<<< fabularum indicem   <<< retro   porro >>>



B  I  B  L  I  O  T  H  E  C  A    A  U  G  U  S  T  A  N  A

 

 

 

 
Aviani
fabulae

 


 






 



XXVI.

[de capella et leone.]


viderat excelsa pascentem rupe capellam,
  comminus esuriens cum leo ferret iter.
et prior: «heus» inquit «praeruptis ardua saxis
  linque, nec hirsutis pascua quaere iugis;
5
sed cytisi croceum per prata virentia florem
  et glaucas salices et thyma grata pete.»
illa gemens: «desiste, precor, fallaciter» inquit
  «securam placidis instimulare dolis.
vera licet moneas, maiora pericula tollas,
10
  tu tamen his dictis non facis esse fidem.
nam quamvis rectis constet sententia verbis,
  suspectam hanc rabidus consiliator habes.»



<<< fabularum indicem   <<< retro   porro >>>