BIBLIOTHECA AUGUSTANA

 

Hieronymus Cardanus

1501 - 1576

 

Hieronymi Cardani

de propria vita liber

 

____________________________________________________________________________

 

 

 

capvt xxxiv

Magistri mei

―――――

Pater meus in prima pueritia arithmeticae 1) rudimenta et quasi tum arcana (nescio unde sumpserit) familiariter me docuit, anno circiter nono. Paulo post etiam arabiae astrologiae, dum et conaretur memoriam in me artificialem instillare, sed ego ad memoriam illam minime aptus eram. Post XII annum docuit me primos sex Euclidis libros, sed ita ut quae per me ipsum intelligere possem, nullam impenderet operam.

Haec sunt quae sine ludo litterario adeptus sum ac didici, sine lingua Latina. Anno XX ferme exacto ad Academiam Papiensem me contuli, XXI in fine disputaui sub Curtio, medicinae primario, qui me dignatus est honore argumentandi, cum nil tale ab eo sperare ausus essem. Audiui et Brandam Porrum in philosophia, et quandoque Franciscum Taegium Nouariensem. Anno MDXXIV Patauii 2) audiui Curtium et Memoriam in medicina. Tum uidi Hieronymum Accorumbonum medicinam practicam (ut uocant) profitentem et Tosetum Momum inter professores, et Hispanum, philosophum magni nominis.

 

――――――――

 

1) prima pueritia arithmeticae NSD : pueritia primum arithmeticae M 

2) Patauii MND : Petauii S.