Hendecasyllaborum

seu Baiarum libri II

Liber I

_________________________________________________________

I.

Mvsam Catvlli invocat.

Tum Hendecasyllabos alloquitur,

et Marinum monet, ne eos comites

in balneas secum ferat.

Nigris, Pieri, quae places ocellis,

et cantum colis, et colis choreas,

nigris, Pieri, grata dis capillis,

formosae quibus invident Napaeae,

5

dum gratos prope Sirmionis amnes

et crinem lavis et comam repectis,

ne tu, Pieri, ne benigna desis,

dum laetis salibus, sonante plectro,

alterno et pede balneas adimus.

10

Huc huc, hendecasyllabi frequentes,

huc vos quicquid habetis et leporum

iocorum simul et facetiarum

huc deferte, minutuli, citique.

Quod vos en pretium, aut manet voluptas?

15

Inter lacteolas simul puellas,

inter molliculos simul maritos

ludetis simul atque prurietis.

Dum tractat tumidas puer papillas,

contrectat tenerum femur puella,

20

tractat delicias suas maritus,

tentat delicium suum puella,

et ludunt simul et simul foventur

lassi, languidulique, fessulique,

tunc vos, hendecasyllabi beati,

25

quot, quot oscula morsiunculasque,

quot, quot enumerabitis duella?

Quot suspiria, murmura, et cachinnos?

Cum furtim liceat sopore in ipso

contrectare papillulas sinumque,

30

occultam et femori admovere dextram.

Hos tu sed comites, Marine, vita,

Baianis quotiens aquis lavaris,

tuas ne veneres libidinesque

et lusus referant salaciores,

35

sis et fabula, quod senex salaxque,

et thermas quoque balneas et ipsas

infames nimio supinus usu.

Hanc laudem potius tuo relinque

compatri. Chorus hunc puellularum

40

incanum sequitur; colunt sed illae

non annos vetuli senis, sed aurum.