Carmina miscellanea

Liber VII

――――――――――――――――――――――――――――――――――――――――――

I.   ad Gogonem

II.   ad eundem de cena

III.   ad eundem

IV.   ad eundem

V.   de Bodegisilo duce

VI.   de Palatina uxore eius

VII.   de Lupo duce

VIII.   ad eundem

IX.   item ad eundem

X.   ad Magnulfum

XI.   ad Iovinum

XII.   ad eundem

XIII.   ad Felicem

XIV.   de Mummoleno

XV.   de Berulfo comite

XVI.   de Condane domestico

XVII.   ad Gundovarium

XVIII.   ad Flavum

XIX.   item ad Flavum et Euodium

XX.   ad Sigimundum

XXI.   ad Sigimundum et Alagisilum

XXII.   ad Bosonem referendarium

XXIII.   ad Paternum

XXIV.   versus in gavatis

―――――――

I

Ad Gogonem cum me rogaret ad cenam

Nector vina cibus vestis doctrina facultas –

muneribus largis tu mihi, Gogo, sat es;

tu refluus Cicero, tu noster Apicius extas,

hinc satias verbis, pascis et inde cibis.

5

Sed modo da veniam; bubla turgente quiesco,

nam fit lis uteri, si caro mixta fremat.

Hic ubi bos recubat, fugiet puto pullus et anser

cornibus et pinnis non furor aequus erit.

Et modo iam somno languentia lumina claudo;

10

nam dormire meum carmina lenta probant.

XI

Ad Iovinum inlustrem ac patricium

et rectorem provinciae

Prosaico quotiens direxi scripta relatu!

nullaque de vestro pocula fonte bibo:

quem prius inrigua recrearas ditior unda,

nec modo Castaliis redditur haustus aquis.

5

si me cura minor vestri tenuisset amoris,

iam fuerat licitum stringere colla manu.

nunc magis inde minus capio, quia diligo manu.

et cum plus cupiam, vota negata gemam.

qui sibi transfudit mea pectora pectore toto,

10

cur, rogo, non pariter lumina lumen habent?

vel quod, amice, licet scriptis fero, care, salutem:

sed mihi qua relever pagina reddat opem.

XXII

Ad Bosonem referendarium

Sic tegat omnipotens radiantia culmina regis

atque eius causas arma superna regant,

sic dominum ac servos divina potentia servet

et patriae maneat hoc dominante salus,

5

sic placido regi summus pius auctor ab alto,

qui dedit ante Petro, porrigat ipse manum,

sic te longaevi comitetur gratia regis

et florente illo gaudia fixa metas:

hoc rogo, quam citius veniat quicumque iubetur,

10

ne gravet ultra animos hic mora tarda meos.

nam festinato, statuit quod certa voluntas,

si votum adceleret, dulcius esse solet.

illud enim nimium per verba precantia posco,

commender domino te memorante meo.

15

actibus excellens maneat per saecula felix

et memor ipse mei, dulcis amice, vale.

XXIII

Ad Paternum

Nominis auspicio fulgent tua facta, Paterne,

munere qui proprio te facis esse patrem.

servitii nostri non inmemor omnia praestas

et tibi devotis das pia vota libens.

5

ut bona distribuas modo qui tam promptus haberis,

unde magis praestes amplificentur opes.