aeterna Christi munera

aeterna Christi munera,
apostolorum gloriam,
laudes canentes debitas,
laetis canamus mentibus.

ecclesiarum principes,
belli triumphales duces,
caelestis aulae milites,
et vera mundi lumina.

devota sanctorum fides,
invicta spes credentium,
perfecta Christi caritas
mundi triumphat principem.

in his paterna gloria,
in his voluntas spiritus,
exsultat in his filius,
caelum repletur gaudio.

te nunc, redemptor, quaesumus,
ut ipsorum consortio
iungas precantes servulos
in sempiterna saecula.