BIBLIOTHECA AUGUSTANA

 

Theodoricus de Apolda

ca. 1228 - post 1297

 

Vita S. Elisabeth

 

Liber II

 

________________________________________________________________

 

 

CAPUT III

Qualiter visitata a Deo

amplius profecit

 

NAM praeclaris virtutum exercitiis insignitam famulam suam Elizabeth ad sublimiora dum Deus omnipotens vellet provehere, accidit ut in quadam solennitate magna, preciosissimis vestibus, monilibus gemmisque multis ornata, et diademate aureo coronata de castro Warberch descendens cum socru alioque multo comitatu, ecclesiam quandam subjacentis oppidi introiisset. Elevans autem oculos, quos semper in introitu Ecclesiae ad Crucem dirigere solebat, respexit imaginem Crucifixi, et considerans nudum et spinis coronatum, clavis confixum, compuncta in se rediens meditari coepit, dicens intra se; En pendet Deus tuus nudus, et tu homo inutilis vestibus preciosis operiris. Spinis capit ejus pungitur; et tuum caput auro redimitur. Hacque compassione affecta cecidit exanimis effecta. Quo viso turbati astantes tollebant eam, et ad ostium Ecclesiae propter refrigerium portaverunt; et reclinantes eam, faciem ejus aqua benedicta, quae aderat, consperserunt. Hac visitatione divinitus inspirata proposuit omnem deinceps ornatum postponere, in quo non necessitatem agnosceret aliquam. Quod et postmodum omni tempore vitae suae custodivit.