Hendecasyllaborum

seu Baiarum libri II

Liber II

_________________________________________________________

XI.

Ad focillam.

In somnis tenerum mihi labellum

offers dum male, suaviorque utrumque,

decursim lacrimae tibi exciderunt,

et largo faciem madore tinguis;

5

atque has dum lacrimas madenti ab ore

detergo simul et simul relingo,

surreptim mihi mordicusque linguam

exceptam rapis obterisque dente.

Mox risum lacrimis iocosque miscens:

10

»Haec nos ludicra imaginesque noctis,

has, inquis, simul in die vicissim

et veras faciamus et probemus.»

His te in iudicium voco fidemque:

en linguam tibi, porge mi labella.