit omnium.
piscis bonus pia est fides
mundi supernatans salum,
- 15
- subnixa Christi pectore,
sancto locuta spiritu:
«in principio erat verbum,
et verbum erat apud deum,
et deus erat verbum, hoc erat
- 20
- in principio apud deum.
omnia per ipsum facta sunt.»
se laudet ipse, se sonet,
et laureatus spiritu
scriptis coronetur suis.
- 25
- commune multis passio,
cruorque delictum lavans;
hoc morte praestat martyrum
quod fecit esse martyres.
vinctus tamen ab inpiis
- 30
- calente olivo dicitur
tersisse mundi pulverem,
stetisse victor aemuli.
- Ad commemorationem beatae Agnetis
- Agnes beatae virginis
natalis est, quo spiritum
caelo refudit debitum
pio sacrata sanguine.
- 5
- matura martyrio fuit
matura nondum nuptiis.
nutabat in viris fides,
cedebat effessus senex.
metu parentes territi
- 10
- claustrum pudoris auxerant:
solvit fores custodiae
fides teneri nescia.
prodire quis nuptum putet, -
sic laeta vultu ducitur, -
- 15
- novas viro ferens opes,
dotata censu sanguinis.
aras nefandi numinis
adolere taedis cogitur:
respondet «haud tales faces
- 20
- sumpsere Christi virgines:
hic ignis exstinguit fidem,
haec flamma lumen eripit.
hic, hic ferite! ut profluo
cruore restinguam focos.»
- 25
- percussa quam pompam tulit!
nam veste se totam tegens
curam pudoris praestitit,
ne quis retectam cerneret.
in morte vivebat pudor,
- 30
- vultumque texerat manu,
terram genu flexo petit
lapsu verecundo cadens.
- Ad Pascham
- Hic est dies verus dei
sancto serenus lumine,
quo diluit sanguis sacer
probrosa mundi crimina;
- 5
- fidem refundens perditis
caecosque visu inluminans.
quem non gravi solvit metu
latronis absolutio?
qui praemium mutans cruce
- 10
- Iesum brevi adquisit fide
iustosque praevio gradu
praevenit in regno dei.
opus stupent et angeli
poenam videntes corporis
- 15
- Christoque adhaerentem reum
vitam beatam carpere.
mysterium mirabile!
ut abluat mundi luem,
peccata tollat omnium
- 20
- carnis vitia mundans caro!
quid hoc potest sublimius,
ut culpa quaerat gratiam
metumque solvat caritas
reddatque mors vitam novam,
- 25
- hamum sibi mors devoret
suisque se nodis liget,
moriatur ut vita omnium,
resurgat ut vita omnium;
cum mors per omnes transeat,
- 30
- omnes resurgant mortui,
consumpta mors ictu suo
perisse se solam gemat?
- Victor, Nabor, Felix, pii
- Victor, Nabor, Felix, pii
Mediolani martyres,
solo hospites, Mauri genus,
terrisque nostris advenae.
- 5
- torrens harena quos dedit,
anhela solis aestubus,
extrema terrae finium,
exulque nostri nominis,
suscepit hospites Padus
- 10
- mercede magna sanguinis:
sancto replevit spiritu
almae fides ecclesiae;
et se coronavit trium
cruore sacro martyrum,
- 15
- castrisque raptos impiis
Christo sacravit milites.
profecit ad fidem labor,
armisque docti bellicis
pro rege vitam ponere,
- 20
- decere pro Christo pati,
non tela quaerunt ferrea,
non arma Christi milites.
munitus armis ambulat,
veram fidem qui possidet.
- 25
- scutum viro sua est fides
et mors triumphus, quem invidens
nobis tyrannus ad oppidum
Laudense misit martyres.
sed reddiderunt hostias
- 30
- rapti quadrigis corpora,
revecti in ora principum
plaustri triumphalis modo.
- Grates tibi, Iesu, novas
- Grates tibi, Iesu, novas
novi repertor muneris
Protasio Gervasio
martyribus inventis cano.
- 5
- piae latebant hostiae,
sed non latebat fons sacer:
latere sanguis non potest,
qui clamat ad deum patrem.
caelo refulgens gratia
- 10
- artus revelavit sacros:
nequimus esse martyres,
sed repperimus martyres.
hic quis requirat testium
voces, ubi factum est fides?
- 15
- sanatus inpos mentium
opus fatetur martyrum.
caecus recepto lumine
mortis sacrae meritum probat:
Severus est nomen viro,
- 20
- usus minister publici.
ut martyrum vestem attigit
et ora tersit nubila,
lumen refulsit ilico
fugitque pulsa caecitas.
- 25
- soluta turba vinculis,
spiris draconum libera,
emissa totis urbibus
domum redit cum gratia.
vetusta saecla vidimus,
- 30
- iactata semicinctia,
tactuque et umbra corporum
aegris salutem redditam.
- Ad festum ss. Petri et Pauli apostolorum
- Apostolorum passio
diem sacravit saeculi,
Petri triumphum nobilem,
Pauli coronam paeferens.
- 5
- coniunxit aequales viros
cruor triumphalis necis,
deum secutos praesulem
Christi coronavit fides.
primus Petrus apostolus
- 10
- nec Paulus inpar gratia;
electionis vas sacrae,
Petri adaequavit fidem.
verso crucis vestigio
Simon honorem dans deo
- 15
- suspensus ascendit, dati
non inmemor oraculi.
praecinctus, ut dictum est, senex
et elevatus ab altero
quo nollet ivit, sed volens
- 20
- mortem subegit asperam.
hinc Roma celsum verticem
devotionis extulit,
fundata tali sanguine
et vate tanto nobilis.
- 25
- tantae per urbis ambitum
stipata tendunt agmina,
trinis celebratur viis
festum sacrorum martyrum.
prodire quis mundum putet,
- 30
- concurrere plebem poli:
electa gentium caput,
sedes magistri gentium.
- Apostolorum supparem
- Apostolorum supparem
Laurentium archidiaconem
pari corona martyrum
Romana sacravit fides.
- 5
- Xystum sequens hic martyrem
responsa vatis rettulit:
«maerere, fili, desine,
sequere me post triduum.»
nec territus poenae metu
- 10
- heres futurus sanguinis
spectavit obtutu pio,
quod ipse mox persolverat.
iam tunc in illo martyre
egit triumphum martyris,
- 15
- successor aequus syngraphum
vocis tenens et sanguinis.
post triduum iussus tamen
census sacratos prodere
spondet pie nec abnuit,
- 20
- addens dolum victoriae.
spectaculum pulcherrimum!
egena cogit agmina
inopesque monstrans praedicat:
«hi sunt opes ecclesiae.»
- 25
- vere piorum perpetes
inopes profecto sunt opes.
avarus inlusus dolet
flammas et ultrices parat.
fugit perustus carnifex
- 30
- suisque cedit ignibus:
«versate me», martyr vocat,
«vorate, si coctum est», iubet.
- Nunc sancte nobis spiritus
- Nunc sancte nobis spiritus,
unum patri cum filio,
dignare promptus ingeri
nostro refusus pectori.
- 5
- os, lingua, mens, sensus, vigor
confessionem personent,
flammescat igne caritas,
accendat ardor proximos.
- Rector potens, verax deus
- Rector potens, verax deus,
qui temperas rerum vices,
splendore mane qui instruis
et ignibus meridiem,
- 5
- exstingue flammas litium,
aufer calorem noxium,
confer salutem corporum,
veramque pacem cordium.
- Rerum deus tenax vigor
- Rerum deus tenax vigor,
inmotus in te permanens,
lucis diurnae tempora
successibus determinans,
- 5
- largire clarum vespere,
quo vita nusquam decitat,
sed praemium mortis sacrae
perennis instet gloria.
- Iesus corona virginum
- Iesus corona virginum,
quem mater illa concipit,
quae sola virgo parturit,
haec vota clemens accipe,
- 5
- qui pascis inter lilia
saeptus choreis virginum,
sponsus decorus gloria
sponsisque reddens praemia.
quocumque pergis, virgines
- 10
- secuntur atque laudibus
post te canentes cursitant
hymnosque dulces personant.
te deprecamur, largius
nostris adauge mentibus
- 15
- nescire prorsus omnia
corruptionis vulnera.
- Aurora caelum purpurat
- Aurora caelum purpurat,
aether resultat laudibus,
mundus triumphans iubilat,
horrens Avernus infremit,
- 5
- rex ille dum fortissimus
de mortis inferno specu
patrum senatum liberum
educit ad vitae iubar.
cuius sepulchrum plurimo
- 10
- custode signabat lapis,
victor triumphat et suo
mortem sepulchro funerat.
«sat funeri, sat lacrimis,
sat est datum doloribus!
- 15
- surrexit exstinctor necis»
clamat coruscans angelus.
ut sis perenne mentibus
paschale, Iesu, gaudium,
a morte dira criminum
- 20
- vitae renatos libera!
deo patri sit gloria
et filio, qui a mortuis
surrexit, ac paraclito
in sempiterna saecula.
- Iam lucis orto sidere
- Iam lucis orto sidere
deum precemur supplices,
ut in diurnis actibus
nos servet a nocentibus.
- 5
- linguam refrenans temperet,
ne litis horror insonet;
visum fovendo ccntegat,
ne vanitates hauriat.
sint pura cordis intima,
- 10
- absistat et vecordia;
carnis terat superbiam
potus cibique parcitas,
ut, cum dies abscesserit
noctemque sors reduxerit,
- 15
- mundi per abstinentiam
ipsi canamus gloriam.
deo patri sit gloria,
eiusque soli filio,
cum spiritu paraclito,
- 20
- et nunc et in perpetuum.
- Christe, redemptor omnium
- Christe, redemptor omnium,
ex patre, patris unice,
solus ante principium
natus ineffabiliter.
- 5
- tu lumen, tu splendor patris,
tu spes perennis omnium,
intende, quas fundunt preces
tui per orbem famuli.
memento salutis auctor,
- 10
- quod nostri quondam corporis
ex illibata virgine
nascendo formam sumpseris.
sic praesens testatur dies,
currens per anni circulum,
- 15
- quod solus a sede patris
mundi salus adveneris.
hunc caelum, terra, hunc mare,
hunc omne, quod in eis est,
auctorem adventus tui
- 20
- laudans exsultat cantico.
nos quoque, qui sancto tuo
redempti sanguine sumus,
ob diem natalis tui
hymnum novum concinimus.
- 25
- gloria tibi, domine,
qui natus es de virgine,
cum patre et sancto spiritu
in sempiterna saecula.
|
|