Lan quan lo temps renovelha

Texte:

The Songs of Jaufré Rudel

Éd.: Rupert T. Pickens, Toronto 1978

(Rudelian Corpus in MS. C)

____________________________________________________________________________

I

Lan quan lo temps renovelha

E par la flors albespina,

Ai talent d'un chant novelh,

E son florit l'albespi,

5

- - - - - - - - - - - - - - - - - - - - -

Qu'ieu sai cum lo chans refri

Doussament per miey la bruella:

Lo rossinhol s'esbaudeya.

II

E quan lo bosc reverdeya,

10

Nays fresca e vertz la fuelha,

Adoncas ieu reverdey

De ioy e florisc cum suelh

Ab lo dous chan del mati

Que fan d'amor li auzelh,

15

- - - - - - - - - - - - - - - - - -

Jauzens sonon al aurelha.

III

E pus l'us l'altre s'enselha

E·l par ues sa par s'aizina,

De nos es dregz que s'enselh

20

Quascus d'altretal aizi

Ab fin' amor ses erguelh,

Qu'ieu conosc assaz e vey

Pus la malvestatz s'orguelha,

Qu'amor non deu far enveya.

IV

25

Joys ab amar cabaleya

E·s veston d'una despuelha,

E cuy que descabaley

D'escassedat mi despuelh.

Amors si senh ab joy fi,

30

E joys fa d'amor capdelh

A malvestat que no fina:

Bayssa pretz e·l descapdelha.

V

Cortezament assembelha

Amor vera e s'afina,

35

Que de joy fa son sembelh,

Per qu'ieu plus ves lieys acli,

E malvestat dezacuelh

Pretz que no sap on s'estey,

Per qu'ieu laus lo vens acuelha

40

Amor e ab lieys esteya.

VI

Sobre·ls melhors senhoreya

Mos chans en qual guiza·m vuelha,

E·ls motz laissans senhorey

E·ls sai dir aissi cum vuelh.

45

E vec [vos] del vers la fi

Qu'en Grimoarz vos espelh,

Qu'ab joy lo las' e la fina,

Si·s qui bel chant n'i l'espelha.