De accidentibus

________________________________________________________________

Capitulum Primum:

Prooemium, in quo traditur

intentio dicendorum

(1) De tertio praeenumeratorum articulorum in principio nunc considerandum, videlicet de natura seu essentia accidentium et de esse ipsorum seu inesse substantiis, et utrum possint aliqua virtute agente vel conservante esse eorum a subiectis separari et permanere secundum se absque subiectis.

(2) Cuius rei consideratio non modicam ingerit difficultatem scholastice inquirentibus, compugnantibus ad invicem rationibus ad rationes et auctoritatibus ad auctoritates, maxime autem communiter loquentibus vincentibus multitudine, sed non sic efficacia rationum, ut patebit discussis et excussis simul cum manifestatione veritatis, si aliqua vel ratione vel auctoritate contraria videantur.