Evangelistarium

fol. 98v

Mt. 12:14-21

____________________________________________________________

Manuscriptum

Feria IIII.

Sequentia sancti evangelii

secundum Matthaeum.

12:14

In illo tempore. Abeuntes pharisaei, consilium faciebant adversus Ihesum, quomodo eum perderent.

12:15

Ihesus autem sciens recessit inde: et secuti sunt eum multi, et curavit eos omnes:

12:16

et praecepit eis ne manifestum eum facerent.

12:17

Ut adimpleretur quod dictum est per Ihesaiam prophetam, dicentem:

12:18

Ecce puer meus, quem elegi, dilectus meus,

in quo bene conplacuit animae meae.

Ponam spiritum meum super eum,

et iudicium gentibus nuntiabit.

12:19

Non contendet, neque clamabit,

neque audiet aliquis in plateis vocem eius:

12:20

harundinem quassatam non confringet,

et linum fumigans non extinguet,

donec eiiciat ad victoriam iudicium:

12:21

et in nomine eius gentes sperabunt.