BIBLIOTHECA AUGUSTANA

 

Theodoricus de Apolda

ca. 1228 - post 1297

 

Vita S. Elisabeth

 

Liber I

 

________________________________________________________________

 

 

CAPUT VIII

De nuptiis Ludewici Landgravii cum Elizabeth

 

POST haec cum Domino complacuit Elizabeth contemptam ab impiis respicere, et afflictam consolari; dissipavit consilia maiorum, reprobavit persuasiones magnatorum, et inspiravit confortans praefatum Principem. Qui votum suum patefaciens, obstruxit ora contradicentium, et iniqua loquentium. Nullusque deinceps ausus est nuptiis et matrimonio Elizabeth verbis vel consiliis contraire.

Ipsa quippe erat quam dominus ejus praeparavit conjugio. Contra cujus placitum non poterat humanae malitiae stultitia quidquam loqui, nec valuit hominis superare astutia, quos Dei providentia conjunxit.

Intuere nunc felicem juvenem sponsumque pudicum, qui in contrahendo matrimonio, in consilio impiorum non stetit, et post aurum non abiit, nec in thesauris pecuniae speravit; sciens, quoniam pars bona mulier bona, quae pro bonis factis proprie datur a domino viro bono. Perpende propensius casti adolescentis animum, qui sponsae suae, non ad petulantiam alliciens, sed potius ad gratiam afficiens, donum transmisit, preciossimam imaginem Christi Crucifixi.

Anno ergo ab incarnatione Domini millesimo ducentesimo vigesimo primo Ludewicus Lantgravius Thuringiae inclitus dominam Elizabeth virginem castam regis Ungariae filiam nobilem et eximiam duxit uxorem, conjunctusque est Dei nutu vir fidelis cum muliere fideli, sanctus cum sancta, innocens cum innocente; et non tam carnale, quam spirituale connubium sortiri, invicem se in charitate Domini, supra quam credi valeat, dilexerunt.