<<< fabularum indicem   <<< retro   porro >>>



B  I  B  L  I  O  T  H  E  C  A    A  U  G  U  S  T  A  N  A

 

 

 

 
Aviani
fabulae

 


 






 



IV.

[de vento et sole.]


immitis Boreas placidusque +ad sidera+ Phoebus
  iurgia cum magno conseruere Iove,
quis prior inceptum peragat: mediumque per aequor
  carpebat solitum forte viator iter.
5
convenit hanc potius liti praefigere causam,
  pallia nudato decutienda viro.
protinus impulsus ventis circumtonat aether
  et gelidus nimias depluit imber aquas:
ille magis lateri duplicem circumdat amictum,
10
  turbida submotos quod trahit aura sinus.
sed tenues radios paulatim increscere Phoebus
  iusserat, ut nimio surgeret igne iubar,
donec lassa volens requiescere membra viator
  deposita fessus veste sederet humi.
15
tunc victor docuit praesentia numina Titan,
  nullum praemissis vincere posse minis.



<<< fabularum indicem   <<< retro   porro >>>