Question au clerc du guichet

(Balade de l'appel)

1463

Texte:

François Villon, Oeuvres

Édition critique avec notices et glossaire

par Louis Thuasne, Paris: Auguste Picard 1923

Fac-similé: Internet Archive

__________________________________________________________________________________

Question au clerc du guichet

Que vous semble de mon appel,

Garnier? Feis je sens ou folie?

Toute beste garde sa pel;

4

Qui la contraint, efforce ou lie,

S'elle peult, elle se deslie.

Quant donc par plaisir voluntaire

Chanté me fut ceste omelie,

8

Estoit il lors temps de moy taire?

Se feusse des hoirs Hue Cappel,

Qui fut extrait de boucherie,

On ne m'eust, parmy ce drappel,

12

Fait boire en ceste escorcherie.

Vous entendez bien joncherie?

Mais quant ceste paine arbitraire

On me juga par tricherie,

16

Estoit il lors temps de moy taire?

Cuidiez vous que soubz mon cappel

N'y eust tant de philosophie

Comme de dire: «J'en appel»?

20

Si avoit, je vous certiffie,

Combien que point trop ne m'y fie.

Quant on me dist, present notaire:

«Pendu serez!» je vous affie,

24

Estoit il lors temps de moy taire?

Prince, se j'eusse eu la pepie,

Pieça je feusse ou est Clotaire,

Aux champs debout comme une espie.

28

Estoit il lors temps de moy taire?