XI.

[de duabus ollis.]


eripiens geminas ripis cedentibus ollas
  insanis pariter flumen agebat aquis.
sed diversa duas ars et natura creavit:
  aere prior fusa est, altera facta luto.

5

dispar erat fragili et solidae concordia motus,
  incertumque vagans amnis habebat iter.
ne tamen elisam confringeret, aerea testa
  iurabat solidam longius ire viam.
illa timens ne quid levibus graviora nocerent,

10

  et quia nulla brevi est cum meliore fides,
«quamvis securam verbis me feceris,» inquit,
  «non timor ex animo decutiendus erit.
nam me sive tibi seu te mihi conferat unda,
  semper ero ambobus subdita sola malis.»