Evangelistarium

fol. 44v-45r

Ih. 11:47-54

____________________________________________________________

Manuscriptum

Feria VI

Sequentia sancti evangelii

secundum Iohannem

11:47

In illo tempore. Collegerunt pontifices et pharisaei concilium, et dicebant: Quid facimus, quia hic homo multa signa facit?

11:48

Si dimittimus eum sic, omnes credent in eum, et venient Romani, et tollent nostrum locum, et gentem.

11:49

Unus autem ex ipsis, Caiphas nomine, cum esset pontifex anni illius, dixit eis: Vos nescitis quicquam,

11:50

nec cogitatis quia expedit vobis ut unus moriatur homo pro populo, et non tota gens pereat.

11:51

Hoc autem a semetipso non dixit: sed cum esset pontifex anni illius, prophetavit, quod Ihesus moriturus erat pro gente,

11:52

et non tantum pro gente, sed ut filios Dei, qui erant dispersi, congregaret in unum.

11:53

Ab illo ergo die cogitaverunt ut interficerent eum.

11:54

Ihesus ergo iam non in palam ambulabat apud Iudaeos, sed abiit in regionem iuxta desertum, in civitatem quae dicitur Ephrem, et ibi morabatur cum discipulis suis.